الموضوع: أخر تحديث لأسعار قطع غيار byd f3 بتاريخ 2012-08-25 (من التوكيل )

المشاركة الأصلية كتبت بواسطة bassem.naguib

سألت لحضرتك النهارة على اللي كنت عاوزة .. بس للأسف نسيت خااااااااااالص موضوع فانوس الأستوب الخلفي ده تماماً .. فمعذرة على النسيان .

المهم للأسف برضه النهاردة الأحد فمفيش ناس كتيرة كانت فاتحة .. بس سألت في محلين وكان معايا م/ أيمن memos والأسعار بتاعة الأكرة النيكل لوحدها 55 جنية .. والأكرة النيكل ومعاها تجويف نيكل خلف المقبض 90 جنية .. وبالنسبة للـ wind shield الطقم اللي من غير نيكل عامل أسعار تتراوح ما بين 75 جنية (اللي من غير نيكل) و120 جنية للي بالنيكل .

وأعتقد أن الأسعار دي ممكن تلاقي أحسن منها كمان في محلات أخرى .. وكذلك أعتقد أن الأسعار بتتفاوت على حسب الجودة وإمكانية الفصال .. فمحبتش أطول عليهم وخصوصاً أني مجرد بسأل ومش حشتري .

محمد باشا سمير .. كنت النهاردة في شارع الشيخ ريحان (الشارع اللي جنب قصر عابدين) .. وسألت لحضرتك على الأسعار في محل تاني وكان عنده ما يلي بالنسبة للبي واي دي :
1) طقم كفر نيكل للمرايا 75 جنية
2) حلية نيكل للفوانيس سواء أمامي أو خلفي 90 جنية .
3) هواية الباب (wind shield) ودي اللي حضرتك كنت بتسأل عليها 65 جنية للطقم من غير الحلية النيكل على حوافها ولونها أسود أو عسلي مخدتش بالي قوي .. ولما بسأله على الحلية النيكل قالي ده شريط نيكل بيركب على الحافة وبيتباع بالمتر زي اللي بيركب على المزراب لبعض العربيات .

المشاركة الأصلية كتبت بواسطة engonear

السلام عليكم ورحمة الله
لو سمحتم يعنى انا ناوى اجيب f3 وموضوع الاعطال وقطع الغيار عايز حد يفيدنى فيه لانى داخل على عربيه معرفش فيها حاجه ياريت بعد اذنكم اعرف ايع العيوب اللى هتقابلنى واتفاداها.

يا ريت حضرتك تستعرض مواضيع المنتدى من البداية .. وتشوف أيه الكلام اللي بيتقال .. لأن اللي حيحدد شراء العربية من عدمه هو أنت مش بناء على نصيحة أشخاص .. وأنا على سبيل المثال لا أقدر أني أقولك اشتري العربية الفلانية أو متشرتيش العربية العلانية .. لأن توجيه شخص ما لشيء معين .. أنا بعتبره مسئولية وحمل لا أقدر عليه .. وربنا يوفقك للخير إن شاء الله بعد الاستخارة والاستشارة .

وبصفة عامة مفيش عربية بتخلى من العيوب وكذلك المميزات .. واللي بيحدد الاختيار أن المميزات تطغى على العيوب .. وكل الكلام ده مغطى تحت مظلة أنا عاوز أيه من العربية وهل حتلبي ليا أحتياجاتي أم لا .. وكذلك متنساش الذوق العام والخبرات السابقة المتباينة من فرد للتاني ... هي اللي بتحدد القبول أو الرفض .. فاللي يعجبني ممكن ميعجبكش والعكس صحيح .. تحياتي .