الموضوع: العربية هتجنني

السلام عليكم ورحمة الله وبركاته

انا معايا سكودا فليشيا مو 96 كنت شاريها من سنه .... العربية كان الزيت بيقل فيها تدريجيا بشكل لا يلاحظ الا لما اجي اغير الزيت الاقي الزيت قليل جدا بس قبل كده يبقي في المعدل الطبيعي بس ناقص شويه ..... وكذا واحد قالي ان دخان الشكمان ني (مع اني مش فاهم يعني ايه ني) المهم مهمتمش لان الراجل اللي بيغير الزيت قالي ان الطبة بتاعت الزيت مفوته وهو بيربطها بالعافية ولازم تتعمل عند الخراط ... وانا قلت يمكن الزيت بيقل عشان كده .... المهم قبل رمضان باسبوع كده العربية سخنت جامد جدا وجابت وش سلندر ووقفت خالص لدرجه ان المية اللي فيها خرجت من الشكمان .... وديتها لورشه واحد جارنا غير الجوان وعمل وش السلندر وعمل الطبة بتاعت الزيت عند خراط وغير زيت العربية مرتين عشان الطحينة اللي اتعملت .... اخدت العربية من الورشه قبل رمضان بيومين وبعدين لاقيت المية اللي في القربة بتقل جامد جدا ... كل مشوار المية تغلي وتقل ولازم ازود مية في كل طلعة للعربية ومش عارف المية بتروح فين .... لحد ما في يوم رحت نضفت الرادياتير وحطيت مية خاضرا .... ومن اللون الاخضر اكتشفت المية دي بتقل وبتروح فين ..... لقيت الموتور بينقط مية خضرا من النص ... من عند مسامير وش الموتور ..... وفي مره بقيس الزيت لقيته زايد اوي ... والنهارده لمبة الزيت اللي في التابلوه نورت .

هل دا عيب في الجيوان اللي اتعمل ولا العربية عايزه عمره؟ ولا ايه النظام ؟؟؟ وهل اعمل العمره ولا اجيب موتور استيراد احسن ؟؟؟ وهل غلط اني امشي بالعربية اليومين دول لحد ما ربنا يسهل ويجيلي فلوس اصلحها ولا عادي اني اتحرك بيها؟؟؟؟

ارجو الافاده لاني بجد شوية وهتجن

نفس اللى حصل معايا ونفس الموديل عربيه الله ينتقم من اللى اخترعها كلها مشاكل
بص المشكله كلها عندك فى وش السلندر زى ما كان عندى
اكيد وش السلندرعندك فقفق زى ما بيقول الصنيعيه
لازم تشوف واحد ميكانيكى يكون متخصص فى العربيه دى علشان ما تدخلش فى ميت حكايه فى واحد فى جسر السويس اسمه سيد اسكودا على ما اعتقد الناس بتقول عليه شاطر
ربنا معاك وانصحك تعمل زى ما انا عمات اول ما العربيه تقوم على حيلها بيعها على طول واخلص منها دى عربية سيئه السمعه صدقنى انا مجرب
باذن الله مش محتاج ماتور ولا حاجة
هو ممكن تكون محتاج وش سليندر جديد او مستعمل
وممكن بردو يكون اللى عملك الجوان مش قرط على المسامير كويس
علشان لما بتعمل الجوان بترجع للميكانيكى تانى كمان اسبوع يقرط على المسامير بتاعت وش السلندر علشان تطبع