بعد ما إتعرفنا على ابطال فيلم "هبوط الميجان " و عرفنا السيناريو و أكيد سمعنا الحوارات و بقالنا سنتين تلاتة بنسمع و أخرج هذا الفيلم الرائع شعب مصر الحبيب و اللي بنفتخر إن احنا منه ، دلوقتي جه الوقت نتفرج بقى على الفيلم دة ، تعلو ننزل سوا الصالة و نتفرج (اللي عايز يتفرج بلكون يدفع هو الفرق :D )

لأ بجد تعالوا نقوم بدور مختلف شوية ، نجيب كل المشاكل و العيوب و طبعاً الفتاوي و النكات الظريفة اللي طلعت على الميجان و نحللها تحليل سليم و نشوف هي جت منين و هل هي صحيحة ولا مغلوطة و هل لو هي مشكلة حقيقية في علاج ولا لأ و يكون لينا دور إيجابي كمنتدى في التوضيح و التسليح و المساعدة قدر المستطاع

هنبتدي بالحاجات المشهورة و المنتشرة و بعد كدة اطلب من حضراتكم إن أي حد عنده موضوع جديد (مشكلة أو فتوى أو حتى نكتة ) نطرحه هنا للتحليل و المناقشة

س: سمعنا إن في مشاكل كتير في الفتيس الاوتوماتيك بتاع الميجان (الستيبترونك )، الموضوع دة مزعج جداً إيه مدى صحته ؟

ج: فكرة الفتيس الاوتوماتيك إن في وحدة كمبيوتر (ECU ) ليها حساسات كتير بتتبع حركة العربية ، و أهم حساسين في دول هما سرعة العربية ( كام كم/س ) و حساس سرعة الموتور (كام RPM ) ، السوفتوير اللي على ال-ECU دي لم بيلاقي السرعة بتاعة العربية بتزيد وال RPM بيزيد بيعرف انك بتسرع يعني عايز تزود النقلة أكيد، امتى بقى ينقل ؟ لما يلقي سرعة الغير الحالي عملة تحميل على الموتور و دة بيعرفه من ال-RPM (مثال حضرتك على الغيار الأول و بتسرع وصلت ٣٠ كم/س وال RPM وصل ٤٥٠٠ يعرف إن دة كدة وقت النقل للسرعة التانية و هكذا ) ،طيب امتى يسقط نقلة ؟ العكس تماماً بس نقطة النقل بتختلف يعني في نفس المثال اللي فات لم تكون على التاني و سرعتك قلت عن ٢٨ كم/س أول ما الربم يقل عن ٤٠٠٠ ينقل على طول (خلو بالكم النقطتين مش ذي بعض )
إيه بقى اللي حصل في فتيس الميجان اللي كان فيه نتشة ذي ما بيتقال ؟
اللي حصل إن النقطة بتاعة النقل لتحت في وحدة من النقلات ماكنتش مظبوطة تممن ، بمعنى (على المثال اللي فات ) إن كان بينقل و هو نازل على سرعة 30km/س بس على ٤٥٠٠ RPM و دة كان بيحسس اللي سايق بإن لسة العربية سريعة بس الفتيس نقل و دة اللي كان بيحسس بنتشة في بعض السرعات
طيب الحال إيه ؟.. الحال إن السوفتوير دة يتغير ب-version جديدة تكون فيها النقاط دي متعدلة عشان السواق ميحسش بالمشكلة دي ، و دة اللي حصل ،
التوكيل جاب نسخة متعدلة من السوفتوير من رينو و كان بينزلها على ال-ECU بتاعة الفتيس في كل العربيات اللي اشتكت من المشكلة دي و ببلاش


س: هل في مشكلة في كهربة العربية ؟

ج: ذي ما قلنا في قصة التصنيع و التجميع ، أحياناً الشركة لم بتحب تجمع في بلد تانية بتدور على موردين لبعض الأجزاء من داخل البلد بدل ما تصدرها لحد مكان التجميع (يعني طالما بنجمع في تركيا لو في حاجات بتتعمل بجودة كويسة في تركيا منبعذش من فرنسا و ناخدها من تركيا ) ، دة اللي حصل مع البطاريات ، المورد التركي كان بيورد بطاريات لخط تجميع ميجان في تركيا ، و المشكلة إن كان في لوط بطاريات من اللي إتورد دة كان فيه مشكلة فكانت بتبوظ بسرعة
طب حلوها ازاي دي ؟ .. كل ما حد كان بيشتكي من البطارية بتاعته كان التوكيل بياخدها منه و يديله واحدة جديدة أحسن منها (Varta جافة ) ، و طبعاً ماكنش بيخسر فيهم ، هيلم كل دول و يرجعهم للمورد و ياخد حقه بدلهم طبعاً :D: D

أنا حاسس اني طولت عليكم كدة ، عشان كدة مش هكمل بقيت المشاكل المشهورة دلوقتي ، و هنقولهم شوية بشوية ، و يا ريت اللي عنده حاجات يضيفها يتفضل و احنا نوضحها هنا

شكراً ليكم و تحياتي