الموضوع: حيرة شديدة

المشاركة الأصلية كتبت بواسطة ramymt

السلام عليكم ورحمة الله وبركاته
انا باذن الله كنت نويت اشترى عربية جديدة وكنت عملت اكتر من موضوع فى اكتر من قسم من اقسام المنتدى كنت بطلب فيهم اراء بعض الاخوة فى هذه السيارات
لغايه امبارح رحت معرض كيا مع احد اصدقائى وهو كان عارف انى كنت ناوى على عربية جديدة وكنت عايز عربية كبيرة وعائليه
فقالى اتفرج على كيا كارينز وركبتها وفعلا لقيتها واسعة وكبيرة بس كنت بسمع عن العربية دى انها سحبها وحش اوى وواطيه على الارض وفيها مشكلة فى العفشة مع خلوها من وسائل الامان كالايرباج وabs و ebd مثل بعض السيارات الاخرى
فكنت اتمنى من الاخوة الافاضل اللى راكبين كارينز او جربوها انهم يفيدونى فى بعض النقاط مثل
1-سحب العربية
2-مشكلة ان العربية واطية
3-مشكلة العفشة
4-توكيل كيا ومدى استجابته مع العملاء
واخيرا هل العربية ككل صفقة رابحة ام لا مقارنة بسعرها وامكانياتها
اسف على الاطالة واتمنى من الله ان اختار الاختيار الصحيح بناءا على ردود حضراتكم وتجاربكم
والسلام عليكم ورحمة الله وبركاته

أخى الفاضل - تحياتى لك و تفضل اجابتى على اسئلتك السابقة
1- سحب العربية
حضرتك لو كنت من هواة السحب وخلاف ذلك انصحك بصرف النظر عنها
بالرغم من ان سحبها ليس بهذا السوء ولكن سحبها من الممكن ان يكون مرضى لأشخاص كثرين معتدلين فى قيادتهم وأخيرا أفضل تجربة السيارة بنفسك لأن موضوع السحب اختلف من شخص لآخر
2-مشكلة العربية واطية
هى فعلا العربية لو حضرتك محملها بالكامل ممكن تحك فى المطبات ومتنساش طول السيارة ليه عامل كبير
3-مشكلة العفشة
العفشة ممتازة ولايوجد بها أى نوع من انواع المشاكل
4-توكيل كيا
اولا" مسمعتش عن عربية كارينز بها مشاكل واعتقد ان المشاكل فى التفقيل الكورى عمتا شبه منعدمة وتعامل دائما مع التوكيل حتى 10 ألاف كيلو اطمن ان العربية تمام مبرحش التوكيل تانى وتحاول اعتمد على اشخاص اثق فيهم إلى حد ما
ولعلم حضرتك واتحدى ان تقريبا جميع التوكيلات فى مصر على نفس المستوى ولاكن احياننا تصادف اختلاف طفيف من شخص إلى آخر والموضوع كله ارزاق واهواء

واخيرا أقولها لحضرتك بمنتهى الآمانة نعم العربيةصفقة رابحة نعم صفقة رابحة
اولا" العربية فيا ميزة غير متوفرة فى أى عربية فى مصر بالسعر ده واتحدى للمرة الثانية فى هذه المداخلة الا وهى وسع العربية ككل ووسع حقيبتها وايضا اماكن تخزين اسفل الحقيبة حاجة تحفة
ثانيا" وبكل أمانة الكارينز هى السيارة العائلية الأولى فى مصر بالسعر ده

المشاركة الأصلية كتبت بواسطة ramymt

الف شكر لاهتمام حضرتك
وياريت حضرتك تقولى ايه اخبار استهلاك البنزين واخبار الثبات وحضرتك ايه اكبر سرعه جبتها بالعربية وكانت ايه استجابه وثبات العربية فيها وهى كويسة فى الملفات على سرعة ولا لاء
وسحب العربيه مع التكيف بيكون صعب اوى ولا مقدور عليه

استهلاك البنزين متوسط والثبات مثل العربيات الفان تختلف عن السيدان ولاكن للأمانة مرضية واكبر سرعة تخطيت 160 للتجربة ومعظم سفرى كان 140 كم / ساعه طريق مصر السويس محملة بالكامل وتشغيل التكييف بصفة دائمة وبدون أى مجهود وممكن ناس كثيرة من مالكيها يؤكدوا الكلام ده وسرعتها مع التكييف لايقلق على الإطلاق الناس مصنعين العربية مش عملين عربية بالشكل ده علشان يعزبوك بيها وعلم حضرتك بعد امتلاكى للعربية ديه لأكثر من عامين مازلت معجب بيها حت الآن وكفاية انتشرها المزهل يطمئن جدا ومتنساش الإستخارة ووفقك الله

المشاركة الأصلية كتبت بواسطة ramymt

ربنا يبارك فيك ويحفظ لك عربيتك
انا والله ابتديت اقتنع من كلام حضرتك عن العربية بس انا المشكلة ان الاختيار اللى قبلها كان نيسان صنى الجديدة فالناس بتتكلم عن وسعها وانا فعلا ركبتها هى واسعه بجد وموفرة فى البنزين عشان 1500 سى سى وثباتها حلو اوى مع وسائل الامان الكتير طبعا ولكن فقيرة جدا فى شكلها و خاماتها
فالفكرة انى كنت بسال عن الكارينز لانى هزود فلوس وخايف تكون اقل من الصنى فى التسارع والثبات
وانا اسف لو تعبت حضرتك معايا

طبعا الكارينز تتفوق شكلا وموضوعا بكثير وفئة ثانية خالص و من المجحف ان تدخل فى هذه المقارنة
انت عرفت مميزات وعيوب الكارينز ومفيش عربية كامل من كل شئ لازم شئ على حساب شئ أخر ولاكن بالمقارنة بالقيمة المادية تلاقى كارينز صفقة رابحة بإذن الله