عايز اروح جامعة طنطا من القاهرة

**greenday** · 03-09-2012 06:35 PM

انا عايز اروح جامعة طنطا من القاهرة اركب ايه بالظبط والطريق بياخد قد ايه تقريبا ياريت لو حد يعرف يفيدنى

**Yasser.Essam** · 05-09-2012 05:16 AM

هو تروح طنطا سهله

بتركب عربية طنطا من موقف عبود واما توصل إن شاء الله هناك تسأل على الجامعه لأن ده اخر علمى

والله اعلى واعلم :)

**hplv** · 05-09-2012 08:13 AM

بص يا سيدى انتا هتركب اى مواصلة من القاهرة وهتنزل هناك فى الموقف اى كان اسم الموقف هتاخد تاكسى ب 3 جنيه (ممكن اكتر من حد يركب معاك التاكسى هما نظامهم كدا ) وتقوله عايز اروح مبنى الجامعة وهوا موجود فى شارع اسمه شارع البحر والمسافة بين الموقف وامبنى الجامعة صغيرة بس المشكلة فى الزحمة يعنى هتاخد بتاع ربع ساعة ومن مصر لطنطا حسب الزراعى ممكن ساعة الى ساعة وربع (ولو انتا عايز تروح كلية فكليات طب وصيدلة واسنان برده فى شارع البحر بعد مبنى الجامعة بشوية وهندسة فى حتة تانية وتجارة وباقى الكليات متوزعين )
واى سوال لحضرتك انا موجود

**virus2007** · 11-09-2012 02:39 AM

الموضوع سهل وبسيط

اولا عندى سؤال: انتا رايح كلية اية؟ بسالك السؤال دا لان الجامعة منقسمة على تلت مناطق
1- المجمع الطبى " كليات صيدلة وطب وعلاج طبيعى وخلافة " ودا فى شارع البحر
2- المجمع العام فى سبيرباى ودا فية هندسة وحقوق واداب وتربية رياضية
3- كلية تجارة ودى فى شارع الحلو او شارع سعيد

عندك تلت حلول

1- تركب قطر مكيف من القاهرة لطنطا وتنزل محطة طنطا وتركب تاكسى تقولوا على اسم الكلية

2- تركب سوبرجيت مكيف من عبود او من التحرير ولما تنزل طنطا تركب تاكسى وتقولوا على اسم الكلية بردوا

3- تركب ميكروباص ال 14 راكب من عبود او من رمسيس ادام محطة القطر ولما تنزل طنطا تركب تاكسى وتقولوا على اسم الكلية بردوا

اتمنى اكون افدتك

وتحياتى ليك