الموضوع: مقارنة بين صني 2013 وبرتون بيرسونا

السلام عليكم

بعد البحث كثيرا فى الموضوع...
وتجربة السيارتين على الطبيعة.....

اشتريت البرسونا
والمميزات اللى اشتريت عشانها البرسونا...
1- عوامل الامان فى السيارة واللى بتحمى المقصورة فى اى حادث
2-الثبات الخرافى فى الطوالى والمنحنيات....وبسم الله ماشاء الله باخد ملفات على 100 بس بشرط الاسفلت يكون كويس
3- السحب والتسارع الرهيب (موتور جبار) والعفشة الرياضية من شركة لوتس والتعليق النالتى لنك
4-الشكل الجميل والشنطة الواسعة
5- التقفيل الماليزى احسن من المصرى فى رأيى

والعيوب اللى تقبلتها
العفشة ناشفة قليلا (يعنى عشان رياضية زى مابيقولو) والدركسيون اتقل من الصنى (انا كنت بسوق لادا باور والاتنين طبعا احسن من باور اللادا.)....واستهلاك البنزين اعلى من الطبيعى (يمكن عشان لسة ماعديتش الف ونص كيلو متر)وبيقولو بيتحسن على 5000 كيلو......هو حاليا 9 لتر لكل 100 كيلو (وعلى فكرة حاسبه صح مش بكمبيوتر الرحلات)....وموضوع ان مافيش ولاعة ولا طفايات (انا مابدخنش اصلا)

والحاجات الزيادة اللى انا مستمتع بيها حالياً...
الفوانيس الليد جامدة جدا وشكلها خرافى......ومثبت السرعة (اختراع يا كوتش)......والكاسيت فيه يو اس بى (يعنى ترزع فلاشة 16 جيجا عليها كل الاغانى اللى سمعتها فى حياتك) وعلى فكرة باقلب الاغانى بالمالتى فنكشن اللى فى الطارة (مش موجود فى الصنى) والسماعات اكتر من ممتازة بس انت تظبط الاكواليزر....غير الليدات اللى فى المرايات

ورأيى فى الصنى
عربية محترمة

مميزاتها
واسعة جداًًً واكتر من البرسونا بحبه حلوين
اسمها يابانى (حتى لو متقفله فى مصر اكيد هتبقى كويسة)
استهلاك بنزين اقل (موتور اقل)
عفشة انعم (بس مش اثبت)
بها عوامل امان زى البرسونا
المروحة اللى بتوزع الهوا للخلف
القعدة فى السواقة اريح من البرسونا (بس البرسونا مش وحشة برضو)

عيوب الصنى فى رأيى
عيب المساعدين الخلفى اللى ظهر عند قليل من الناس فى البداية (وكان موجود فى العربية اللى جربتها بتاعت جوز اخت مراتى)
السحب اقل من البرسونا
الكاسيت اوحش
الكاوتش ماكسيس
حاجة خدت بالى منها لما ركبت العربيتين الرؤيا عبر الزجاج الامامى احسن واوسع قليلا فى البرسونا عن الصنى
واخيرا الشكل مش عاجبنى(ازواق)
حاجات ممكن ناس تشوفها عبيطة وتعتبر اقرب للغرائئز عند ناس تانيين

ان البرسونا احساس التميز...ازاى؟؟؟؟؟
يعنى تبقى ماشى بعربية مش موجودة مع اى حد ومن احلى العربيات اللى نزلت والناس فى الشارع يبوصولك واللى فى الشغل يعاملوك بشكل مختلف (اكمنى كان معايا لادا يعنى) والا الثبات فى المنحنيات والغرز ....ومثبت السرعة
واى عربية شايفا نفسها على الطريق بيبقى صاحبها عاوز يسابقك ولما يستفزك تعلم عليه فى السرعات
غير كدا معظم اللى بيركبها مستويات يعنى مش هتلاقى جزار او طعمجى او سباك راكبها ....ودا مع احترامى لكل الناس طبعاً

وبالنسبة لموضوع التوكيل
معظم الناس بتشتكى من توكيل البروتون بس اللى انا شايفه ان كل الناس مشاكلها بتتحل وعلى يدى لما واحد اعرفه اسمه على يوسف كان عنده مشكلة فى موتور الساجا تم تغييره بالكامل واخد عرض على الصيانات مجانا وعلى يدى كمان تم تغيير المساعدين لمعظم الناس اللى بيشتكو منهم فى الساجا....يعنى التوكيل بيحاول يحسن من نفسه
وعلى العكس على يدى برضو عربية جوز اختى صنى الشكل القديم وبيشكر فى العربية وبيشتم فى التوكيل ليه...عشان راح عملها سمكرة ودوكو عندهم وطلعو اللون غلط (مع ان كل لون بكود) وماظبطوش الموضوع الا بطلوع الروح دا غير انو لما بيروح التوكيل بيستنى كتير لو مش حاجز (على فكرة هو اللى بيشتكى من كدا وانا شايف ان عادى لو مش حاجز صيانة اكيد هاتستنى) دا غير القلق بتاع المساعدين لما حب يغيرهم قبل العشرتلاف والكلام دا من سنتين
وارجع افكر الناس عربيتو الشكل القديم مش الصنى الجديدة
وبخصوص قطع الغيار اكيد الصنى هتبقى منتشرة اكتر لكن البرسونا برضو منتشرة عشان هى نفسها قطع غيار الجين تو

وارجع واقول لازم ياباشا تركب العربيتين وتسوقهم كمان وتستخير ثم تتوكل على الله

اه نسيت

انا مابعتبرش الاكسنت الاربى عربية اصلا..عشان لو حبيت تجيبها بسعر مقارب لل100 الف هتبقى من غير امان ولا فرامل ايه بى اس ولا ايه بى دى .....ولو اعتبرت الحاجات دى اساسية هاتكع كتير ....دا غير انها مش اوسع ولا اعلى ولا امتن ولا اثبت

وفى النهاية لو عاوز عربية تخدمك فى السرعة والثبات والغرز والشد وعائلية يبقى البرسونا
ولو عاوز عربية تخدمك اقتصاديا فى البنزين و قطع الغيار _على اعتبار انها هاتنتشر_ وعائلية جدا برضه يبقى الصنى

والسلام عليكم