موضوع جميل و مهم عند استلام اى سيارة جديدة
المهم احكيلكم قصتى مع نيسان الشكل الجديد ، اللى اول ما اشتريتها كنت طاير من الفرحة و مزقطط على الاخر اصلى كنت راكب فيات و كان طلعان عينى مع انها اول استخدام ليه (اول يد) ودفعتت يا جماعة 107 الف جندى مجند و قلت الراحة مش ببلاش والغالى تمنه فيه
وجه يوم استلام السيارة بعد حجز مدة 10 ايام وده الصراحة مدة مش طويلة خالص على اللى بسمعه ، المهم استلمت نيسان صنى ان 17 اتوماتيك برونز بفرش اسود و تممت على الحاجات اللى متقاله فى صدر الموضوع و الدنيا ربيع و الجو جميل وكله حاجه تمام التمام ......امال فين المشكلة؟؟؟؟؟؟؟؟؟؟؟
لما اخدت السيارة و روحت كانت ناعمة جدا وعافشة مية مية ماعدا حاجه واحدة سمعتها لما عديت ال80 وداخل على التسعين سمعت صوت عالى جدا وده كان قبل ما اوصل البيت ب2 كم بعد ممشيت بيها 15 كم بس ما كنتش جبت ال 80 بسبب الطريق زحمة و ما سدقت الطريق فضى و شديت و سمعت اللى قولتلكو عليه
بصراحة الدنيا اسودت فى عينى و اغمقت وزعلت جدا
بقى انا دافع فلوس الشئ الفلانى علشان اشترى حاجه بايظه يا سوادى ،وقلت فى نفسى الموضوع بسيط و هيتحل على طول مسمار سايب و الا حاجة او على اسوا تقدير بلية بايظة والا حاجه واتصلت بمسئول المبيعات و قلتله على الصوت اللى سمعته و قالى دى اول مرة اسمع الشكوى دى تلاقيك كنت رافع الهاند بريك و الا حاجة على اساس انى اول مرة اسوق قلتله ماشى على ما اشوفك و استلم ورق السيارة نسمعه و نصلحه
لو مهتمين بالموضوع قولولى علشان اكمل