الحمد لله استلمت الصنى امبارح الخميس بس فضلت مستنى من وقت ما وصلت التريلا بتاع 3 ساعات لغاية ما العربية اتغسلت و اتركبلها الطاسات و الورقيات تخلص
فنصيحة للى عاوز يستلم ما يروحش علطول أول ما تيجى العربية يديهم فرصة يظبطوا نفسهم

أنا كنت حاجز اللون البرونزى و فرش بيج . لون الفرش جميل مع لون العربية بس المشكلة انه فعلا بيتوسخ بسرعة جدا
الغريب فى لون العربية انى كنت شوفته بالنهار فى المعرض كذا مرة لكن امبارح و العربية واقفة فى الشمس برة المعرض تشوف اللون مع انعكاس الضوء كأنه رمادى ميتالك تحس اللون بيتغير مع الضوء يمكن لان اللون البرونزى فى الكتالوج اسمه Brownish Gray

وأنا بأكد على معلومة ان البطارية أصبحت جافة

نيجى بأة لتجربتى مع الأتوماتيك
\"؟

بالنسبة للأعضاء اللى زيى اللى كانوا متعودين على المانيوال و قلقانين من سواقة الأتوماتيك
أحب أقولهم مفيش أسهل من كده
وأنا بأريح دماغى وبأشتغل السهل دلوقتى و ربنا يسهل بعدين لما الواحد ياخد على العربيىة
أنا بأجيب على الـ D وبأخف رجلى على الفرامل علشان أطلع ولما بأحب أغير الجير بأقف خالص الأول و بعدين أجيب الـ N فى حالة التوقف فى إشارة أو الـ P فى حالة الركنة وبعدها بأشد الهاند بريك فى الحالتين

أحلى حاجة فى الأتوماتيك انك مش شاغل نفسك غير بالدريكسون و الطريق و رجلك مرتاحة
ولو الدنيا بطيئة صباح الأنتخة بأة لانى كنت بأشيل رجلى من على البنزين و الفرامل و العربية بتمشى لوحدها و طبعا بأكون مستعد برجلى اليمين تحتهم وفى الزحمة بأستعمل الفرامل بس
و طبعا نخلى بالنا فى الأول ان مفيش دبرياش
و حاجة تانية غلطت فيها فى الأول كنت بأضرب فرامل لقيت رجلى جابت دواسة الفرامل و البنزين مع بعض بس ربنا ستر الحمد لله


حاجة جديدة بقى عرفتها ان فى زرار جنب العصاية اسمه شفت ده بيستخدم لو فى حالة عاوز تسيب العربية للسايس بدون المفتاح يزقها للامام و الخلف كان فى فيديو على المنتدى بيشرح الطريقة بس اعتقد الطريقة فى النيو صنى اسهل والطريقة هى
1- الفتيس على الـ P
2- المفتاح معاك فى ايدك برة الكونتاكت أصلا يعنى
3 - نضغط زرار شيفت جامد لتحت
4- نضغط لوك العصاية و ننقل الى الـ N

بس خلاص
وأعتقد دى مختلفة عن الفيديو لان كان بيشرح و المفتاح فى الكونتاكت و انت بتضغط فرامل تقريبا بتعمل حاجة معينة مش فاكرها علشان تطلع المفتاح

مرحلة الاستلام
نيجى بأة لمراحل الاستلام هأقولكم اللى حصل معايا
1- فى الأول تم الاتصال بى للتأكيد على انى هأستلم العربية و طريقة الدفع والتأكيد على اللون
2- كذا مكالمة لعرض ألوان أخرى على و لكنى رفضت وأصريت على البرونزى
3- تم إبلاغى يوم الثلاثاء بوجود اللون المطلوب فى المخزن بالقاهرة و انها هتيجى بالتريلا الخميس
وإن العادى الورق يجيى بعدها بيومين يعنى على الاحد او الاتنين لان المصنع اجازة جمعة و سبت ولكن إذا دفعت يوم الثلاثاء أو بالكتير الاربعاء قبل الضهر ممكن يجيى ورقها معاها بس برضه مش هألحق أرخص الخميس بس كده هيكون ورقها طلع من المصنع فأقدر أرخص السبت ان شاء الله ادعولى
4- دفعت يوم الاربعاء كامل التمن بالاضافة الى مبلغ رمزى كرسوم اعتماد للورق بالمرور
5- العربية وصلت الخميس بعد الضهر فطبعا روحتلهم فى ساعتها بس للأسف قعدت حوالى 3 ساعات مستنى طلتها عليا لانهم كانوا بيغسلوها و بيخلصوا اجراءتها المهم استلمت العصر بس كان الورق لسه ما خلصش على وعد آخده السبت الصبح علشان أرخص ان شاء الله

للأسف وقت الاستلام مش عارف مركزتش مع انى كنت طابع ورق بنقاط الاستلام بس الدنيا كانت زحمة و كنت صدعت و عاوز آخد العربية أروح بيها فما استلمتش زى ما بيقول الكتاب بس عملت اللى افتكرته بسرعة

اللى حابب يسأل أى سؤال يتفضل أنا تحت أمره

بس أنا كنت قلقان من حاجة ان العربية حاليا مفيش عليها حتى نمر تجارية و أنا مش معايا اى حاجة تثبث ملكيتى للعربية اللهم الا صورة محضر استلامى للعربية و دلوقتى عندى مشوار عائلى ضرورى و نفسى آخدهم بالعربية الجديدة فمش عارف ايه رأيكم عادى أطلع بيها على البحر فى اسكندرية وقت المغرب كده و لا ايه ولو ظابط وقفنى أعمل ايه و لو فى حد نزل النهاردة على البحر يطمنى ايه الأخبار فى مرور و لا مفيش لان الجمعة اللى قبل اللى فاتت كان فى حملة مرور قبل الصلاة بطول الكورنيش كله لقيت كل اللى راكن على البحر من كامب شيزار للمنتزة مكلبش و أوناش بالهبل و كل الدوارانات على البحر تلاقى عليها ظابط قافل الطريق جوا الدوران و بيشوف رخص كله و بعدها المرور نام تانى وصحى الاسبوع ده شوية
فايه رأيكم شباب و لو وقفنى ظابط عادى و لا ايه
وكمان ليا واحد صاحبى حذرنى قالى ما ينفعش تروح ترخص فى المرور من غير ما يكون عليها نمر تجارية

طب حد يعرف حد بيأجر نمر تجارية فى اسكندرية و بكام

الموضوع ده تم عمله اليوم بعد الضهر
لكن واضح انه اتمسح لما رجعوا بكب المنتدى لما وقع النهاردة
بس أنا الحمد لله كنت عامل كوبى من الموضوع علشان أنسق فيه براحتى