بسم الله الرحمن الرحيم


سلام عليكم يا أحسن صقور ... ويارب تكونوا جميعاً في أحسن صحة وحال


فكرت اسافر اسكندرية اقضيلي يومين وهي بتفضى ... والحمدلله كانت رحلة موفقة

وفي نفس الوقت كانت ليا تجربة مع العربية أول ماجبتها وكنت سافرت بعد صيانة الألف ... وحكيت عن التجربة هنا http://www.nilemotors.net/Nile/304455-180.html


لكن المرة دي حبيت اعرف ازاي صيانة الـ 5000 بتفرق ... وفي نفس الوقت نعرف الاستهلاك الفعلي الطبيعي للبنزين على سرعة مظبوطة (100 كم ساعة).... وصورت العداد بعد كل عملية علشان اعرف هاتعمل معايا كام في تفويلة التانك الواحدة (41 لتر).


البداية كانت من 6 أكتوبر, فولت التانك وصفرت عداد الرحلات وتوكلت على الله, الساعة كانت 9 صباحاً ودرجة الحرارة كانت معتدلة

السرعة كانت لا تزيد عن 100 طوال الطريق, من غير حرق زيادة, وعدد الركاب كان انا وشخص تاني ... وماكانش معانا شيل كتيرة ولا شنط تقيلة.... والسير كان عكس اتجاه الرياح


بعد ماوصلت اسكندرية (بناءً على نصيحة زميل ليا -ربنا يسامحه- خدت الطريق الدائري بتاع اسكندرية , قال إيه علشان انزل على المندرة على طول من غير زحمة الكورنيش, واتضح ان زحمة الكورنيش أرحم وأفضل من بهدلة العربية بالشكل ده على طريق مدقدق مبهدل حالته كرب وفي النهاية تدخل الطريق الزراعي ثم الطريق الدولي ثم تلاقي نفسك في الآخر عند سيدي جابر !!!! ) .... طبعاً كانت المسافة زادت ودخلت وسط زحمة عجيبة ومشيت فوق حصى ومدقات وأسفلت عادي وإشارات ... بعد ماوصلت كانت قراءة العداد كما في الصورة

بعد كدة قررت اركن العربية واقضي اليومين مواصلات لأن اسكندرية مش كبيرة قوي ومواصلاتها أرحم من القيادة فيها !!! بعد يومين توكلت على الله وقررت ارجع وكانت قراءة العداد كما في الصورة قبل ماطلع




وكما في الصورة كانت البداية سبعة إلا ربع صباحاً , الجو كان جميل ومش حر , وكانت السرعة لا تزيد عن 100 , نفس اتجاه الرياح وبنفس وزن وعدد الركاب في رحلة الذهاب , وبحمد الله وصلنا أكتوبر وكان استهلاك البنزين وعداد الرحلات كما في الصورة



ولما خليت كومبيوتر العربية يحسب البنزين المتبقي يمشيها كام كيلو ... كانت النتيجة كالتالي:




عن نفسي ... مش هاعمل أي حسابات هنا لمعدل الاستهلاك اللي حصل , الصورة تتكلم وكل واحد يقول هو شايف العربية كدة بتعمل كام


مع ملاحظة اني كنت مشغل التكييف على سرعة 1 طول الطريق.


على الهامش: أرجو من السادة مالكي صني الجديدة توخي الحذر على السرعات فوق 100 , العربية خفيفة وثباتها مش عالي زي عربيات تانية (جيتا - رينو فلوينس - صني 2011) ... والحذر لازم يزيد مع دخول الخريف والشتاء ولازم يكون حذر شديد وقت الخماسين , لأني كنت باحس ان العربية هاتخرج عن مسارها لما أوتوبيس يعدي من جنبي, أو اعدي من جنب شكمان مقطورة على سرعة 100, بس كدة كدة لازم ماتاخدش رد فعل وتسيب العربية ترجع لاتزانها بنفسها, التحذير هنا من الشعور بالمفاجأة أو اتخاذ رد فعل مبالغ فيه


وربنا يسلم طريقنا جميعاً ويرزقنا الصحة والستر والسعادة في الدنيا والآخرة , وأرجو ان الموضوع يكون مفيد لكم جميعاً