مساعدة c180

**spero** · 02-07-2008 08:06 PM

السلام عليكم والله كنت محتاج شوية معلومات عن c 180 عاوز اعرف اية احسن سنة يعني في ناس قالولي هات 2000 يعني لو حد يساعدني يكون بيفهم في المرسيدس عشان انا مفيش اي معلومة عنها خالص انا كنت بفكر اغير عربيتي وكنت هجيب هيونداي كوبية بس الناس قالولي ان ممكن اجيب c180 بس قديمة شوية واحسن بكتير لما ارمي فلوسي في كوبية ومش هتتباع بيعة كويسة والكلام دة فا انا محتار بصراحة وياريت لو حد يساعدني يقولي مميزتها عيوبها واحسن موديل ليها وبتعمل كام في الصفيحة لو امكن, واية نظام قطع الغيار والكلام دة وانا اتعشم ان حد يقدر يفيدني في الموضوع دة وياريت لو يقدر يقلي سعرها هيكون في حدود كام يعني عشان ابئا فاهم .

**mohamed ibiza** · 03-07-2008 04:31 AM

انت قصدك عل انهي c180 و عموما لو عايز حاجة محترمة بجد هات موديل 2000 بس تاخد في اعتبارك ان الموديلات دي كلا قطع غيارها اسعارها ولعة ولعة ولعة ده كلام عبده سالم تاجر قطع غيار بنز بس في شارع مراد انا بجيب من عنده حاجة ال 280 لو عايز حاجة سعرها معقول و عربية رهيبة بجد بجد فكر في ال 280 زلطة صاج الكل بيخاف منه موتور وحش 2800 سي سي 2 كامات انجكشن عزم 220 نيوتن 6 سلندر 177 حصان انا بحضر موضوع ان الاداء و استهلاك البنزين قريب هينزل بس لو عايز ال c180 و تقدر تتحمل اسعار القطع اتوكل علي الله

**spero** · 03-07-2008 11:00 AM

اولا شكرا يا باشا علي اهتمامك هوا فعلا الناس كتير رشحولي موديل 2000 المشكلة كلها يا ابو حميد ان انا مش راجل كبير يعني فا انا قلت يا واد بكرة هتكبر مش مهم والعربيات المرسيدس تمنها فيها والكلام دة انا الاول كنت هجيب كوبية بس الناس خوفتني ومتتبعش ولو بعتها بتخسر والكلام المحبط دة فا واحد كدة قالي طيب متجيب مرسيدس c 180 وتمنها مش غالي اوي بس اول حاجة جت في دماغي البنزين وقطع الغيار والصيانة بتاعتها والكلام الحلو دة فقلت اسأل لان انا خبرتي ضعيفة اوي في المرسيدس طيب لو تعرف معلومات عنها مميزتها عيوبها كدة قلي ربنا يكرمك ولو تقلي رينج سعر ليها يبئا انتا كدة خدمتني وشكرا تاني علي اهتمامك

**mohamed ibiza** · 03-07-2008 12:59 PM

بص يا باشا انا مش دايس اوي في المرسيدس لاننا لسه جايبين ال 280 قريب اوي انا اختصاصي هنا فولكس جروب بس هقولك اللي اقدر عليه اولا البنزين العربية 1800 سي سي انجكشن طبعا 4 سلندر مش هتاخد بنزين بالدرجة اللي الناس مصورهالك انا عندي في ال 280 اعدوا يقولولي هتفولها كل يوم و بتاع العربية طلعت بتعمل 250 كيلو في 25 لتر بنزين 90 جوا المدينة و ده رقم كويس جدا جدا علي موتور 2800 6 سلندر تاني حاجة متجيبش هيونداي كوبيه دي اصلا طالما فكرت في المرسيدس يبقي انت كده عليت جامد متنزلش اوي كده ايه الكوبيه جنب الالماني و جنب المرسيدس تحديدا ولا حاجة يعني عربية ملهاش ذكر خالص و اكبر عيب في العربية دي اسعار القطع التاجر بيقولي الموديلات الجديدة دي فوق سنة 2000 اسعارها ولعة و الصاج طبعا مش زي الاول يعني انا بال 280 تمشي عنتر زمانك هههههه اي حد بيفكر يريح عليك اعرف انه خسران خسران هيطبق و يروح بيتهم حزين مدمر و العربية تتحول كفته انما ال c180 تمشي بحذر و تاخد بالك لان صاجها عادي مش صاج شديد اما السعر انا بشوف ال e200 موديل 2000 اللي هي العيون بتلعب في 200 الف 220 الف كده ال c180 هتبقي اقل طبعا لانها اقل حجم و موتور و فئة بس مقدرش افتي في السعر لاني مش عارفه

**spero** · 03-07-2008 02:13 PM

والله الواحد مش عارف يقلك اية بس الف شكر انا عارف ان العيون حلوة بس غالية اوي مش هنفع بأي حال من الاحوال الا لو سرقت البنك المركزي فا لو ليك سكة نسرقة سوا والنص بل النص ونعمل عربية سبيشل اوردر . علي اي حال ربنا يقدم اللي فية الخير شكرا يا باشا ومبروك علي العربية الجديدة

**mohamed ibiza** · 03-07-2008 05:40 PM

لا شكر علي واجب يا باشا الله يبارك فيك:):)

اما موضوع البنك ده لازم كل اعضاء المنتدي يتحدوا فيه مش احنا بس و الا هنتأفش هههههههه

**spero** · 04-07-2008 02:01 PM

شكلك دي مش شغلتك وقلبك خفيف انا هعمل العملية دي لوحدي ياعم وانتا لو جبت سيرة هبلغ انك اللي حرضتني وغرغرت بيا

**shamstec** · 05-09-2008 03:59 PM

c 180
98 لحد 2001
سعرها من 90 الى 110
والله تعالى اعلى واعلم
الجرايد خصوصا الوسيط فيها السعر والموديل
2001 بالذات ممكن تكون غاليه عشان فلاشر المرايه ( ليس له اى قيمه حقيقيه )