بسم الله الرحمن الرحيم

تحيه طيبه علي كل اعضاء المنتدي الكرام وبعد...
دي عاشر مرة اكتب التقرير والكهربا تقطع
حاجه تقرف
وقلت ما بدهاش بقي يا واد يا ميدو
رحت جاي مطلع اللاب من الكرتونه وبعيدا عن اعين اخوتي الصغاااااار
اللي لو شافوه مش هيرحموه
ما علينا
...
بص يا باشا انت وهو ومن الاخر وعلي ميه بيضه

العربيه هنتكلم فيها عن الامكانيات والكماليات والشكل الخارجي والداخلي والاداء والمميزات والعيوب
علما بان العربيه بقالها معايا تقريبا شهر وعامله 3000 كيلو يعني برضه لسه مش قادر اجكم عليها بنسبه 100% خصوصا ان ناس كتير بتقول ان اداء العربيه بيفرق بعد اول صيانه وانا لسه ما عملتهاش لانها علي 5000 كم


اولا :: الشكل الخارجي


تقدر تقول شياكه فخامه شبااااااب عظمة الالماني وان كان شكلها من

ورا مش داخل دماغي اوي يعني




المقصورة الداخليه ::
طبعا شياكه وفخامه وجميله ممكن ما تكونش بنفس شياكة الريو او عربيه كوري ولكن بصراحه الخامات
وانا لا تغرني الطيالس والحلي ....كم في الطيالس من سقيم اجرب
مع الاعتذار لكل ماركات الكوري جميعا جميعا اسف يا جماعه حاولت اضغط علي نفسي واشتري حاجه كوري الفلوس ما رضيتشش تدفع فيها ........ ما قدرتش كان نفسي والله بس مش بايدي

دي صور للمقصورة الداخليه بس ما فيش عندي اللون الاصفر اللي في الهوايات ده




.........................
التجهيزات ::
العربيه فيها كل اللي نفسك فيه
العربيه بتنزل فئتين انا معايا الهاي لاين
2 ايرباج . فرامل ABS .وفقط . كاسيت اسطوانه واحده باور مثبت سرعه جنط 17 فتحة سقف وطارة مالتي ولو افتكرت حاجه تاني هكتبها اه زجاج امامي فقط كهربا .. انوار نهاريه وفوانيس شبورة اماميه وخلفيه

العربيه ما فيهاش حساسات ركن ولا حساسات مطر ولا حساسات نور

....
بالنسبه لوسع العربيه فانا عموما بركب فيها لوحدي والعربيه من بره تحس انها صغيره ولكن قعدتها من جوا مريحه لحد كبير صحيح برضه لا تزال صغيرة ولكنها مش وحشه ابدا وهي مناسبه لشاب في بداية حياته او اسرة صغيرة لكن لو اسره كبيرة الوضع هيكون مختلف

.........................................
الاداء :::
بصوا يا جماعه انا كنت راكب قبلها كورولا 2008 وبصراحه الكورولا دي محترمه جدا جدا جدا بغض النظر عن مشكلة الفتيس وكنت في البدايه بقارن بيها كاداء موتور وتكيف وحاجات كتير لقيت نفسي هتعب نفسيا فبدأت اسال اصحاب الالماني
عموما يا باشا
العربيه مزوده بموتور 1400 سي سي يولد قدرة حصانيه 100 حصان في حالة تزويده ببنزين 95 وعزمها شديد مش فاكره بالظبط
الفتيس اتوماتيك عادي خالص 4 سرعات
.............
كاداء العربيه اداءها مش اللي هو مرضي لشاب بيحب الجري والشد لان الموتور 1400 سي سي ولكن هو اداء معقول كنت اتمني يكون فيها زرار سبورت للقياده الرياضيه ولكن للاسف الحلو ما بيكملش ..................................
التسارع من 0 الي 100 في 12 ثانيه
اقصي سرعه .........دي بقي قرفاني لان العربيه سرعتها متحدده بالكمبيوتر علي 165 ودي حاجه مقرفه جدا

الفتيس .
..............
فتيس عادي جدا 4 نقلات ..........الفتيس بحس فيه بكل نقلات العربيه ومعاه شوية حاجات كمان هذكرها في العيوب
.................................................. ......
فرامل العربيه

بصراحه ماشاء الله لحقتني في كذا موقف غير التويوتا خاااااااااااااااالص
.................................................. .
فاضل ايه فاضل ايه ؟؟؟
.....................
العربيه مالهاش صيانه 1000 اول صيانه ليها علي 5000 ومجانيه.............
...................
العفشه بتاعة العربيه ..................
بالرغم من ان الجنط 17 الا ان العفشه ناعمه جدا وخصوصا لو خليت ضغط الكاوتش علي 30
...............................
ثبات العربيه
بصراحه هي ثابته .......... بس مش الثبات اللي كنت متخيله يعني كنت بسمع اساطير عن ثبات الالماني ........ صراحه لما التيوتا كانت زيرو كنت بمشي بيها 170 من غير ما اللي راكب جمبي يحس اني ماشي اساسا ............................
يعني يوم كنت ماشي علي الصحراوي بالكورسا علي 150 وفجاه لقيت العربيه بتروح من الحارة الشمال للحارة اليمين لوحدها ؟؟؟؟؟؟؟؟؟؟؟؟؟؟؟؟
هوب وقفت علي طول باشوف ضغط العجل لقيتة 45 اوووووووووووف
...........................................
صاج العربيه
محمل وتقيل والدي بيقولي دا عيب مش ميزة لان لو يوم نسيت الباب مفتوح نص فتحه ولا جحاجه هيريح معاك
.............
عزل العربيه

جبااااااااااااااااااار
.........................
صوت الموتور

غير مسموع علي ال rpm المنخفض
..............................



العيوب ..................
-------- سعر السيارة مرتفع
-------- قطع الغيار ناااااااااااااااااااااااا اااار بمعني الكلمه
-------- العربيه تقيله والموتور صغير عليها
-------- استهلاك بنزين عالي 10 لتر لكل 100 كيلو علما بان طريقي سفر سريع واتجنب دائما اوقات الزحام
-------- يوم الترخيص العربيه خدت عين محترمه ولبست بلاعه مرتفعه في مقص العربيه اليمين وسمعت اصوات تكسير وبلاوي سوده ويومها اخدت بالي ان العربيه مش مصفحه من تحت وده عيب قاتل
-------- العربيه عاليه عن الارض وما بتحكش في المطبات حتي لو حمولتها كامله .......
-------- العربيه بطاريتها سايله وانا ما اعرفش المفروض اتعامل معاها ازاي وازود ميتها كل اد ايه ولا اخلي التوكيل يزودهالي ولا ايه ؟؟
--------- اداء التكيف مقارنة بالياباني كان غير مرضي لكن تعودت عليه مع مرور الوقت
.................................................. ......................................................
العربيه واجهتني فيها مشكلتين
الاولي ......... يوم كنت بدورها الصبح وفجاه ال rpm قعد يلعب وهوب راح نازل وهوووووب راحت مبطله
طبعا ما عملتهاش تاني بعد ما سخنت وجربتها تاني يوم نفس الوضع فضلت تكركر وبعد كده ال rpm علي تاني بس ما بطلتش ..........رحت عل التوكيل حطها عالجهاز مالقاش حاجه قالي تلاقيها وساخة بنزين طبعا ما اقتنعتش بالكلام نهائي
وقلتله دا اسمه هزار انا مش في ورشه عاديه ... علشان تقولي وساخة بنزين
.........المهم قالي سيبها رفضت طبعا ومشيت فولت 95 وحطيت stp منظف للدورة كلها وبعدها باسبوع لقيتها ظبطت خالص الحمد لله وما فيهاش مشاكل والايدل تمام
المشكله التانيه بقي ودي اللي معفرتاني............
العربيه يوم ما طلعت من المعرض حسيت انها ما فيهاش عزم ادوس بنزين تنعر وصوتها يعلي وما فيش عزم وانا مش واخد علي الالماني ولا اعرف نظمه بس التيوتا كانت بتشم بنزين تطير
المهم علشان ما اطولش عليكم
العربيه في ركنة الجراج عندي مطلع عالي شويه لما كنت بوقفها عليه اول ما جبتها ما كانتش بتتهز دلوقتي بقت بتقعد ترجع لورا وهي علي ال D
مش عارف ده طبيعي ولا ايه لاني جربتها علي كوبري وما رجعتش .........
التانيه ::الفتيس كانت عصايته ناشف اوي كنت بحس انها هتتكسر في ايدي وانا باديها ال D
لكن دلوقتي بقت ناعمه وعاديه
كمان العربيه بين الاول والتاني بحس فيها بنطه كده بين الغيارين دول مش بتنقلهم بسلاسه
بس ما فيهاش رزعه ولا نتشه هي نطه فقط
حاجه اخيرة اكتشفتها امبارح
لو علي سرعة 30 وشلت رجلي من علي البنزين وكبست تاني العربيه بتنتش نتشه مسموعه ومحسوسه ............... العربيه اتحطت علي السكان ..... مش قاريه اي حاجه وما اعرفش دا عادي ولا ايه ؟؟؟؟ يا ريت يا جماعه اي حد معاه العربيه يطمني او يسوق عربيتي ويقولي طبيعي ولا لا ؟؟؟

ولكم خالص الشكر والتقدير
واتمني ان ينال هذا التقرير اعجابكم
تحيه لكل اعضاء نايل موتور الكرام الذين لم يبخلوا علينا بارائهم وخبراتهم وارجوا ان تقبلوني بينكم اخا لكم وعذرا ان كان هناك تقصير في التقرير واذا كان المكان غير مناسب فبرجاء من المشرف نقل الموضوع الي مكانه المناسب