السلام عليكم
ملابسات الحدث:
عربيتى ابيزا 94 مسقط فيها موتور 1.4 انجيكشن APQ اشتريت الموتور بالضفيره من ناحيته بس يعنى نص ضفيره ومن جوه العربيه الضفيره زى ما هى
فضلت انكش وانكش لحد لما وصلت ان الموتور اتركب معاه وحده ايموبلايزر واللى عرفته ان كل المكن الانجيكشن بتاع البولو والابيزا لازم ايموبلايزر عشان يشتغل
ولان الايموبلايزر بييجى مع المفتاح وانا عندى مفتاح عادى فكان الموضوع واصل بلدى بمعنى ان الشيب بتاعه الايموبلايزر اللى المفروض تكون جوه المفتاح ملزوقه
بشريط لحام فوق الريدير اللى بدوره بينقل السيجنال للكنترول عشان الموتور يشتغل
الهدف:
انا عندى مفتاح الكونتكت بايظ وكمان التاره وكنت ناوى اجيب قطمه كامله اوفرلى بس مكنتش عايز اركب القطمه بتاعه ال94
لان شكل الطاره مش عاجبنى ولانى كنت عايز اشغل الايموبليزر اللى عندى لان هبقى مطمن اكتر لو عارف ان لو مين دخل جوه مش هيعرف يدورها
دى صوره للقطمه اللى عندى والزرارين اللى على يمين الطاره كان واحد بيفتح كونكت وواحد دواره
وده شكل من النت للطاره اللى جبتها
الادوات:
مفك صليبه
مفك عاده للظروف
بيبه طويله 13
مفتاح ناحيه وناحيه 13
شريط لحام
كشاف صغير
خطه العمل:
رحت لايمن بتاع عباد الرحمن وفضلت ازهق فيه شويه لحد ما جابلى قطمه محترمه حاله ما شاء بمفتاح عادى بس اللى فيه ايموبليزر وسنتر ولحسن الحظ الطاره طلعت متحركه
واتفقت معاه انه يشيل القطعه اللى فى المفتاح اللى من فوق اللى فيها الايموبليزه ويشيل الريدر كمان مقابل انه يدينى قطعه تشبهها بس مش شغاله لان كده كده انا هحط الايموبلايزر بتاعى فيها
القطمه كامله بدون كابلات خالص ب350 بالعافيه
اخدت القطمه ورحت لواحد صاحبى ميكانيكى عشان نركبها وهو استنى عليا لحد مانا شيلت كل التوصيلات اللى راكبه فى القطمه القديمه الاشارات والمساحات وخلافه وبعدين حليناها مع بعض وخرجناها بره
وهى عباره عن صامولتين ماسكين القطمه لفوق تحت التابلوه ومسمار ماسك المشرشر وزى كلبس بيركب كبس وبيتشال عن طريق ضفر حديد
وانا ركبت التوصيلات على القطمه الجديده عشان اتاكد انها شغاله
بعد كده صاحبى نزل عند اخر القطمه لقى صاموله ماسكه المشرشر ركبها فى القطمه الجديده وبعد ما كنت مركب الكونتكت على زراير وعك بقت شغاله على المفتاح عادى كل ده وانا لازق الشيب اللى معايا فوق الريدر عشان العربيه ترضى تدور
بصراحه انا ذاكرت القطمه وتوصيلاتها كويس جدا من المانيوال قبل ماعمل اى حاجه وكنت الى حد كبير عارف انا بعمل ايه مع ان ابو صاحبى قاللى روح لكهربائى راح صاحبى قاله متقلقشى هو فاهم
بعد التركيب اخدت نفسى عشان اجرب مع المفتاح وبصراحه معرفتش اصور القطمه وهى بتركب بس صورت الايموبلايزر وكيفيه تركيبه جوه المفتاح
تركيب الايموبلايزر بالصور:
اولا انا كان معايا الشيب ده
ده حجمه تقريبا 1.0سم × 0.5سم وده شكل المفتاح
بنفك المفتاح بسهوله لانه كبس وبيكون شكله كده
فى الصوره دى واضح حجم الشيب بالنسبه للسلاح بتاع المفتاح
الدايره الحمرا بتبين مكان صغير مربع فاضى
رحت انا مبيت الشيب براحه فى المكان الفاضى واللى بالمناسبه مناسب جدا ليها
بعدين نقفل المفتاح تانى كبس ونجرب ولو مشتغلتشى ممكن تفتح المفتاح تعكس اتجاه الشيب
ملحوظه شكل الشيب زى شريحه الموبيل فيه حته منه مقشوطه من الجانب انا خليت الجنب المقشوط من فوق ناحيه باقى المفتاح والجنب المتساوى ناحيه السلاح
النتائج:
القطمه ركبت كانها الفبريكه ما شاء الله ومريحه جدا فى الاستخدام وجميع الدراعات تعمل بكفاءه
تركيب الايموبليزر فى المفتاح نجح ولله الحمد بنسبه 100% والعربيه بتدور من اول مره
الطاره عشان متحركه فا فيها من تحت دراع عباره عن مفتاح التثبيت بتاعها ولان القديمه مكنتشى متحركه بالتالى مكان البلاستيك اللى حوالين القطمه مفيهوش مكان للدراع ده وده اللى خلانى ادور على واحده استيراد تركب عندى
اسف على الاطاله وعد ارفاق صور لفك وتركيب القطمه
يرجى من المهندس محمد سيد تنسيق الموضوع وضبط الاخطاء ان وجدت واضافته لسلسله تعلم عمل الصيانات بنفسك
الصور الباقيه اهى
دى صور للطاره بعد ما ركبت تمام
http://www8.0zz0.com/2012/09/20/23/272400727.jpg
ودى صوره دراع التحكم فى الطاره
http://www8.0zz0.com/2012/09/20/23/896566224.jpg
دى صوره للقطمه وهى بره (دى اللى كانت راكبه)
الدايره الحمرا اماكن تثبيت القطمه بالمسامير 13 فلا جسم العربيه
الدايره الصفرا الضفر الحديد اللى بيثبت الطاره من تحت كبس بدون مسامير
الدايره الخضرا هى الصليبه او المشرشر بتاع القطمه واللى كان بيسأل عليها اخويا Agaty
http://www8.0zz0.com/2012/09/20/23/833158273.jpg
الصوره دى للصليبه من قريب وده بيبقى الشكل السليم منها
http://www8.0zz0.com/2012/09/20/23/332627564.jpg
اماكن التثبيت الاساسيه بينها وبين الكونتكت حوالى 10 سم
http://www8.0zz0.com/2012/09/20/23/284035640.jpg
صوره المسمار بعد ما اتربط فى جسم العربيه
http://www8.0zz0.com/2012/09/20/23/590599898.jpg
صوره المسمار التانى
http://www8.0zz0.com/2012/09/20/23/110241948.jpg
صوره القطمه من تحت وفى النص الصليبه وفوق المسمار اللى قافل على الاكس او المشرشر وتحت مسمارين تثبيت القطمه مع الزور اللى طالع من علبه الدركسيون وهو بيكون فيه طول سنه عشان الطاره لو متحركه
http://www8.0zz0.com/2012/09/20/23/600473592.jpg
صوره الصليبه وهى طبعا ميتعرفش حالتها بالنظر لازم تتجرب وفكرتها قريبه من الكوبلن لازم تكون محكومه جدا ومفيهاش بوش
http://www8.0zz0.com/2012/09/20/23/268923201.jpg
مسامير الزور 13 برضه
http://www8.0zz0.com/2012/09/20/23/670531444.jpg
تم دمج المشاركات بواسطتي بناء علي طلب صاحب الموضوع بتجميع الصور كلها في مشاركة واحدة.
وتغيير لون الكتابة من الأحمر للنبيتي لتتوافق مع قواعد المنتدي.
منسق القسم
22-9-2012