الموضوع: تقرير استلام الصنى الجديدة

السلام عليكم ورحمة الله وبركاته

عاملين ايه يا احلى شباب فى الدنيا, وحشتنى والله صحبتكم فى الكام اليوم اللى فاتوا
طبعا من عنوان الموضوع باين انى استلمت اخيرا ونهائياً الصنى بعد معاناة ومشاوير ومكالمات للشركة والموزع على مدار 77 يوم

الحجز:
انا كنت حاجز يوم 6/30 وقالى الاستلام بعد شهر والحوارات اللى الناس عارفينها دى وكلام التسويف اللى كنت على طول بسمعها

الاستلام:
استلمت يوم الثلاثاء اللى فات 9/17 وحقيقى ما كنتش هستلم دلوقتى خالص كمان على كلام الموزع الا بعد تدخل العمدة أ/احمد مصطفى, وتانى يوم روحت قول اما اسأل على موضوع التأمين كده لقيت مدير الفرع بيقولى هات فلوسك وتعالى استلم والمندوب بيقولى انت كلمت مبن وعملت ايه خلاه يسلمك بدرى!!!!!
روحت اتفرجت على العربية اللى موجودة لاقيتها اسود فى اسود وانا كنت حاجز اسود فى بيج فقالى طب استنى يومين تلاتة كمان قولت له ماشى واتصل عليا يوم الاتنين وقالى هتستلم الثلاثاء وان العربية جت فى السبع اللى فى الحرية فى مصر الجديدة .... وروحت انا استلمتها وما رضتش سواق اللى يجيبها زى ما الاخوه نبهونى واستنيت هناك 6 ساعات على ما الورق جه من المصنع(العربية خرجت من المصنع الاثنين وورقها جه الثلاثاء)
الورق جه واستلمت انا واخويا, وفولتها من بنزينة الوطنية اللى قريبة من المخزن بتاع السبع بس فين مش عارف

المميزات:
-حقيقى العربية كانت على الطريق حاجة جميلة جدا سحب جميل جدا
-وعفشة مريحة جدا
-والعزل رائع الصراحة
-والتكييف شغلتة خمسة كده على 2 وكانت تلاجة,
-الكاسيت صوته معقول جدا ومش سىء للدرجة انى اغير السماعات
-العربية عملية من جوه وانا شايف انها مش فقيرة ولا حاجة وتقفيلها معقول جدا
-استهلاك البنزين لحد دلوقتى مشيت 275 كيلو واللى فاضل يمشى 150 كمان على كلام كومبيوتر الرحلات واكيد هيتحسن بعد اول صيانة
-الفرامل ممتازة واستجابة جميلة

العيوب:
انا لحد دلوقتى مش شايف فيها اى عيوب خالص وشايفها مناسبة جدا لسعرها واكتر كمان
ما لاحظتش تزيق ولا حاجة فيها ولا الفرامل ليها صوت والبطارية كلورايد جافة
وماحدش يقولى انت متحيز للعربية وكده وازاى مافبهاش عيوب علشان انا فعلا متحيز ليها وحاببها جدا
واكيد لو ظهر فيها حاجة او مشكلة هاستفسر منكم

فى النهاية اوجه كل الشكرلاخوة هنا فى القسم اللى ساعدونى وافدونى كتير وبالاخص
أ/احمد مصطفى لتعبه معايا ومحاولته لخدمة اى حد حتى لو كان ما حدش يعرفه زى مثلاً .. وجعله الله فى ميزان حسناتك