الموضوع: قطع الغيار و غلوها فى التوكيل و الحل النهائي

السلام عليكم و رحمه الله و بركاته

بصراحه انا اترددت كتير عشان اعمل الموضوع ده خصوصا بعد ما لقيت مواضيع كتيره بتتكلم عن شراء الحاجات من الخارج و ملقتش فيها بعد كده استمراريه او افاده

لكن بصراحه جشع التجار و خصوصا الوكيل بقى صعب اوي و كتير على الاقل بالنسبه ليا

لانى لما بقارن بين قطع غيار اللانسر مثلا او التويوتا بالهوندا بلاقى فروق شاسعه و ده كله ناتج لقله الناس اللى بتشتغل فى حاجات الهوندا فى مصر عموما

طبعا فى تجار بتجيب حاجتها و بتبيعها باسعار كويسه بس استعمال طب انا ليه ارضى بحاجه استعمال او حاجه مش اصليه لمجرد ان السعر بس هو اللى فيه مشكله او غالى عليا

و عن تجربه اكثر من مره ان الحاجه الاصلى بجد احسن و انضف من اى كلام تاني مهما كان كوبي او فرست كوبي

بقالى فتره بدور فى النت و المواقع على قطع الغيار الخاصه بهوندا خصوصا الvti 2009 لانها عربيتي

لكن اعتقد ان الموضوع ده هيكون مناسب لكل الناس من موديل 2007 لحد 2011 الشكل القديم

بس الفكره انى بدور على الموضوع بشكل كامل بمعنى ايه

بمعنى ان كل الصنايعيه اللى فى مصر حتى لو طالع من التوكيل نفسه فهو اخره برده هيعمل اللى بيتعمل فى التوكيل يعني هيركب اللى موجود فى التوكيل و لو شيء مختلف هيكون زيه زيك مش فاهم اى حاجه

طبعا انا كمان مش بتكلم على حاجه فى الهربيه لكن بتكلم فى الحاجات الصغيره و المهمه بمعنى ادق ما خف وزنه و ثقل تمنه

فانوس مثلا لمض كاسيت فرش غطا و خلافه من الحاجات الصغيره اللى بتطلع عينا

على سبيل المثال اللمبه الزينون فى التوكيل ب 1000 جنيه فى حين ان نوعها بره يوم ما بيتنطط بيعمل 20 دولار او 30 دولار

يعني حتى بعد الشحن باغلى الاسعار هتعمل اللمبه 60 دولار مثلا يعني 360 جنيه تقريبا تلت التمن يعني اجيب لمبتين للفانوسين وواحده احتياطى بتمن واحده من هنا فى التوكيل

الشبكه الاماميه فى التوكيل حد يعرف بكام ؟
اقولكم
الحته النيكل ب 750 جنيه
و الشبكه السوده ب 1200
و علامه هوندا ب 150 جنيه
و العلبه اللى فيها العلامه ب150 جنيه
يعني الشبكه ب 2250 فى حين انها بره ب 150 دولار يعني لو قلنا هنضرب فى 2 يعني 300 دولار يعني 1800 جنيه مصري
هنا الفرق مش كبير بس فرق يخليك تجيب اى حاجه تانيه مثلا و فى نفس الوقت انت ركبت الجديد و المعتمد من الشركه مش استعمال و لا تيوانى و لا صيني و لا الكلام الغريب ده

الكلبسات و التيل و ما ادراك ما التيل ده لوحدها مصيبه
التيله الواحده بتعمل من 10- 20 جنيه فى التوكيل و هى بره ب نص دولار

طيب نعمل ايه بقى او بمعنى اصح انا فكرت ازاى ؟

مره كنت فى التوكيبل و بسأل على تيله كده ناقصه عندى فى الكرتيره من تحت
بتاع المبيعات طلعلى كاتالوج كده و قعدنا ندور فيه لقيت فى الكتالوج ده تقسيمه كل حته فى العربيه من الابره للصاروخ

فضلت ايام ادور على الكتالوج ده فى النت لحد ما لقيته الحمد لله

بصوا على الصور فى المرفقات هتفهموا معنى كلامى









و ده اهم و ارخم جزء انك تكون عارف انت عايز تشترى ايه بالظبط قطعه قطعه و جزء جزء

بعد كده بدأت ادور على الاسعار و منين و فين و ده المرحله اللى انا فيها حاليا

كتبت الموضوع ده و مستنى راي الناس الخبراء يمكن يكون فى حد عنده معلومه مفيده يقدر يفيد بيها و نوصل لحل ظريف

اما عن طريق الشرا من بره و التوصيل و الشحن ده موضوع سهل جدا ان شاء الله و هاشرحه لوحده فى مشاركه لوحدها ان شاء الله تعالى

منتظر التعليقات و الردود





تم تعديل الصور