سؤال حول عمل عمرة او تسقيط موتور للميجان 2

**ecybrarian** · 25-09-2012 02:56 PM

لو هاتسقط موتور هاتحتاج واحد استاذ في الميجان علشان تظبيط الكونترولات ويمكن تحتاج إعادة برمجة..او تجيب موتور بفتيسه بكونترولاته (بسلاطاته وبابا غنوجه) وتريح نفسك، علشان كدا الموضوع بقى كله فك وتركيب

**ecybrarian** · 25-09-2012 03:08 PM

وممكن تبدل باللي عندك وتدفع الفرق

MohammedAladel
والله يا هندسة انا كنت سألت العقيد خالد من فترة قال لي إن العربية كاملة نصفين بتلعب في اواخر التلاتينات (الف طبعا :-))

**Ahmed Selim** · 25-09-2012 10:34 PM

المشاركة الأصلية كتبت بواسطة MohammedAladel

ممكن يكون حاليا السعر أرخص بس هل الفرق هيبقى واضح ؟؟؟ أصل قرأت موضوع حضرتك قلت فيه إن الفرق مش كبير بين ال 1600 و 2000

وهل الدينامو والكمبرسور وملحقات المحرك ال 1600 يتماشوا مع ال 2000 ؟ والفتيس كمان ؟؟

إنت بتحب ميجان أوتو أكتر ولا مانيوال ؟؟؟

هل موجود موتور rs لميجان استيراد ؟

الفرق مش وهمي.........حوالى 27 حصان بس أنا عن نفسي محستهمش 27 حصان.....حستهم 10 أو 12 حصان بالكتير.............يمكن علشان بقالى فترة كبيرة مركبتش الميجان ال 1600

بص أنا مجربتش الميجان مانيوال خالص............مش هقدر أحكم

بس العادي أن أداء المانيوال أحسن.

أعتقد موتور ال rs ممكن تلاقيه............بس محتاج مجهود و وقت فى التدوير و التركيب.

المشاركة الأصلية كتبت بواسطة ecybrarian

15000 جنيه...شوف حد تشاركه واشتروا نص كامل احسن يا زعيم

يا كبير الكلام ده كان من 4 سنين على الأقل :)

المشاركة الأصلية كتبت بواسطة MohammedAladel

وعايزين نعرف أكتر واحد عربيته مشيت كام كيلو وحالة المحرك

أكتر أتنين مشيوا بالميجان على ما أذكر هما hegazio و تقريباً عدى ال 200 ألف كم
و محمد مصطفى و أعتقد وصل 180 إن مكنش أكتر

الأتنين كانوا منزلين عربياتهم من السعودية

المشاركة الأصلية كتبت بواسطة fadl95

شكراعلى الرد بس عاوزاعرف الموتور يتعمر بعد كام كيلو والعمرة اتعملت فين ولو هسقط موتور بالفتيس ولا من غير الفتيس

مفيش مقياس لحاجة زى كده غير حالة الموتور...........و الكلام على أى عربية مش على الميجان بس.

يا ريت تقولنا أنت بتفكر تعمل عمرة أو تغير موتور ليه ؟

**abdo_2812** · 26-09-2012 07:08 AM

المشاركة الأصلية كتبت بواسطة fadl95

حاسس ان العربيه مش بتسحب كويس مع ان صيانتها معموله فى التوكيل وانا لسه شاريها وعاوز اعمل عمرة تخلينى مستريح سنتين او اركب موتور استيراد ومش عارف

الحقيقة أنا مش متخصص أوي في الموضوع ده بس أعتقد موضوع السحب مش شرط خالص يكون ليه علاقة بالموتور وبعدين موتور الرينو علشان يحتاج عمرة يبقى لازم يكون اتهان جامد يعني مش بالبساطة دي يتعمله عمرة، أنا عاوز أعرف هو العربية ماشية كام كيلو؟ وبعدين انت أول مالك ليها ولا شاريها مستعملة؟؟

وبرضو بالنسبة لحالة الموتور أعتقد بيتعمل حاجة اسمها compression test وهي اللي بتحدد حالة الموتور ولازم حد متخصص يركب العربية معاك ويختبرها ويقدر يحدد هل المشكلة من الموتور أصلا ولا لأ؟؟

المهم انك تاخد بالك وماتخليش أي حد يلعب في العربية علشان الفكرة دي (عاوز اعمل عمرة تخلينى مستريح سنتين) مش في العربيات دي خالص
وربنا يعملك اللي فيه الخير

**abdo_2812** · 26-09-2012 07:14 AM

برضو سؤال تاني

الصيانة الأخيرة بتاعة التوكيل كانت صيانة كام ألف؟ واتغير فيها إيه؟ وآخر صيانة قبلها كانت امتى؟؟

**Ahmed Selim** · 26-09-2012 08:15 AM

طيب خلينا نشوف كده واحدة واحدة

السحب فيه تغيير عن قبل كده ولا أنت من ساعة ما أشتريت العربية و هى كده ؟
هو الفكرة ببساطة أنك ممكن تكون مش متعود على سحبها أو كنت راكب حاجة سحبها أعلى من الميجان و متوقع من الميجان أداء مقارب.

ممكن تكون الرشاشات مسدودة
ممكن تكون طرمبة البنزين ضعيفة
ممكن البوجيهات
بتحط بنزين كام.......فيه أسباب كتير.

طيب الموتور هل بيطلع دخنة ؟
هل بتلاقى الزيت بينقص مع أن مفيش بينزل تحت العربية ( بتاكل زيت)
هل الزيت عامل طحينة ؟ ( المياه داخلة على الزيت )

و ممكن برضه تكشف على كبس الموتور زى ما العضو abdo_2812 قال.........بس يفضل فى مكان متخصص فى رينو.