الموضوع: خدمة عملاء موبينيل بطيخ وتناكة عالفاضى!!!!!!!!

اشتغل المودم ومن ضمن الحاجات اللى فى البرنامج المتسطب هو الرسائل القصيرة اللى بعرف بيها الرصيد والميجابايت الباقية عن طريق اكواد زى #134# و #136# بس لما جيت اجربها مشتغلتش وبتظهر لى دايما رسالة (فشل فى الارسال) وبعد ما جربت كل الحلول واعدت تسطيب الفلاشة اكتر من مرة قلت مفيش غير خدمة العملاء اتصلت بيهم وبعد ما خدوا بياناتى كالمعتاد:
انا: الرسايل مش شغالة
موبينيل: رسائل ايه حضرتك؟
انا: رسائل الرصيد والميجات
موبينيل: طب خليك معايا اراجع النظام
انا: معاك
موبينيل: شيل المودم وحطه تانى وجرب
انا: شلته وحطيته ومش شغالة
موبينيل: طب اتاكد كويس من الارقام اللى بتبعتلها
انا: متاكد واتاكدت دلوقتى تانى هيا مظبوطة
موبينيل: الحل انك تجرب الفلاشة فى جهاز كمبيوتر تانى
انا: نعم ليه حضرتك؟؟؟؟؟؟؟؟؟؟؟؟؟؟
موبينيل: هو كدة الفلاشة لازم تتحط فى جهاز تانى حضرتك
انا: وهتشتغل؟
موبينيل: هتشتغل اكيد
انا: طب سلام عليكم اروح احطها فى جهاز تانى

طبعا هرتلة وكلام فاضى قلت اروح لصفحتهم عالفيس لقيت نفس الكلام بس من غير ما احط الفلاشة فى جهاز تانى ومخدتش حق ولا باطل، قعدت اقلب فى اعدادات الفلاشة واحدة واحدة ببص ملقتش رقم مركز الرسائل حطيته واشتغلت الرسايل كان نفسى ساعتها اكلمهم واقولهم شغلتها من غير ما اطلعها من الجهاز يا ولاد التيييييييييت بس قلت كبر دماغك اكيد بيشتغلوا حد تانى ومش فاضيين لى

نسيت اقول انى لما جيت اعمل اول مكالمة من الخط الجديد حولونى عليهم والاقى واحدة بتسالنى اسم ام خالة بنت عمة اللى جابوك (تقريبا) اسمها ايه طبعا ضحكت وقلتلها يعنى لو قولتلك اى اسم هتعرفى ازاى انه حقيقى او مش حقيقى؟ قالتلى يافندم الاسم ايه... بلهجة قاسية جدا (تقريبا افتكرتنى بشتغلها او بهزر) بس الحقيقة انى كنت بستفسر فعلا ومش فاكر اديتها اسم الام ولا الجد والله ما فاكر وقفلت وانا مستغرب جدا من اسلوب الكلام وبرضه مش عارف ازاى بيتاكدوا من صحة الاسم اللى بديه لهم، هل معاهم نفس قاعدة بيانات الداخلية مثلا ولا ايه بالظبط؟؟

شركة غريبة وخدمة عملاء سخيفة ومعاملة العميل على اساس انه جاهل او مش بيفهم وجاى يزعجهم وخلاص، وكتير جدا اتصل على 110 الخط يقطع بدون ما اكلم حد وبرضه الـ 50 قرش تتخصم بشكل مستفز، وموظفين مخنوقين من نفسهم وفتايين وردود محفوظة ومكررة ومش ناقص غير يقولوا فوت علينا بكره يا سيد

ده شئ متوقع منهم ..

المشاركة الأصلية كتبت بواسطة ahmed_dinamo

دول قربو يعاملونا كده

[youtube]https://www.youtube.com/watch?v=4qs2iwz_h1g[/youtube]

ههههههههههه عشرة على عشرة
الناس اللى عملت الاعلانات دى تستاهل جايزة افضل اعلان على الدماغ العالية دى

المشاركة الأصلية كتبت بواسطة S O P H O S

ده شئ متوقع منهم ..

الظاهر انهم شبعوا

المشاركة الأصلية كتبت بواسطة Osama_I

يا باشا فعلاً الجديد ان الثلاث شركات محمول نتصله بقاعدة بيانات الاحوال المدنيه علشان كده بيسأل على أسم الجد من ناحية الأم علشان الحد من الارقام اللى مالهاش صاحب حقيقى
بس حل الموضوع ده محلات كبيرة بتاعت خطوط بتشترى كشوف باسم الجد من موظفين بالسجل المدنى
محدش فى المصريين بيغلب