الموضوع: صني 13 أوتوماتيك - سخونة الكبوت, وتأثير الفرامل على عداد سرعات المحرك

سلام عليكم يا شباب


بقالي فترة ملاحظ حاجات كان زملاء كتير هنا حكوا عنها, بيقولوا ان الصني الجديدة فيها سخونة عالية للكبوت وخلال المشاوير العادية كمان


وشباب كتير من الصقور كان ردهم ان مافيش عزل للكبوت, وبالتالي لو عايز الحرارة تقل ممكن تعزل الكبوت للحفاظ على الدهان الأصلي للعربية , وده رأي منطقي وسليم


لكن حبيت اشارك معاكم تجربتي, ألا وهي : إن مافيش سخونة كبوت أساساً عندي !!! مشاوير في الزحمة, سفر, محور ودائري, راكن ماشي قايم نايم, كل الحاجات دي بدون سخونة كبوت !!! يعني الحرارة العادية في أي عربية نتيجة ان جواها محرك داير !! لكن المس الكبوت....مافيش غير انه يا بارد أو دافي سنة صغيرة ..... فلو فيه حد من الصقور يقدر يشاركنا آراءه المثمرة يبقى كتر ألف خيره


لكن رأيي من جهة الشباب اللي بيشتكوا من سخونة كبوت العربية, وانهم يعزلوه..... انت أي نعم كدة بتعزل الكبوت وتحافظ على الدهان الأصلي للعربية , بالرغم من انه -المفروض- يكون دهان معالج لتحمل الحرارة العالية....لكنك في نفس الوقت بتساهم في حبس الحرارة داخل غرفة المحرك, وعدم تخلصه منها زي ماهو محتاج, فانت كدة بتقصر عمر كل الأجزاء الداخلية للمحرك وتوصيلات العربية, وياريت حد يصلحلي لو انا غلطان, والمشكلة دي مش هاتظهر غير مع مرور الزمن ومقارنتك بين واحد عازل عربيته وواحد تاني ماعزلهاش بعد 50 ألف كيلو وانت طالع, ونقارن كم الأعطال والتغييرات اللي تمت عند ده وده, لكن يبقى المنطق هو الفيصل الأخير في اللي بيحصل




حاجة كمان: المفروض انك لو سايق عربية أوتوماتيك وواقف في إشارة أو متوقف لفترة كبيرة, انك تنقل من الدايركت D إلى وضع المور نيوترال N أو وضع الباركنج P.... لضمان تخفيف الحمل عن المحرك لأنك بفرملتك الطويلة بتكبح جماح المحرك الأوتوماتيك اللي عايز يحرك العربية وخلاص

الملاحظة هنا كانت من عداد لفات المحرك, لاحظت ان أول دقيقة توقف بتكون حالة المحرك في نيسان صني 2013 أوتوماتك كالتالي:

1- لو كنت باجري مشوار طويل وفجأة لقيت زحمة وتوقفت (الحالة الطبيعية لمحور 26 يوليو في آخره) ... الموتور بيكون منطلق ومعترض على انك توقفت, وبالتالي لو "ضامن" تتوقف لفترة طويلة يستحسن تنقل لوضع المور N

2- لو كنت ماشي عادي داخل المدينة ووقفت في إشارة, خلال أول دقيقة - والعربية متوقفة - بالاحظ ان كل ماضغط فرامل , عداد لفات المحرك بيقل, يعني الفرامل بتفرمل المحرك كمان وبتقلل من حدة انطلاقه الأوتوماتيك , وده شئ ممتاز للغاية, ولما باسيب الفرملة بتبدأ لفات المحرك تزيد (هي زيادة مش كبيرة لكن يمكن ملاحظتها).

بعد أكتر من دقيقة, وخصوصاً لو مشغل التكييف, بتلاقي الموتور بدأ يحمل تاني لفات زيادة, وتبدأ دواسة الفرامل في الانخفاض, وتستمر في وضعها ده كل مامشي حبة صغيرين وارجع اقف كتير, لفات كتير مع فرامل بتنخفض كل شوية, وماتهداش ولا الموتور يهدا إلا لما اجيبهم على وضع المور


من الواضح ان فيه برمجة معينة للعربية تخلي كتر التوقف في الإشارات أو الزحف البطئ في الزحام مايقللش من كفاءة المحرك الأوتوماتيك بعد فترة, وكمان واضح ان فيه نظام تقليل لفات المحرك عن طريق الفرملة عند الزحام...ياريت لو حد عنده خبرة يفيدنا في النظام ده, اسمه إيه وكيفية عمله




على الهامش:


الرجاء من الشباب اللي ربنا أكرمهم بالنيسان الجديدة يروحوا فوراً يقللوا ضغط الكاوتش ويبقى 30 , لأني لاحظت عربيات جديدة كتير منها وكل ماعدي من جنبهم الاقي ارتفاعها أعلى من عربيتي !!! ازاي ياعم , الاقي الكاوتش منفوخ بطريقة محسساني انه خلاص هايفرقع, وده اللي معلي ارتفاع العربية بشكل ملحوظ

الكاوتش بيخرج من المصنع للمعارض على ضغط 40 !! وهو هايحسسك انك راكب عربية كارو بتتنطط فوق أي مطب طول مانت على هذا الضغط الرهيب...فحفاظاً على العفشة والمساعدين, وحفاظاً على ضهرك وعظامك, روح عدل ضغط الكاوتش وخليه طبيعي

الكاوتش الماكسيس اللي جاي مع العربية فعلاً سيئ ... لكن الحسنة الوحيدة فيه انه مش بيغرز في الرمل :) , ويا ويل اللي ماشي جنب العربية لو دخلت في بركة مية ... علشان هو مؤمن بعدالة توزيع خيرات الطريق على كل من حولك