تسريب من مياة التبريد داخل الصالون

**matrix012** · 30-09-2012 11:34 AM

حبايبى الايبزاويه
الحقونى عربيتى بتجيب مايه من حته غريبه قوى من الدواسه الى جمبى
بكل بساطه واختصار انا كان عندى شوية حاجات فى دورة التبريد ( المايه ) والمهندس ايهاب الله يباركله تعب معايا قوى فيها لحد ما الحمد لله تقريبا اتظبطط والكلام ده من اسبوع تقريبا
امبارح وانا ماشى رايح مشوار لقيت فى مايه على الدواسه الى جمبى انا قولت تلاقى حد كانت رجله فيها مايه ولا حاجه لما وقفت ببص على الدواسه لقيت المايه خضرا من الى بحطها فى العربيه مكدبتش خبر روحت نايم تحت الدواسه اشوفها بتنقط منين معرفتش بس هيا بتنقط
روحت فاتح الكبوت قولت يمكن يكون فى حاجه غلط بصيت على الخرطومين الى واصلين فى الشاسيه بتاع العربيه ( ضهر التابلوه من بره ) لقيتهم واصلين ومفيش حاجه منهم بتنقط
انهاردا فتحت قربه المايه لقيتها ناقصه بتاع نص لتر تقريبا رغم انى كنت مزودها امبارح بليل قبل ما ارجع من مشوارى لحد علامة الماكس
اعمل ايه فى البيبيه الى بتعمله العربيه ده
وشكرا

**agaty1st** · 30-09-2012 12:38 PM

المشاركة الأصلية كتبت بواسطة matrix012

روحت فاتح الكبوت قولت يمكن يكون فى حاجه غلط بصيت على الخرطومين الى واصلين فى الشاسيه بتاع العربيه ( ضهر التابلوه من بره ) لقيتهم واصلين ومفيش حاجه منهم بتنقط

الخرطومين دول يا باشا واصلين ورا التابلوه بسربانتينه و غالبا هي دي اللي بتنقط
و الحل شيل واحد منهم خالص و التاني فكه من العربيه و ركبه في الموتور مكان الخرطوم اللي شيلته يعني خرطوم واحد من الفتحه دي للفتحه دي
و بكده الميه هاتمنع خالص

**matrix012** · 30-09-2012 12:58 PM

المشاركة الأصلية كتبت بواسطة agaty1st

الخرطومين دول يا باشا واصلين ورا التابلوه بسربانتينه و غالبا هي دي اللي بتنقط
و الحل شيل واحد منهم خالص و التاني فكه من العربيه و ركبه في الموتور مكان الخرطوم اللي شيلته يعني خرطوم واحد من الفتحه دي للفتحه دي
و بكده الميه هاتمنع خالص

شكرا على المرور يا باشا والرد
بس معلش هوا كده انا هلغى السربانتينه خالص ( ده مش غلط ؟؟ )
الحاجه التانيه هيا السربانتينه لازمتها ايه ؟؟؟؟؟؟؟؟ وللعلم انا معنديش تكييف
وشكرا

**agaty1st** · 30-09-2012 01:09 PM

السربنتينه دي موجوده في العربيات المكيفه و الغير مكيفه و وظيفة الخرطومين دول أنهم بيملوا السربنتينه ميه سخنه من الموتور و لما تشغل المروحه على السخن تدخل هواء سخن للصالون و لو لغيت الدوره مش هايدخل هوا سخن و ده مش مهم
و ده أفضل و أوفر بدل ما تفك التابلوه و تغير السربنتينه و تكلف نفسك