مركز إصلاح ميتسوبيشي محترم ؟؟

**Eng.Osama.Afifi** · 05-07-2008 12:02 PM

السلام عليكم

دلوقتي ياجماعة أنا معايا لانسر خليجي 2007 .... جيبتها السنة إللي فاتت ... المهم بعد صيانة ال1000 كيلو مباشرة .... العربية عملت حادثة فظيعة ... ( واحد رشق فيا من ورا والعربية أتبهدلت على الآخر .... فانوس أتكسر وإكسيدام والشنطة أتعوجو جامد )

المهم ... أنا العربية كان متأمن عليها إجباري على شان هيا قسط وكدة .... سألت المعرض فوصفلي واحد كدة في جسر السويس جنب التوكيل على طول ( مش فاكر إسمه الصراحة ) ... المهم إدتيتله العربية .... والراجل سلمهاني وكله تمام .... أنا سألته على الفانوس قالي أنه ركبلي الأصلي وقالي سعره حوالي 780 جنيه حاجة زي كدة ....

طبعا أنا روحت لقيت الإزاز عليه رزاز دوكو وملحوس وحالته آخر هنا .... قعدت أنضف فيه بتاع إسبوع والله .... بس قلت مش مشكلة أنا في مصر وديه حاجة طبيعي تحصل .... بسبب الصنايعية الرائعين بتوعنا

المهم بعد 3 شهور كدة لقيت الفانوس سايح من جوا !!!!

والعدسة الحمرا إللي جوا وقعة على اللمبة من السياحان .... والفانوس إصفر وحالته بقيت سيئة للغاية.... مش منظر عربية جديدة خالص !!

طبعا أنا قلت أغيره تاني في أقرب فرصة .... ونمت على الموضوع للأسف بسبب ضيق الوقت وأنا ساكن بعيد .... كسلت يعني

جيت أعمل صيانة ال10000 كيلو في التوكيل .... لقيت الراجل بيقولي " الكوبلن بتاعك أتلعب فيه .... والفانوس إللي راكب فانوس صيني بـ200 جنيه "

قلتله الفانوس واضح إنه صيني .... بس الكوبلن ؟؟ يانهار إسود ومنيل .... إزاي يافندم ؟؟؟

قالي تعالي معايا .... وراني العربية المفروض راس الكوبلن عليه كاوتشة كدة ... محطوط عليها أفيز ... الأفيز بتاعي أفيز بتاع أنبوبة !! إللي هوا أبو مسمار ده .... والكوبلن التاني تمام ... والأفيز بتاعه أفيز أصلي منحوت عليه ميتسوبيشي

وراني كل العربيات إللي موجودة ... كل الكبالن تمام وفبريكة وختم الميتسوبيشي على الأفيز ...

طبعا قالي الكوبلن بتاعك فيه هزة بسيطة كدة ( هوا ورهاني ) وقالي ماتقلقش مش مؤثرة ... بس أنا إللي عايز أقولوهولك أن الكوبلن بتاعك أتلعب فيه !!

طبعا أنا جالي إكتئاب .... رحت طالع على بتاع التصليح إللي أنا عملت العربية عنده ... لقيته قافل

طبعا أنا قفلت من الراجل بتاع مركز الصيانة ده ....

دلوقتي العربية فيها كام حكة كدة على كام خبطة بسيطة .... وكنت عايز أظبط الحاجات ديه كلها قبل الفحص بتاع المرور .... وعايز أغير الفانوس ... وطبعا عايز مركز تصليح محترم يكون : سريع مش يذلني بالشهور زي التوكيل .... ويكون بيتعامل مع شركة التأمين مباشرة ( وديه كانت ميزة الراجل النصاب إللي صلحلي العربية ) .... ويكون داخل القاهرة

وياريت بجد الناس ربنا يكرمها ترد عليها عن علم مش عن سمع .... على شان معنديش إستعداد أجرب حظي مع نصاب تاني

وجزاكم الله خيرا

**ewermido** · 05-07-2008 03:45 PM

انا لو منك اوديها التوكيل احسن بكتير على الاقل اى حاجه هتتعمل فيها هتكون مضمونه ولو ركبو حاجه هيركبولك الاصلى فا احسنلك التوكيل علشان تاخد عربيتك وانت مطمئن

**Eng.Osama.Afifi** · 06-07-2008 06:53 AM

رينا يكرمك .... أشكرك على ردك ... بس أنا سألت التوكيل آخر مرة ... قالي : العربية ممكن تعد بتاع شهر على شان يعمل حاجة تتعمل في يومين على شان هوا زحمة

**Eng.Osama.Afifi** · 07-07-2008 03:06 AM

فين الناس ياجماعة ؟

**salehgharib** · 07-07-2008 10:35 AM

http://wikimapia.org/#lat=30.1128165...18&l=0&m=a&v=2

**Eng.Osama.Afifi** · 07-07-2008 12:56 PM

المشاركة الأصلية كتبت بواسطة salehgharib

http://wikimapia.org/#lat=30.1128165...18&l=0&m=a&v=2

مش لاقي أي حاجة تدل على وجود مركز إصلاح :lol:

يعني ممكن تفاصيل أكتر ؟؟ يعني زودلي كدة سطر ولا سطرين يكونوا دليل لحل خريطة الكنز :lol:

**Eng.Osama.Afifi** · 12-07-2008 07:32 PM

برضه محدش فادني ؟

**Dr Ahmed** · 13-07-2008 01:08 AM

يا باشا أنت عايز مركز إصلاح بيتعامل مع شركة التأمين
يعنى تسأل شركة التأمين
لو عايز تعملهم على حسابك إنظر مراكز " أمير وجوزيف"
كمان فيه مراكز أخرى مجموعة فى أحد المواضيع المثبتة بمنتدى متسوبيشى

**Eng.Osama.Afifi** · 13-07-2008 02:47 AM

أشكرك يا دكتور أحمد

أنا دورت في المواضيع المثبتة ملقيتش أي مركز إصلاح .... كلها يا إما توكيل أو مراكز بيع قطع غيار أو الصيانة الدورية

على العموم أشكرك على إهتمامك