الموضوع: قطع غيار byd - هام لمدوب التوكيل في المنتدي

المشاركة الأصلية كتبت بواسطة egypt123456

طلبت اليوم بسأل علي قطع غيار byd flyer كان الرد انه لا توجد اي قطع غيار لل flyer الان في التوكيل --

نرجوا التوضيح .. يعني نشتري العربية ونستعملها وبعدين التوكيل نفسه لا يوفر دعم او حتي بديل

لا طبعاً مينفعش أن التوكيل ميكونش عنده قطع غيار ليها .. بس المشكلة أن الفلاير اتوقف انتاجها تقريباً فأعتقد أنه بالتالي مبيجبش قطع غيار ليها .. وممكن تلاقي بدايل ليها خارج التوكيل .. وخاصة أني سامع أن معظم قطع غيار الماورتي بتمشي معاها .

المشاركة الأصلية كتبت بواسطة misoalex

طب ما هو ده حال الصينى للاسف فى مصر ده فى توكيلات قفلت وعربيات ربنا يعوض على اصحابها

وعشان كده الاسبرانزا هى رقم واحد فى الصينى لان وكيلها فى مصر واحد فاهم كويس جدا جدا

ومين قال لحضرتك أن كل الصيني في مصر كدة !!!! اللي عمل السمعة دي التجار اللي استوردوا عربيات في بداية ظهور الصيني في مصر كصفقة ومالهومش دعوة بيها بعد كدة مما أدى إلى سمعة غير طيبة للعربيات الصيني كلها .

وعلى العموم الـ f3 أثبتت نجاحها في السوق المصري وقطع غيارها متوفرة بوفرة سواء داخل أو خارج التوكيل .

المشاركة الأصلية كتبت بواسطة se_coralsea

طيب سؤال :
هل الموديل ده فقط من البي واي دي و لا كل الانواع اللي مش متوافر لها قطع غيار ؟
الموديل ده فقط تقريباً
سؤال تاني لو سمحتوا :
اللي أعرفه أن البي واي دي موتور ميتسوبيشي و كل جزء فيها هو من موديل سابق لعربيات أخري ياباني
أذا فهل من الممكن الأستعانة بقطع غيار من موديلات أخري زي لانسر أو تويوتا كورولا الشكل القديم مثلا ؟
بالظبط كدة .. بس الموضوع عاوز شوية بحث كدة وفهرسة لكافة قطع الغيار أو على الأقل قطع الغيار المستهلكة بشكل دوري .

منور القسم يا سمير باشا

المشاركة الأصلية كتبت بواسطة misoalex

طب وهل تضمن استمرار نجاح ال f3 وتوافر قطع غيارها 10 سنين ادام على اقل تقدير ؟؟؟؟؟؟؟؟

المشكله زى ما حضرتك قولت حبه ناس معاها فلوس وباعت العربيات وخلاص هات غيرها وبيع احنا فاضين ليكم
الكلام ده كان زمان .. دلوقتي معظم العربيات الصيني ماسكينها توكيلات ذات سمعة في السوق ومصداقية .. مش نظام أخبط الصفقة وأجري .

وأيه اللي ضمن توافر قطع الغيار للـ 24 و الـ 27 والـ 28 لغاية دلوقتي !!! أكيد أنتشارها في السوق بيشجع التجار أنهم يشتغلوا فيها .. والعربية وصلت لدرجة أنتشار كبيرة على الأقل في القاهرة سواء ملاكي أو تاكسي زي ما أنا شايف (معرفش باقي المحافظات أيه الوضع) .. وقطع غيارها وأكسسوارتها أنتشرت خارج التوكيل بشكل كبير .

المشاركة الأصلية كتبت بواسطة misoalex

لا اللى ضمن للفيات دى قصه تانيه كبيره جدا انت حتقارن شركه من قبل الستينات فى السوق العالمى بشركه لسه بقالها 5 ولا 4 سنين
لا طبعاً مفيش مقارنة في العراقة بين الشركتين .. بس قطع غيار الفيات القديم للأسف مش حتلاقي منه أوريجينال حتى مخزون الاستيراد أبتدى يقل لاضمحلال هذه الماركات القديمة في الخارج (بقت أنتيكة) .. وكل الموجود يا أما تركي كأحسن حال أو صيني .. الفكرة في الانتشار بيشجع مستوردي قطع الغيار استيراد حاجات العربية بالكامل من أي حتة طالما لسه ماشية في الشارع .. حديك مثال عكسي تماماً لعراقة شركة زي فورد أو فوكس هول أو أو الكثير من الماركات للعربيات اللي كانت منتشرة في الأربعينات والخمسينات .. هل بتلاقي قطع غيار ليها ؟! الإجابة طبعاً لا .. إنما بتوفق قطع غيار ليها من أي حتة لأنه اتوقف انتاجها من سنين ومبقتش منتشرة بشكل كبير فمبيشجعش التجار أو الصناع على اس تيراد أو تصنيع حاجاتها ... وهي دي سنة الحياة بالنسبة للسيارات .

عموما هى فعلا منتشره فى القاهره لكن بره القاهره مش بشوفها بصراحه وبعدين انا مش بتكلم على قطع الغيار المستهلكه على فكره اللى هى زى الفلاتر والسيور والكلام ده انا بتكلم عن ان لو لاقدر الله العربيه اتخبطت حتلاقى ليها شنطه ولا ازاز شبابيك ولا باب كامل ؟؟؟؟
نزل ليها الصاج خارج التوكيل عند بتوع قطع الغيار .. وبعدين أنت بتفترض ليه عدم وجود قطع غيار داخل التوكيل .. وهو أساساً بيصنعها في خطوط تجميع داخل مصر .. ومش بيستوردها من الخارج زي الأول .

مهو التوكيل لو قفل الحجات دى مش بتتباع بره اللى خلا ال 128 فيه حجات كتير مش موجوده لها جديده وبتروح تجيبها استيراد زى التابلوه مثلا
حتلاقى لل f3 تابلوه بره التوكيل لو قفل ؟؟؟؟؟؟؟؟

الموضوع محتاج اعاده نظر
قيس كلامك ده على أي عربية مش F3 فقط .. وزي ما قلتلك دي سنة الحياة .. هو أنت عاوز عربية تقعد معاك 50 سنة .. وعلى العموم تأثير التوكيلات الصيني الفشنك اللي ظهرت في الأول هي اللي خلتك تقول الكلام ده .. وأنا معاك في تخوفك ده وتساؤلاتك .. بس الصورة مش كدة خاالص .. ولا أنا غلطان في وجهة نظري دي ..

ومع ذلك ميزة الـ F3 أن قطع غيارها الأصلية صيني .. وقطع الغيار البديلة ممكن تركبها كوري أو ياباني .. سواء في عفشة أو موتور .. وسامع كمان أن باب الكرولا (2002 : 2007) بيركب عليها بدون تعديلات (بس مش متأكد من المعلومة دي).