الموضوع: تسعير أوتو جولف وسيات

اهلا بالأخ العزيز خالد في قسم سيات

بص يا باشا
انت بتسأل سؤال مطاطي جدا جدا

بمعني
الأبيزا موديل 2000-2001 شكل
الأبيزا 2002-2006 شكل تاني خالص
وللأسف الشديد ان سيات مصر لم تطرح موديل ابيزا في السنوات 2003 - 2004 - 2005
الأبيزا 2000-2001 مانزلش منها اوتوماتيك - كلها مانيوال
اما ابيزا 2006 نزل منها مانيوال واوتوماتيك

بالنسبة للتوليدو نزلت لحد 2004
نزل منها طبعا مانيوال واوتوماتيك

بالنسبة للتسعير
الأبيزا 2000-2001 معاك لحد 42 للحالات الجامدة وبتبدأ من 37
التوليدو 98-2004 معاك لحد 60,000 للحالات الجامدة وبتبدأ من 50,000

_________________

الفولكس
البولو من 2000- 2002 دة شيب
ومن 2003- 2006 دة شيب تاني (بيسموه عيون)
من وجهة نظر السوق ان الشيب من 2000-2002 دة انجح من العيون ومن وجهة نظري الشخصية فهو انجح شيب علي الأطلاق رغم ان الشيب اللي قبله باع اكتر ومنتشر اكتر ومحبوب اكتر
بالنسبة للأسعار مش عارف بالظبط بيعمل كام بس هتلاقيه اعلي بشوية عن الأبيزا يعني ممكن تقول لموديل 2002 انه يوصل لل45 مستريح

الجولف
لحد 2004 دة شيب وبيسموه جولف 4 (انجح شيب والأكثر مبيعات في العالم كله وليس مصر فقط)
العربية دي مش هتكلم عنها كتير لأن سمعتها سابقاها ومش محتاجة لكلامي عشان يزود فيها او يقلل منها
بس هقولك ان الشاسية والموتور والفتيس والعفشة بتوعها ركبوا في انجح عربيات في العالم كله عاما ومصر خاصا
نزلت بموتور 1.4 و 1.6 ومواتير اكبر بكتير برة مصر
سعرها بيتراوح بين اخر الأربعين ولحد 60,000 للحالات الجامدة
نزل منها مانيوال واوتو وابتداء من 2003 نزلت DSG-6speed (مش متأكد نزل مصر ولا كان برة فقط)
وحتي لو نزل مصر - عمرنا ما سمعنا عنه مشاكل من 2003 لحد 2012 (لو باظ معاك هتبقي انت اول واحد يبوظه وهتشتهر اعلاميا) هههههههههههه

تحياتي ليك ولو في أضافة هبقي ازودها
ولو عايز تستفسر عن شئ انا معاك وعينيا ليك

والله المستعان
،
،

المشاركة الأصلية كتبت بواسطة Khaled Online

بسم الله ما شاء الله
ربنا يكرمك يا سيد :)
تصدق بالله؟ أنا عملت الموضوع هنا في سيات مخصوص عشان انت اللي ترد عليا هههه
حقيقي متشكر :)
فعلا أسعارك سليمة على حد علمي عشان زميلي في الشغل جايب توليدو مانيوال 2000 أو 2001 بـ 52 ألف وحالتها الله أكبر وثباتها فظيع (مثلا ماشيين على 170 وحاسس إني ماشي على 90 أو 100 بالكتير) ربنا يباركله فيها

أنا دلوقتي عايز أعرف في الأوتو أزود 5 مثلا على متوسط السعر المكتوب هنا؟

ربنا يبارك فيك يا اخ خالد
لسة بتروح الدقي ؟؟

بالنسبة للجملة اللي انا عامل عليها هاي لايت high light ولجملة انا كتبتها في المشاركة بتاعتي

بس هقولك ان الشاسية والموتور والفتيس والعفشة بتوعها ركبوا في انجح عربيات في العالم كله عاما ومصر خاصا
نزلت بموتور 1.4 و 1.6 ومواتير اكبر بكتير برة مصر

التوليدو 98-2004 نازلة بشاسيه وموتور وفتيس وعفشة الجولف 4 (طبيعي تنزل بنفس العفشة طالما علي نفس الشاسيه)

بالنسبة للتسعير للأوتور مش هيفرق كتير زي مانت مامتخيل
الألماني عموما - تسعيره بناء علي حالته
الكلام دة سليم مع الزيرو - لكن المستعمل له حسابات تانية خالص
التسعير في المستعمل وبالذات مع العجل العالي (شغل سوق) :) بيبقي الحالة هي الفيصل في التسعير - يعني ممكن مانيوال حالته انظف تبقي اغلي من اوتو بحالة متهانة
التوليدو النظيفة الأوتو الكاملة (اعتقد نزلت كلها كاملة مفيش منها فاضي) بتتكلم في حدود من 55 لحد 60 وعربية بجد لن ولم تنتدم انك اشتريتها (وعلي الفكرة المعروض منها قليل اوي وهتتعب علشان تلاقي حالة نظيفة للبيع)
العربية فعلا ثبات فوق ما تتخيل وكماليات انظف 100 مرة من اي عربية في رينج السعر بتاعها (مقارنة بالكوري والياباني في نفس الفئة السعرية)
نزلت بالمحرك ال1.6 انجيكشن كامل mpi ولو تستني تقرير من زميل لينا هنا في القسم اسمه صلاح معاه اختها هاتشباك (بيطلق عليها ليون) بس عربيته 2.0 خليجي

الكماليات اللي فيها علي سبيل المثال لا الحصر:
1- طبعا تكييف وباور و4 زجاج وسنتر ومرايات
2- كراسي وطارة قابلة للتعديل في اكثر من وضع
3- شنطة كبيرة لدرجة ممكن تاخد فيها عجل العيد (400 وكسور لتر)
4- كنبة قابلة للأمالة لزيادة مساحة التخزين (علشان لو هتاخد الجزار كمان هههههههه)
5- فوجات امامية وخلفية
6- مفتاح بالريموت
7- ايموبلايزر - مانع السرقة
8- 5 مساند رأس - ومخدع بين الكرسيين

أقولك، خدلك لفة في الموضوع دة وحمل وأقرا وعيش حياتك
http://www.nilemotors.net/Nile/28746...post3874294131


تحياتي