العنوان هو ترشيد الدعم بدل الغاء الدعم
العالم كله بيتقدم وبيلاقي حلول لمشاكله الا مصر تعيش في حلقة مفرغة وبتلف وتدور حول نفسها الشعب المصري هو شعب الفهلوة( دلوقتي النيجريين بقو زينا) كل حاجة عاوز يطلع منها مصلحة ولو فيه دور يبقي هو يقف اول واحد (امال مين اللي هيقف التاني) مشكلة الوقود مش في دعمه مشكلته في الشعب اللي منقسم بالغصب لطبقتين طبقة المستهلك المغلوب علي امره وطبقة اغنياء الحرب (اقصد اغنياء الدعم) صائدي الكوارث والازمات وهم دول اللي سوءو سيرة الدعم تلاقيهم في كل مكان فيه دعم في الفرن اللي بيسرق الدقيق - في العامل اللي بعطي الخبز لصاحب مزارع البط والفراخ - تلاقيه في الموظف اللي ياخد ب 10 عيش عشان يعلف طيور العشة - تلاقيه في الست اللي متعرفة علي اللي شغالين في الفرن وتنقي العيش الكويس وتبيعه بدل ال20 بجنيه يبقي 10 بجنيه والضحية المستهلك المسكين اللي رايح يجيب بجنيه عيش يطلع محروق ومليان حشرات ولايصلح لاستهلاك الادمي او الحيواني -
نفس بتاع مستودع الغاز اللي بياخد الانبوبة ب 2.5 ويبيعها للسريحة البلطجية اللي واقفين علي باب المستودعات ب4 جنيه مانعين حد ياخد غيرهم ويطلعو يبعوها في الشقق علي حسب الحالة الاجتماعيه ب10 او ب20 او ب30 او 40 علي حسب والمسكين اللي محتاجها مشلاقي ياكل عشان مش لاقي غاز - تلاقي اصحاب المطاعم مستغلين انابيب غاز الطبخ بتاعة البيوت عشان يكسبو اكثر - تلاقي مطاعم كتير وعالميه بستغل الدعم اسوء استغلال واسمهم مستثمرين - صاحب محطة البنزين بيتصل عليه سواق سيارة نقل البنزين ويساله علي المحطة ولا بره بره هو متفق مع ناس هتاخد الحمولة تتصرف فيها في مقابل الف والفين جنيه زيادة والسواق مش لاقي سولار فيرفع الاجرة والراكب المسكين هو الضحيه والكل يعبي كرشه تعرفو ياسادة ان سواقين لاجرة بيفرحو بازمات الوقود عشان يغلو الاجرة وعمركم سمعتم ان اجرة ميكروباص ولابيجو غلت مع الازمة ونزلت مع انفراج الازمة - دا غير مهربين السولار بره مصر لغزة والاردن ولبنان وكذلك البنزين - ياسادة انت زعلانين ان انتم ربنا فتح عليكم وعندكم سيارات بتقولو ان الدعم ويخربيت وبتتعصبو ياعني اهاليكم ملهمش حق عليكم اهاليكم الغلابة اللي معندهمش سيارات فيها ايه لما يزيد مثلا عليك 50 جنيه في الشهر انا مش شايف مشكله وبعدين البلد اللي انتم زعلانين منها دي ياما عملتلكم --ولو مشينا بمنطق مليش دعوة وانا مش مسئول عن الدعم وانا دفعت ضرايب علي السيارة ومصاريف ادارية ياما ومليش دعوة طيب دفعت تكاليف تعليمك - دفعت تكاليف علاجك - دفعت ايه بس قوللي لو كل واحد فينا دفع مصاريف تعليمه الحقيقية محدش فينا كان هيدخل كليات اصلا وياعالم ممكن يعرف يشتري سيارة ولا لا البلد عطت كتير لازم نساعدها عشان تقدر تساعدنا لازم نساعد في الحل هناك الف حل عشان تقليل الاثار السلبية للتحكم في الدعم وترشيده يجب ان احنا نطرحها علي المسئولين كل واحد متضرر من ترشيد الدعم يفكر في حل لمشكلته قبل ما يتعصب ويقول مايكره ويكرهه الشعب بدل الوقفات الاحتجاجية والاضرابات والاعتصامات نقدم حلول لمشاكلنا ونشارك في حلها والدعوة ليكم كلكم افكاركم ايه لترشيد الدعم وكذلك التقليل من سلبياته علي المجتمع واسف اذا كنت طولت عليكم