الموضوع: تقريري عن صني 2003 أوتو بعد بيعها

بسم الله الرحمن الرحيم

أولا: أنا ما بعت السيارة لعيب فيها أو لمشكلة تشتهر بها السيارة ولكن لمجرد إني ماكنتش عارف أصلحها وأنا في المنوفية وكمان ماكنتش لاقيلها حاجه عندنا خالص، وبالتالي كنت بريح دماغي وأروح التوكيل في مصر حيث مقر عملي .. وطبعا انتو عارفين التوكيلات أسعارها عامله ازاي (طبعا الجوده مافيهاش شك والعمر أطول بكتييييييييير من التقليد) ...

ثانيا: أنا وعدت الرجل الفاضل (م أحمد مصطفى) بعمل تقرير عنها بعد البيع ولكني تأخرت لأني تأخرت في البيع وأيضا شراء سيارة أخرى وكان النصيب في (أكسنت 2010) .. فابعتذر للـ م أحمد على التأخير ولكن جئت لأوفي بوعدي ...

وصفي الشخصي للسيارة

((من الخارج))

- السيارة لا أبالغ إن قلت أنها من أفضل الصاج والبوية في مصر على الإطلاق، تخيلو انها 2003 وكانت في نظري أحسن من أكسنت 2010 بالذات الجودة وسمك الصاج (مع العلم نيو أكسنت بالذات فعلا صاجها محترم).
- الكابود بتاع العربية كنت برفعه بيد واحد بقوة أو أفضل كنت أرفعه بيدي الاتنين (من قوة وتحميل الصاج)
- فتح الأبواب فعلا له طعم مايتوصفش بالكلام وزاية فتح الباب كانت كبيره ماشاء الله
- الفوايس الأمامية عريضة جميلة ونورها تمام رغم إنها من 2003
- الشبكة النيكل ماقشرتش ولا بهتت، ياباني بأه هاتقول إيه
- الإكصدامات جامدة ومرنه في نفس الوقت (المعادلة الصعبة) بجد بتستحمل جدا
- الشنطة إلى حد كبير واسعة وأرضيتها جامدة مش زي أكسنت الأرضية هبطت لما حطيت عليها الاستيبن ..

((من الداخل))

- طبعا أول فارق حسيته للوهله الأولى جود الخامات الداخليها كلهااااااااا عن الكوري وإن كان الكوري مش سيء ولكن الياباني توب
- فرش الكراسي كان الفابركه وكان فابريكه زي ماهو وخامته خطيره بحيث لو أي شيء سطحي بيبقع بمجرد مسحه بيدك كده مرتين يروح تحس إنه عامل زي القطيفه كده
- الدريكسيون بيحسسك إنك سايق أحسن سيارة في الدنيا
- التابلوه أنا بصنف نيسان عامة بأحسن تابلوهات من ناحية الزوق والعملية في نفس الوقت والجوده طبعا كمان
- التكييف مش محتاج كلام لأن الياباني معروف، كان جايبلي برد على طول
- الفتيس الأوتوماتيك حكاية والله كالجديد (أنا أصلا لا أركب أوتوماتيك إلا إذا كان ياباني من قناعتي بجود صناعة اليابان للفتيس الأوتوماتيك حتى لو في عربيه كارو)
- مساحات التخزين جيده جدا
- الكراسي الأمامية واسعه جدا ومريحة جدا
- الكراسي الخلفية مريحة جدا ولكن مش واسعه بالدرجة الكافية لكن مش ضيقة
- السماعات كانوا 2 فقط ومكانش الصوت نقي قوي لكن كانت قويه جدا
- الكاسيت (كلاريون ياباني شرائط) مش محتاج كلام على الجوده والأداء
- السنتر لوك قوي جدا ـ وكان أوتولوك عشان الأطفال (ميزه وعيب بحيث انه لازم يكون معاك مفتاح في الميدالية للمواقف دي يعني لو نسيت السيارة دايره وأغلقت الباب بيعمل لوك بعد كام ثانية كده)
- التابلوه كان فيه مكان مخصص لعلبة المناديل، مفتقده الآن في الأكسنت اللي معي

((الحوض))

- الحوض بأه ده بصنفه تاني أفضل حوض من ناحية التصميم وتوزيع الأجهزه بداخله (الأول هوندا) دا طبعا بعد المعاينة في سوق السيارات بمدينة نصر الجمعة قبل السابقة.
- أنا مش خبير في الميكنه قوي لكن هاقول على أد ما أقدر، يعني الماتور قوي صوته عالي بعض الشيء لكن تحسه علو قوه مش علو معيوب
- سير الكاتينة جنزير وده ميزه وعيب في نفس الوقت (الميزه: ان الماتور مابيتفكش ولا حد يجي جنبه عشان تغيير سير الكاتينة - العيب: إن سير الكاتينه الجنزير بيعمل صوت شوية بالذات في الجو البارد لغاية أما تسخن العربية)
- ورا الإكصدام الأمامي وده تشوفه من الحوض فيه حاجة كانت عجباني جدا ودي بتنفع في وقت الحوادث لا قدر الله، إن فيه زي بار سميك كده ورا الإكصدام وسدر العربية من جوه تحت شويه كأنه إكصدام داخلي، يعني لو حاجة وصلت للحوض من جوه يبقى إنت أكيد دخلت في قرن حيطه على سرعة عالية
- الأجهزه في الحوض واضحه (كل على حدى) يعني لو صنايعي لسه بيتعلم يعرف يشتغل فيها

((العفشه))

- عفشة العربية دي حكاية بالذات من ناحية قوة التحمل، اعتمادية بدرجة كبيرة
- العربية إلى حد كبير عالية عن الأرض ولكنها طويله بعض الشيء لذلك ممكن تحك بسبب كبر قاعدة العجلات مش إنها واطية
- الفرامل كأنها ABS بجد ممكن تكفيك على وشك لو مش متعود عليها وضغطت جامد مره واحده
- المساعدين واللايات زي أي ياباني بيديك قوه ونعومه في نفس الوقت
- لكن السيارة عامتا تحس كأن عفشتها رياضية يعني بوجه عام مش ناعمة أوي لكن ده بيد ثبات على السرعات فظيع

((الأداء))

- السحب إلى حد ما جيد في الغيار الأول والثاني (أوتو مش مانيوال) لكن بعد كده افتح الهاويس، خلي بالك عشان والله 120 زي 100 زي 80 مش فارقه وأنا آخري كنت بوصل 130 (لأني مش جراي أوي)، وطبعا ده لعدة أشياء: (الصاج محمل فالوزن تمام - السيارة عريضة - عفشة شديدة شويه)
- العربية مؤشر الحرارة على ربع مابيعديش ...
- العربية ممكن تروح بيها قاهرة اسكندرية قاهرة، تمون وتتوكل على الله فقط مادمت مصين ومراعي عربيتك
- البنزين استهلاكه كان جيد جدا خاصة انها أوتوماتيك يعني في حدود تقريبا من 6.5 إلى 7.5 ليتر لكل 100 كيلو وده كويس جدا (1300 سي سي بيطلع حوالي 92 حصان وكمان أوتو وتكييف ساعات وساعات)
- العربية دي عايزه فئة من الناس اللي هو عايز عربية كعربية مش جري وسباقات وحرق وحاجات من دي، جميييييييييلة جدا ليك وللأسرة
- قطع الغيارة غالية وتواجدها في الأقاليم ضعيف لكن معمرة جدا

((العيوب))

- بالنسبة لي مافيش عيب غير إن قطع الغيار والصيانة اللي كانت مكلفاني عشان أنا مش من القاهرة، وسعر إعادة البيع مش قوي
- الإريال بتاعها في القائم وده عرضه للقطم كثيرا بالذات في الأقاليم، وأنا غاوي اسمع راديو وأنا سايق واريلها غالي، تخيلوا الإريال بتركيبه كنت سائل عليه بحوالي 260 جنيه في التوكيل
- المقاعد الخلفية اتنين مرتاحين حتى لو أحجام أو تلاته بس أحجام مش كبيره
- عامتا كتير من الناس بتعترض على السحب بالذات في الأول والثاني أوتو مع إن ده شيء طبيعي في العربية دي وغيرها من الأجيال دي، لأن اللي بيقارن بيقارن بين الأوتوماتيك العادي ده والتقنيات الجديدة اللي خلت أول وتاني أوتوماتيك كأنك مانيوال (بس ادفع ياريس)

نأسف على التأخر بالتقرير مره أخرى وده اللي أنا فاكره بالنسبة للسيارة المحترمة جدا نيسان صني 2003 اليابانية بالكامل

وادعو لي بالبركة في السيارة الكوري الجديد هيونداي نيو أكسنت 2010 سمراء هههههههههههههههههه

وآسف للإطالة وإن كانت متعمده لأنه هناك من يحتاج إلى مثل هذا التفصيل من رواد أفضل منتدى سيارات ألا وهو نايل موتورز .

شكر خاص لقسم نيسان ومنسقه النشيط (م أحمد مصطفى)، للعلم هو كان السبب في البيع حيث دل المشتري على سيارتي بعد عرضي لها هنا والمشتري من أعضاء نايل موتورز أيضا .. والسلام عليكم ورحمة الله وبركاته