تجربتى مع الغاء حساس egrٌُُ

**romiobasha** · 07-10-2012 04:28 PM

بسم الله الرحمن الرحيم

الموضوع باختصار ماشى فى امان الله بهدى عشان مطب العربية بطلت و دى كانت مفاجأة بالنسبة ليا لأنها اول مرة العربية تعمل كده (مع العلم العربية استرا 1600 اوتوماتىك 2005) و طبعا اول حاجة بصيت عليها كانت الحرارة و الحمد لله كانت فى الطبيعى
اخدت يمين و استانيت شويا و بعدين دورت اخدت وقت ودارت و بعدها لاحظت ان لمبة الأعطال مش منورة و طبعا كبرت الدماغ و مشيت .
الموضوع كان بيتكرر على فترات وجت فى مرة و انا مسافر بقت كل ماجى اهدى تبطل و طبعا كانت بتغيب فى الدوارة و فى مرة حلفت ماهى دايرة .
المشكلة انا رحت حتطها على جهاز كشف الأعطال و كانت النتيجة مفيش حاجة و طبعا الصنايعية اجمعوا على انها طرمبة البنزين او فيوزها , و بعد تغيير الطرمبة ب واحدة اصلى المانى و فلتر بنزين و فيوز و عطلة 3 ايام .
نفس المشكلة اتكررت و بالصدفة وانا ماشى قابلت شاب راكب نفس العربية فقولت اسأله و قاللى جرب تنظف الحساس بتاع ال " EGR " , و فعلا لما فاكيته و نظفته العربية بقت تمام الحمد لله بس بعد كام شهر كده رجعت تانى تعمل نفس الحركة بس المشكلة ان التنظيف بقى مش نافع ولا محوء معاه .
طبعا سألت عليه استيراد كان عامل من 300 ل 400 حسب الفصال , جديد لقيت المانى و انجليزى فى حدود 1000 و طبعا ممكن يطلعوا صينى فى الأخر .
بعد قراءة عن وظيفة الحساس و طبيعة عمله و استشارة الخبراء أ/فادى "hellboy" قررت الغاء الحساس و التجربة
اعراضه
العربية بتبطل لمل تيجى تهدى او تقف ,
وظيفة
EGR exhaust gas re circulation
و ده يعنى إعادة تدوير غاز العادم بمعنى ان بعض الغازات الناتجة من عملية الأحتراق داخل الموتور لن تذهب مباشرة الى الشكمان و لكنه ياخذ بعض هذه الغازات الى غرف الأحتراق مرة اخرى وذلك للحفاظ على البيئة ورفع درجة حرارة الغرفة لتوفير كميات من البنزين فى البلاد صاحبة الجو البارد .

الادوات المطلوبه
1-مفتاح نجمة T 10
2-مفك صليبه

خطوات العمل :-
نفتح كبوت العربيه
هنلاقي EGR علي ايدينا اليمين جنب البطاريه

علشان نفك ا ج ر هنعمل الاتي :-
1- نفك المصمارين الصليبة بتوع وش الفبر بتاع المكنة المكتوب عليه ECO TEC
2- نفك فيشة الحساس كما هو موضح بالصورة

3-نفك المصمارين النجمة اللى ماسكين الEGR فى جسم المكنة .

4-تخللى بالك فى جوان معدنى تحت ممسوك بالمصامير عشان ما يضيعش منك و ده شكله

معلومة مهمة فى بلف بينزل من الEGR بيبان مكانه فى الجوان على شكل دايرة و هو ده اللى بيعلق و مش بيرجع لى مكانة الطبيعى لما تيجى تهدى و ده بيؤدى الى ان العربية تبطل و متدورش الا لما يبتدى يرجع مكانه ببطأ شديد نظرا للكربون المحيط به و بعد مدة من الزمن البلف نفسه بيتلم و يبوز.
5-نجيب علبة كانز نظيفة "او حتة صاج" و نقصها بحيث تكون على شكل ورقة و دى شكلها

6-هنبتدى نقصها على شكل الجوان زى كده

7-نعمل حساب المصمارين و نضعها ما بين الحساس و الجوان و نركب الEGR تانى فى مكانه و نربط المصامير جامد
8-ماتنسوش تركبوا فيشة الحساس تانى قبل الدوارة.

العربية بعد الغاء عمل الEGR بجد بقت احسن كتير و فرق كبير فى السحب
يا رب يكون الموضوع مفيد و يعجبكم