الموضوع: تغير قاعدة الموتور

حبايبى الايبيزاويه
الحمد لله انهاردا غيرت قاعدة الموتور الاماميه ( الى فى القنطره )
الموضوع بكل بساطه ان كان فى دبدبه جامده الصراحه مع كل حاجه بعملها ادوس بنزين او فرامل او بعدى على طوبه صغيره كده يعنى
روحت لواحد من فتره وقالى كلام عجيب قوى قالى بص يا باشا احنا نحل العافشه كلها ونشوف ايه الى بايظ ونعمله طبعا مروحتلوش تانى وقولت كده فل قوى انا مش هعملها وفعلا اتعودت عليها
وانا بظبط زوايه من كام يوم كده لقيت الراجل بيقولى انتا محتاج قاعدة موتور قولتله اشمعنا قالى بتسمع طقطقه او دب وانتا ماشى قولتله اه قالى غيرها وابقى طمنى
بينى وبينكم مكدبتش خبر روحت انهادا جبت قاعده اماميه استيراد عامله 100 جنيه
وروحت طالع على العفشجى الى جمبى وعملهالى واحد 10 جنيه
النتيجه
مفيش اى حاجه خالص كانى عامل صوت العفشه على الصامت فرحت قوى الصراحه وقولت بالمره اغير زيت الموتور واشوف زيت الفتيس
اكتشفت حاجه ان زيت الفتيس تقريبا الى كان موجود يعنى نقدر نقول نص لتر او لتر بالكتير ولونه مش حلو ده حتى الريحه بتاعته مكانتش حلوه
مطولش عليكو غيرت زيت الفتيس وحطيت زيت 140 تعاون ( رغم ان المهندس ايهاب قالى ان المفروض يتحط 90 ) بس كانت مكالمتى لايهاب بعد ما غيرت والحمد لله دلوقتى صوت الموتور هادى وناعم ـ وصوت الدبرياج ( الى محمد سيد علق عليه اخر مره اتقابلنا ) بعد ما غيرت زيت الفتيس مبقاش فى اى صوت والحمد لله
نصيحه
اكشف على زيت الفتيس كل مره بتغير فيها زيت الموتور وديه نصيحه الراجل الى غيرلى الزيت وحبيت اقولهاكم
وربنا يستر طريقى وطريقكم

المشاركة الأصلية كتبت بواسطة eemmoo

بس ايه علاقه قاعده الموتور بالدبدبه اللى كنت بتحس بيها مع ان القاعده دى مش جزء من اجزاء العفشه

يا باشا انا كل ما بدوس بنزين او بدوس فرامل الطبيعى ان الموتور بيتحرك من العزم بتعاه ( ده على ما اعتقد ) الحركه بتاعت لمتوب ديه بقى لما تكون القاعده تقريبا مهلهله يعنى متأكله بشده كده هيبقى فى دب
هيا فعلا مش جزء من العفشه بس هيا كانت عامله صوت حتى وانا بعدى على طوبه
تقدر تقول كده موتور مش متسبت يعنى مع كل حركه الموتور بيدب فى القنطره وشكرا على مرورك ويا رب اكون قدرت اوضحلك قصدى
وربنا يستر طريقى وطريقكم