محتاج نصيحه فى شراء برنتر و سكانر للمنزل

**mazdaprotege** · 09-10-2012 12:31 AM

اخوتى الاعزاء
سلام الله عليكم و رحمته و بركاته
بصراحه انا عاوز اشتري جهاز برنتر و سكانر و تصوير ورق لاستخدام المنزل و الاولاد و المذاكره فانا ما عنديش خبره خالص فى الموضوع ده
ارجوكم تنصحونى بايه ممكن اجيبه ماركه و نوع يكون كويس و سعر احباره تكون كويسه مش مباغ فيها و تعيش و هل اجيب جديد و لا مستعمل و لو حد عنه حاجه نظيفه و حالتها كويسه و مش بيستعملها ممكن يقول لى و انا منتظر ردودكم و لكم جزيل الشكر
و الله الموفق

**vmallek** · 09-10-2012 09:52 AM

ال hp افضل لان احباره متوفرة - طابعة الليزر افضل من ال "انك جيت" لكن سعرها اعلي

**ramyhekal** · 09-10-2012 10:08 AM

الليزر كويسه بس مفيهاش الوان ابيض واسود فقط انا عندى 4 فى 1 hp 4500 بقالها سنه زى الفل ممكن تجيب زيها تقريبا كانت ب 400 ج الحبر لما يخلص بيتملى ب 20 جنيه اسود والوان

**peposupervisor** · 09-10-2012 10:17 AM

+11111111111111111
متفكرش هي hp

**Land_Cruiser** · 09-10-2012 10:51 AM

حسب أولويات حضرتك تقدر تختار و عندك أما الlaserjet أو ال inkjet

كل واحده فيهم ليها مزايا و عيوب

ال inkjet :
مزاياها: سعر شراءها رخيص - بتطبع الوان بالاضافه إلى الأبيض و الاسود
عيوبها: حبرها غالى و بيخلص بسرعه و لو ما استخدمش فتره ممكن ينشف و يبوظ - بطيئه - فرصه اكبر ان الورق يتحشر أثناء الطباعه ( سعرها يبدأ من ٣٥٠ جنيه)

ال laserjet :
مزاياها : اقتصاديه فى التشغيل و قليله الأعطال جداً - سريعه و ملهاش مشاكل تقريبا
عيوبها : سعر الشراء غالى ( يقرب على ضعف الانكجيت) و طبعا ابيض و اسود فقط

لو مش محتاج الالوان أنصحك بال laserjet و كان فى موديل كويس m1132 pro و ده كان سعره ٧٥٠ من فتره و احتمال يكون نزل عن كده كمان و يستحسن تخليك فى ماركه hp سواء كانت ليزر أو دسكجيت و ابعد عن المستعمل لان لو فيها مشكله الحاجات دى ما بتتصلحش و فى الاغلب بتترمى. بالنسبه للإمكانيات في موديلات جديده فيها wireless علشان ما تضطرش توصل الكمبيوتر بالطابعه عن طريق كابل ال USB بس ده موجود فى الموديلات الغاليه و طبعا معيار الحكم على جوده الطبعه من خلال ال resolution بتاعه الطباعه يعنى الاحسن هى الاعلى و كمان عدد الصفحات اللى تقدر تطبعها فى الدقيقه و حجم الذاكره بتاعه الطابعه علشان لو حبيت تقارن بنفسك لان الموديلات كتير جدا و المعلومات دى بتبقى مكتوبه على الكرتونه أو تقدر تعرفها من الانترنت قبل ما تشترى و بالتوفيق

**douha_wise** · 09-10-2012 12:18 PM

من واقع خبرتى البسيطة فى البرنتر برضه مع اولادى فأنا انصحك بالليزر لأن بيطبع عدد اوراق اضعاف النوع الثانى ولو تركت البرنتر بدون طباعة او استخدام لفترة مهما كانت البودرة التى بداخله لا تنشف
فأنا بعد لف و دوران لأنى كنت حريص اشترى نوع 3*1 عشان نسخ الورق فحصرت متطلباتى فى نوعين الاتش بى M1132 Pro و الكانون MF3010 و بصراحة الغالبية العظمى من بائعى البرنترات و اصحاب الخبرة نصحونى بالكانون لأن ضمانها 3 سنوات بخلاف الاتش بى سنة واحدة و فيها مميزات افضل من الاتش بىو كمان صناعة كورى و ليست صينى غير إن الكارتريدج بتاعها هو نفسه بالظبط بتاع الاتش بى M1132 Pro يعنى مش هيبقى فيه مشكله فى انك تملأه و هى برضه 3*1 على فكرة و انا اشتريتها من حوالى شهرين و مبسوط منها و ربنا يبارك فيها و سعرها كان 800 جنية من سوق العصر و اغلى شوية بسيطة من الاتش بى لكن فارق الصناعة و الضمان اكثر و امكانيات اعلى