قوليلي يا د. ضحي ان الدم كان صلصة والفيلم هايخلص والميتين هايصحو
قوليلي ان الدم اللي شوفته ده كان عصير طماطم
وان الجثث والاجزاء دي كانت لحمة راس من عند بحة بتاع الناصرية مش اجزاء بني ادمين
وان القصر العيني اللي مكانش فيه مكان لرجل كان كابوس ووهم
وان العملية في بطن مصاب في موقعة الجمل وكانت بتتعمل في طرقة قصر العيني عشان مفيش اوض عمليات دي كانت اوهام رغم اني صورت بموبايلي
قوليلي اني كنت مدمن بانجو عشان عشت الوهم ده
حتي البالطو بتاعك الاحمر اللي الدم كان عليه اشكال والوان قوليلي انه كان شميز احمر وانا اللي كنت عايش التهيؤات
وان المشرحة المليانة جثث ومش لاقيين يودو الجثث فين كانت مجرد ماكيتات
ده انا قعدت ايام مابشوفش النوم واقوم مفزوع من كمية الدم والضرب
وانتو بكل بساطة تقولو برائة ليهم كلهم يا قضاة مصر
كان وهم يا د. ضحي صح؟
كان بيتهيالي
حسبنا الله ونعم الوكيل
----------------------------------------------------
الكلام ده انا كتبته من شوية على وول دكتور ضحي زميلتنا
مش عارف ليه كتبته على الوول بتاعها
بس اكيد عشان الايام السودا اللي عشتها في التحرير وفي قصر العيني كانت هي طرف فيها
يمكن هي واخدة على منظر الدم
انا فرق معايا الدم
كل نقطة دم سالت من شهيد ولا مصاب ولا واحد عاش عمره بعاهه
انا مش مسامح كل واحد مسح دليل ادانة
يا قاضي مصر
يا عظيم
يا كبير
يا اللي المهنة تكليف مش تشريف
هاتقول ايه لربنا على دم الشهدا
لو اتغصب عليك ليه ما سيبتش القضية بدل ما تحكم وانت عارف انها ممسوح ادلتها
قلبي معصور على كل قتيل وجريح شوفته في ايام التحرير