بدايه السلام عليكم ورحمه الله

حجزت صيانه ٥ الاف للعربيه ورحت ١٠ صباحا السبع زهراء المعادي

الاستقبال مميز جدا عن استقبال مودرن موتورز

بجد تحس ان مودرن موتورز ورشه تحت الكوبرى بالنسبه للسبع

المهم استلمو العربيه وسألونى عن المشاكل وطبعا مكنش فى مشاكل غير حاجه واحده بس

الفبره الى فوق النمره الدهان الى عليها اتقشر جامد جدا وكنت ذكرت الموضوع ده سابقا

والموضوع كان مضايقنى جدا لانى بمجرد غسيل السياره الدهان الى عليها فرقع وبقى شكل الفبره وحش جدا

هما ردو عليا وقالولى ان مهندس الضمان هايشوف هايعمل فيها ايه


طلعت الدور التانى واخدت خصم ١٥ جنيه على المشروبات او المأكولات

كنت شايف العربيه فى ورشه الصيانه

فجأه لاقيتهم بيشيلو الدهان بالكامل من على الفبره

ومهندسه الصيانه اتصلت بيا وقالتلى ان مهندس الضمان هايدهن الفبره بالكامل فى الضمان بس هاتتأخر معانا لحد الساعه ٣

انبسطت جدا لان محصل جدال بسبب الفبره لان فعلا المشكله من سوء الدهان لانها اتقشرت ومتكحتتش

ممنوع طبعا حد يدخل الورش لكن لاقيت عمرو فهيم لاعب الزمالك والاسماعيلي السابق بتجول داخل الورشه بكامل حريته

طبعا كوسه ولانه بيعمل صيانه لسيارته الانفنتي

جت الساعه ١٢ ولاقيت مندوب من السبع بيقول ان فى عربيه هاتروح كارفور المعادي مجانا لمده ساعتين وترجع تانى

بجد حاجه جميله جدا من مركز السبع لعدم توافر خدمات بالمنطقه ولكسر الملل لرواد المركز

العربيه اتغسلت من الداخل والخارج

وطبعا فى شاشه كبيره جدا موجود عليها جميع العربيات الى موجوده بالورشه وايه الى بيحصل فى عربيتك وهى فى اى مرحله دلوقتى

كان حساب الصيانه كالاتى

صيانه ٥ الاف صنى ٢٠١٣ بدون تغيير زيت

٧٥ جنيه قبل الخصم والضريبه

٦٢ جنيه بعد الخصم والضريبه

وخرجت من مركز الصيانه وانا راضى عن اداء مركز صيانه السبع زهراء المعادي

ونادم اشد الندم علي صيانه الاف كيلو السابقه بمركز مودرن موتورز هايكستيب