تقرير عن صيانة 5000 وعلاج عضة الفيتيس الاوتوماتيك

**HOSSAM_GABRE** · 14-12-2010 08:23 PM

الحمد لله النهاردة روحت مودرن موتورز الحضرة وعملت صيانة 5000 الدورية المعتادة
المهم انا كان عندى مشكلتين
الاولى :-
كنت بلاحظ اهتزاز فى الدركسيون على السرعات العالية
الثانية :-
كان فية عضة جامدة والفتيس بيتحرك من والى الوضع p مع سماع تكة معدنية بالاضافة الى حدوث نتشة خفيفة لما الفتيس بينقل اوتوماتيك من التانى الى التالت

قولت كمان بالمرة استفيد من العرض بتاع الاكسسوارات وطلبت تركيب باركينج سينسور ووحدة رفع ب 550 جنية بدلا من 650 جنية .

العربية دخلت الصيانة الساعة 10.00 ص
فى البداية طبعاً تم تركيب حساسات الركن , ووحدة الرفع
هما هناك نصحونى انى اركب عدستين بس وعطولى العدستين التانيين علشان الاكصدام فية مكان لاتنين بس والافضل عدم التثققيب فى الاكصدام وخيرونى بصراحة , وقالولى ان الاتنين سينسور حيقموا بدور الاربع عدسات كاملين ,
انا بصراحة ما كنتش محبذ فكرة ان يتعمل خرمين اضافيين فى الاكصدام المهم ركبت اتنين واخدت الاتنين التانيين معايا
نيجى بقى للمشاكل الاساسية
المشكلة الاولى
وجود اهتزاز فى الدركسيون على السرعات العالية ودى طبعا كانت العربية محتاجة ترصيص وتم فعلا والتكلفة تقريبا 40 جنية
المشكلة التانية
عضة الفتيس
المهندسين فعلا قالوا ان فيه عضة فى الفتيس
وحسب كلام المهندس ان فية 3 حاجات ليهم علاقة بالفتيس والنقلات
1 - وحدة التحكم ودى هو عمل تشك عليها فى الاول بالكمبيوتر وغالبا عمل ريسيت للعربية لان الكاسيت طلب كود التشغيل , وبردة العضة كانت موجودة .
2 - حاجة فى الكبوت على الشمال اسمها drop resistance ( مش عارف الاسم كده صح ولا غلط ) ودى اللى كانت المشكلة فيها ,
هو فكها ونضفها بالاسبراى وركبها تانى , والحمد لله
العضة راحت وكمان النتشة اللى بين التانى والتالت والفتيس بنقل اوتوماتيك راحت .
3 - الحاجة التالتة اللى ممكن تأثر الفرامل وطبعا الحمد لله الفرامل سليمة ما فيهاش مشكلة .

بعد الانتهاء الساعة 4.00 اخدت العربية جربتها مع مندوب من التوكيل وكانت زى الفل
اخدتها بعد كدة جربتها على الوراعى والدولى , والحمد لله صوت الموتور اهدى بمراحل وما فيش اى اهتزاز , والحمد لله العربية زى الفل والعضة والنتشة راحوا نهائيا
انا حبيت انقل التجربة لان احد الاخوة كان بيعانى من نفس مشكلة عضة الفتيس , وان شاء الله يستفيد .

**د.أحمد السعيد** · 14-12-2010 08:41 PM

مبروك الصيانة وحل المشاكل بس
هو الترصيص تبع الضمان يا اسيادنا و لا لأ يعنى بدفع له فلوس و لا ضمن الصيانة الدوريه

**HOSSAM_GABRE** · 14-12-2010 09:22 PM

المشاركة الأصلية كتبت بواسطة د.أحمد السعيد

مبروك الصيانة وحل المشاكل بس
هو الترصيص تبع الضمان يا اسيادنا و لا لأ يعنى بدفع له فلوس و لا ضمن الصيانة الدوريه

طيب ما احنا فى الصيانة الدورية بندفع تمن الزيت وتمن فلتر الزيت يعتى من مجانية
الترصيص ليس له علاقة بالضمان لانه مش عيب فى العربية دا حاجة طبيعى انها تحصل وعلاجها باضافة رصاص

**Bishoy.Girgis** · 14-12-2010 10:29 PM

الف الف مبروك استاذ حسام علي الصيانة و علي المشاكل اللي كانت بتقابلك و كويس انك ضفتلنا معلومة قيمة جدا بتصليح نتشة الفتيس
الف مبروك

**HOSSAM_GABRE** · 15-12-2010 01:02 PM

المشاركة الأصلية كتبت بواسطة peaceman

الف الف مبروك استاذ حسام علي الصيانة و علي المشاكل اللي كانت بتقابلك و كويس انك ضفتلنا معلومة قيمة جدا بتصليح نتشة الفتيس
الف مبروك

ربنا يبارك فيك يا استاذ بيشوى , والف شكر لمرور حضرتك بس هو كان يوم علقة بصراحة

**doc_semsem** · 15-12-2010 04:01 PM

طيب انا قرت هاروح للسبع واقولهم على نتسة الفتيس الأوتوماتيك ده؟؟
بس حضرتك ممكن تقولى عاملوا اية بالظبط؟

**Ahmed.TV** · 15-12-2010 04:24 PM

الف مليون مبروك يا استاذ حسام على الصيانة

تقرير قوى جدا ومفيد بجد

مع انه حيشغل هاجس الوسواس عند الناس فى نقطة العضة والنتشة دى واللى مش عنده حيتلكك هههههههههه احيانا فى ناس كدا

انا عاوز بس اعرف النتشة دى كنت بتحسها وانت ماشى صح ولالا عشان نوضح اكتر للناس والعربية بتنقل لوحدها غيارتها

والعضة امتى بالظبط

انا اعرف موضوع النتشة دى تظبيط حساسات

عشان نحدد اكتر عشان الناس تعرف تفرق بين لو فيه مشكلة عندهم شبيها بمشكلة حضرتك ولالا ام الوضع عندهم عادى

ولكى منى كل تحية وتقدير

وتقري مفيد وجزاك الله خيرا عليه

**HOSSAM_GABRE** · 15-12-2010 04:36 PM

المشاركة الأصلية كتبت بواسطة ahmed.tv

الف مليون مبروك يا استاذ حسام على الصيانة

تقرير قوى جدا ومفيد بجد

مع انه حيشغل هاجس الوسواس عند الناس فى نقطة العضة والنتشة دى واللى مش عنده حيتلكك هههههههههه احيانا فى ناس كدا

انا عاوز بس اعرف النتشة دى كنت بتحسها وانت ماشى صح ولالا عشان نوضح اكتر للناس والعربية بتنقل لوحدها غيارتها

والعضة امتى بالظبط

انا اعرف موضوع النتشة دى تظبيط حساسات

عشان نحدد اكتر عشان الناس تعرف تفرق بين لو فيه مشكلة عندهم شبيها بمشكلة حضرتك ولالا ام الوضع عندهم عادى

ولكى منى كل تحية وتقدير

وتقري مفيد وجزاك الله خيرا عليه

احمد باشا انت نورت الموضوع يا فندم النتشه اصلا كانت موجودة والفتيس بينقلل اوتوماتيك من التانى الى التالت وطبعا العربية ماشية على D مش موجودة غير فى النقلة دى , ثانيا عضة الفتيس كانت وانا بعشق على p انا ممكن اوصفهالك زى ما تكون راكن العربية فى مطلع وعشقت على p من غير تدوس فرامل جامد وبعدين تيجى تتحرك على d مثلا , تخيل شكل عضة الفتيس عاملة ازاى ساعتها دا كان بيحصل معايا بس الفرق ان العربية لا كانت فى مطلع ولا حاجة وكنت بدوس فرامل وامور العربية على النورمال واشد الهاند بريك قبل ما اعشق على p

**doc_semsem** · 16-12-2010 04:13 PM

طيب حسام باشا انا عندى الفتيس بيكون فيه تقل كتير قوى ونتشة وبمعنى اصح عضة لما اجى اجيب الفتيس من الpالى اى غيار تانى سواء العربية فى مطلع او عادى؟؟؟
ياترى حضرتك قولتلى انهم نضفوا ايه بالظبط؟؟؟؟؟
شكرا