فضيحة اوماترا اللى بتجيب قطع الغيار من الحرفيين !!

**Teko0o** · 13-10-2012 12:32 PM

المشاركة الأصلية كتبت بواسطة ashturbo

سمعة أوماترا سبقاه .

عندك حق والله بس المشكلة ان البرافو عربية جميلة جدا فى كل حاجة و دة اللى مصبرنى عليها مشكلتها الوحيدة فى توكيلها

**Teko0o** · 13-10-2012 12:35 PM

المشاركة الأصلية كتبت بواسطة hm414

انا لو مكانك هبلغ الشركه الام لانه كده التوكيل بيسمسر على قفا الشركه الام ودي ممكن يتسحب فيها التوكيل

بلغ انه بيبيع قطع غيار مستعمله وانه بيجيب بضاعه مضروبه على6 انها اصليه وبيبيعها لحسابه

ومعرفش جهاز حماية المستهلك بيتدخل في الامور دي ولا لا

تحياتي

ماهو علشان تبلغ لازم يكون عندك اثبات لحاجة كبيرة زى كدة و طبعا مش كلام الحج محمد اللى عند مجدى بيومى هيعترف بيه :)
و للأسف احنا تقريبا ماعندناش جهاز حماية مستهلك, و حتى لما فكرت اروح اعملهم قلق و فضيحة هناك و ادخل للمدير صاحبى قاللى ما اكيد المدير عارف الكلام دة و مافيش حاجة بتعدى من تحت ايده
حسبى الله و نعم الوكيل

**Teko0o** · 13-10-2012 12:43 PM

المشاركة الأصلية كتبت بواسطة yasserelsayad

بصراحة انا مش بصدق كلام التجار غير لما بشوف بعينى

للأسف يا ياسر دة اللى بيحصل فعلا و انا كنت بسمع كلام كتير اوى عن الموضوع دة و ماكنتش مصدق زيك و بقول مستحيل دى سمعة توكيل و الكلام دة كله, بس لما روحت و شوفت انصاص عربيات زى الجيتا الجديدة اللى ما كملتش سنة و جولف 6 و بى ام x1 و اكتر و اكتر صدقت
وبعدين خللى بالك هو لما بيعمل الحركة دى و يجيبلك استيراد مش هيجيبلك حاجة ظاهرية, بمعنى اوضح فى حالتى مثلا .. لما يجيبلى المانيفولد استيراد هل انا هفتح الكبوت و هبص و هعرف انه جديد ولا لأ ؟؟ مكنة الازاز اللى بايظة عندى و قاللى هتعمل 1200 و روحت لاقيتها ب 400 جنيه هل انا هفتح الباب من جوا و اشوف المكنة جديدة ولا لأ ؟ الحاجات دى عادى يقولك اسلك امورى و اخلصها من هنا. يا راجل دة حتى لو باب و لا شنطة ولا كبوت الحاجات دى مرمية فى الحرفين و بحالة الزيرو
لكن لو حاجة ظاهرية و مش متاحة ممكن يكلف نفسه و يطلبهالك
و عايز اقولك ان عربيتك اكتر عربية ليها حاجات هناك ابقى خللى بالك بقى :)

**Teko0o** · 13-10-2012 12:44 PM

المشاركة الأصلية كتبت بواسطة kareem.elaraby

ان كان التوكيلات بتودي عربياتها الحرفيين تتصلح

متابع

كلامك مظبوط يا كريم مليون فى المية

**Teko0o** · 13-10-2012 12:45 PM

المشاركة الأصلية كتبت بواسطة تامر.محمد

يا نهار ازرق !

بجد لنا الله :(

**Teko0o** · 13-10-2012 12:45 PM

المشاركة الأصلية كتبت بواسطة hmada9009_99

معلش ماهو للأسف مافيش ضمير ولا أخلاق

الحمد لله على كل حاجة :)

**Teko0o** · 13-10-2012 12:48 PM

المشاركة الأصلية كتبت بواسطة kareem fawzy

توكيل عايز الحرق
كان نفسى اجيب بونتو ايفو بس من القرف دة صرفت نظر عن الفكرة

ماهى المشكلة يا كريم ان فيات بتنزل عربيات جامدة جدا بجد
انا معايا برافو 2009 و عربية فعلا مديانى كل حاجة بمعنى الكلمة
و انا اعرف سمعة التوكيل من قبل ما اجيبها بس امكانيات العربية اللى مصبرانى عليهم والله

**Land_Cruiser** · 13-10-2012 12:49 PM

الموضوع ده عايز شكوى للشركه الأم بالنصب ده . الناس دى بتوقع ألماركه كلها فى السوق بالعمايل دى و بتساعد على انقراضها و مفيش خساره اكتر من كده لفيات. ياريت بس يبقى معاك اى مستندات ترفقها بالشكوى علشان تبقى هناك جديه. فى حاجه بس مش معنى ان بتاع قطع الغيار عارف المهندسين كلها أنهم بيتعاملوا معاه و لا حاجه. ممكن يكون هو يعرفهم او يعرفهم بالاسم فقط بس عامه لو حضرتك عملت شكوى هما بقى يعملوا تحقيق فى الشكوى و يعرفوا

**Teko0o** · 13-10-2012 01:22 PM

المشاركة الأصلية كتبت بواسطة land_cruiser

الموضوع ده عايز شكوى للشركه الأم بالنصب ده . الناس دى بتوقع ألماركه كلها فى السوق بالعمايل دى و بتساعد على انقراضها و مفيش خساره اكتر من كده لفيات. ياريت بس يبقى معاك اى مستندات ترفقها بالشكوى علشان تبقى هناك جديه. فى حاجه بس مش معنى ان بتاع قطع الغيار عارف المهندسين كلها أنهم بيتعاملوا معاه و لا حاجه. ممكن يكون هو يعرفهم او يعرفهم بالاسم فقط بس عامه لو حضرتك عملت شكوى هما بقى يعملوا تحقيق فى الشكوى و يعرفوا

انا اكيد طبعا ماكنتش هحكم عليهم لمجرد ان صاحب قطع الغيار يعرفهم, انا لما اتصلت بيه اسأله على المانيفولد قاللى هو انت عربيتك فى التوكيل ؟؟ لما قولتله ليه قاللى فى حد كلمنى و سألنى على القطعة دى ضرورى اوى .. و هناك بالصدفة الاقيه بيتكلم مع واحد على مهندس حبيبه اوى فى اوماترا و هو نفس المهندس اللى ماسك عربيتى
دة غير ادلة اثبات تانية و سمعة فيات اللى من زمان فى الارض

**Formulator** · 13-10-2012 01:30 PM

مش أول مرة.. حصلت قبل كده على فكرة
أنا سامع بنفسى عند مجدى البيومى واحد من اللى شغالين بيقول للتانى "فكيت الباب والرفرف لتوكيل جسر السويس ولا لسه"؟؟!!!

وقبل كده إثنين مشهورين معانا هنا فـ المنتدى كانوا عند الكيلانى فـ شمبليون؛ وسمعوه بيقول "جبت الشنطة بتاع الإيفو اللى عايزينها فـ أوماترا ولا لأ"؟!! وشششششش كده!!

الصح بقى يامعلم:
- انت تدور برا قبل ماتروحلهم، تبقى شيكت على كل المصادر الأول..وقفلتها عليهم
- لو مفيش: يبقى مفيش غيرهم وتتكلم فـ خصم عـ السعر والمصنعيات.
بس للأسف.. أنا عارف ان مش كل الناس تعرف تعمل كده!!!
اللى اتلسع بقى؟!! ههههههههههههههههههه (الحمد لله مش أنا)،

ياجدعان لما حد يركب قطعة غالية عند أوماترا بعد كده:
1- يشيك عـ القطعة انها جديدة genuine وطالعة من علبة ricambi-originali بتاع Lancia-Fiat-Alfa
وتطلب العلب الفاضية كمان(حقك واللى يكلمك أنفخه)
2- تبص عـ القطعة نفسها وهى راكبة:
يعنى مثلا مقص-قنطرة موتور-بارات.. بتبقى جديدة-جديدة لونها أسود وعليها الإستيكر بتاع ricambi-originali وتتأكد انها إيطالى مش برازيلى!!

المانيفولد بتاعك يا Teko0o لو جديد هيبقى ملفوف بفويل ألومنيوم، وعليه sticker (عـ الزهر نفسة) لامع مش بيطلع إلا بالحرارة.
ركزوا مع ولاد التيييييييييييييت دول ياشباب..