النهاردة رحت صالة العرض بتاعة بيجو اللى فى مصطفى كامل و إتفرجت على البيجو 206 السيدان و إليكم ما عرفته عنها

انا هتكلم عنها مقارنتآ بال 206 الهاتشباك اللى معانا

المحرك
1400 سى سى - مانيوال - تقريبآ 75 حصان(مش متأكد بصراحة) - المحرك و ما تحت الكابوت فرنساوى بالكامل و عليه علامة بيجو

من الداخل:
نفس صالون الهاتشباك و الخامات ممتازة و التقفيل محترم جدآ يعنى ملاحظتش فيها حاجة اى كلام بصراحة
و بالنسبة لحجم الصالون من الداخل فهو نفس حجم الهاتشباك بالمللى

الكماليات
تكييف - باور - سنتر لوك بريموت - كاسيت سى دى الأصلى - زجاج كهربائى امامى - 2 ايرباج - فرامل ABS

من الخارج
انا شايف شكلها شيك و جميل رغم انى كنت مقتنع انها مش راكبة على بعض خصوصآ انى مش متعود أشوفها و هى عندها شنطة

حجم الشنطة
شنطتها ما شاء الله كبيرة جدآ و تشيل كتير

السعر
90 الف جنيه (بالمواصفات السابق ذكرها)
120 الف جنيه (1600 سى سى - اوتوماتيك - و بتزيد مرايات كهرباء و زجاج كهربائى خلفى)

العيوب
أكتر حاجة ضايقتنى انى لقيت نفس حجم الصالون بتاع الهاتش باك رغم انى كنت متوقع انى هلاقى العربية أكبر من كده
ظهر الكنبة قائم شوية مش مريح يعنى من الآخر القاعدة ورا السواق مش مريحة تمامآ لشخص متوسط الحجم


بس انا لقيت الزجاج بتاع العربية كله مكتوب عليه ikco و ده إسم إيران خدرو بس مش عارف هل معنى كده انه تصنيع إيرانى و لا فرنساوى

و فى إنتظار تقرير عن تجربة قيادة ليها

مراسلكم من معرض مصطفى كامل الدولى