الموضوع: بصراحة تجربتى مع صابر اوبل

سلام الله عليكم

احلى تحية لاحسن ركيبة عربيات فى مصر اصحاب الاوبل المحترمين ..

بصراحة حبيت انقل ليكم تجربتى مع الميكانيكى اللى بتعامل معاه ودى شهادة حق ادام ربنا وهقول اللى ليه واللى عليه بمنتهى الامانة يمكن اقدر افيد حد زى ما استفدت هنا كتير

اسمه صابر ومعروف بصابر اوبل هو فى مدينة نصر عند رابعة العدوية كده

بصراحة يا جماعة هو راجل محترم جدا واخلاق جدا وذوق جدا وانا بقالى سنتين معاه مشفتش منه حاجة وحشه بالعكس الراجل محترم جدا وبيقدر جدا ومصنعيته مش غالية زى ناس كتير اتعاملت معاهم وكمان قطع الغيار عنده اسعارها معقولة وامين وفى حاجات بتتعمل برة بارقام فلكية عملتها عنده بارقام حلوة جدا وبصراحة هو راجل بيعرف يقدر العميل بتاعه جدا ومقدرش انسى ليه ابدا والله انى اول معرفتى بيه طلبت منه ينزل معايا الحرفيين اجيب فتيس وانا متاكد انه هيقولى لا لكن فاجأنى لما وافق وجه واختاره بنفسه لدرجة ان الناس فى الحرفيين قالولى صابر بنفسه نزل معاك دانت محظوظ والله وساعتها فهمت الراجل قدرنى ازاى

وفى صنايعية اتعاملت معاهم عنده محترمين وشاطرين جدا عندكم مثلا ( مصطفى وشهرته دوكش ) صنايعى جدع جدع جدع جدا وميسيبكش الا لما يتاكد ان شغلك تمام وبيشتغل بضمير وفاهم كويس وميبوظش الحاجة عشان يغرمك وخلاص .

فى كمان ( طاهر ) وبصراحة الولد ده فنان والله يا جماعة وفاهم فى الاوبل جدا واكتشف فى عربيتى حاجات بهوات تانيين كتير كانوا بيفتوا فيها يعنى من الاخر ولد حريف

وكمان فى سيد بردو صنايعى كويس وكمان احمد عجورة

لو التكييف عندك فى عفريت لما تروح عند صابر أسال بس عن ( حسونة ) ولما تشوف حسونه ميغركش انه صغير بس والله العظيم يا جماعة الولد ده برنس التكييف ولو التكييف عندك ميت مرتين سلمهوله وملكش دعوة حررررررررررريف تكييف حسونة ده ..

ولو عايز كهربائى محترم فوق ما حد يتخيل وكهربائى شاطر جدا اسال عن ( منصور ) يا جماعة شاب ذوق واخلاق فوق الوصف ومصنعيته حلوة جدا وشغله نضيف جدا .. للامانة بس لازم تظبط وقتك معاه لانه ماشاء الله شغله كتير فظبط معاه الوقت بالدقيقة واقفش فيه خليه يخلصلك الشغل بتاعك ههههههه وهو الصراحة مبيتاخرش وبيقدر زباينه جدا ..

يا جماعة انا بنقل ليكم تجربتى الشخصية بمنتهى الامانة ودى تجربتى وانا مسئول عنها وكل واحد وظروفه وتجربته لكن بالنسبة للى بسمعه عن ناس تانيين فصابر يبقى اختيار اول دائما ولازم ندى كل واحد حقه زى ما لازم نبين اى غلط او تقصير من اى صاحب مركز صيانة او ميكانيكى لان ده هيعتبر وسيلة اصلاح وتقويم ليه

واى حد عايز اى معلومة عن مكان صابر او تليفونه انا تحت امره

والحمد لله الذى هدانا لهذا وما كنا لنهتدى لولا ان هدانا الله