السلام عليكم ورحمه الله وبركاته
تقرير عن اول صيانه للاوكتافيا سبورت 2012
في البدايه احب انوه ان في ناس كتير جدا كانت ومازالت بتشتكي من سوء المعامله وعدم التنظيم والزحمه الشديده وعدم تفعيل الضمان في مراكز خدمه وكيل اوكتافيا في مصر(ارتوك اوتو) وبصراحه ده احيانا كان بيرجح كفه الخليجي عن الوكيل لكن كان اختياري للوكيل بعد تردد والحمد لله كان اختيار صحيح وتاكد ده بالنسبه ليا بعد كده
بعد شراء العربيه بتقريبا شهر اتصل بيا الاستاذ المحترم /ياسر نصر (مسئول المبيعات)في الاتصال ده راجع معايا البيانات المسجله عندهم ومعاد اول صيانه(عشره الاف كيلو او سنه من تاريخ الشراءايهما اقرب)وعلي فكره صيانه الفانتازيا كل عشره الاف وطلب مني الاحتفاظ برقم التليفون واتصل بيه في اي وقت للاستفسار عن اي شي وقد كان.
جاء معاد الصيانه واتصلت ب استاذ ياسر وطلبت تحديد معاد للصيانه واتفقانا علي يوم السبت الساعه 9 صباحا في مركز ارتوك اوتو فرع غمره.
وصلت بوابه دخول المركز حوالي الساعه التاسعه والنصف لاقيت طابور طويل مش اقل من10 سيارات كلمت أ/ياسر قال في
خبر علي بوابه الخروج ممكن تدخل من هناك لانك محدد معاد مسبقا وفعلا دخلت من بوابه الخروج.
دخل المركز كل شي منظم جدا عند دخول اي سياره يتم وضع كيس علي كرسي السائق وكرتونه في الدواسه حركه العمال منظمه .
بعد عشر دقائق من دخولي جالي المهندس /حسين بعد الاطلاع علي الرخصه والبطاقه الشخصيه والضمان سالني عن نوع الصيانه ولو في عندي اي شكوي او ملاحظه طبعا كان في الاتي
1-بعض الخدوش المعتاده من الشارع للاسف جاء المهندس المسؤال عن السمكره بالورشه قالي ايه اللي ممكن يتعمل وتكلفته كام والتفاصيل بس الحاجات في الاخر مفيش داعي انك تعملها لانها مش ظاهره ولا تعيب السياره .
2- وده الاهم في خدوش ظهرت في الفوانيس الاماميه وحاسس انها بتزيد الخدوش دي محدش ملاحظها غيري لما بحدد مكنها ممكن تشوفها .
المهندس حسين سجلها عنده وقالي هسال عنها مسؤل الكهربا.
سألت المهندس حسين انتو بتعملو صيانه لكام سياره يوميا كان رده من 40 الي 60 سياره ماشاء الله رقم.
ومضيت علي ورق الموافقه علي عمل الصيانه والتكلفه وعدم مسؤليتهم عن اي متعلقات شخصيه دخل السياره وكارت مكتوب فيه رقم تليفونه ومعاد استلام السياره وكان الساعه 2 والمعتاد ان الاستلام يكون الساعه واحده لاكن هنتاخر ساعه علشان موضوع الفوانيس ودخلت السياره الورشه الساعه 10 ص.
انتظرت في الاستراحه وبصراحه الاستراحه محترمه في 2شاشه lcdكبيره و2 جهاز كميوتر والنت شغال وطبعا الاستراحه مكيفه والبوفيه محترم ومستوي الخدمه تمام يعني بصراحه استفدت بوقت الانتظار.
الساعه الثانيه والنصف تم الانتهاء من الصيانه وتم عمل الاتي:
تغير زيت الموتور(بيستخدمو توتال والعربيه اخدت 4 لتر ونص)
تغير فلتر زيت
تنظيف الموتور
تربيط العفشه
فحص كامل للسياره
التكلفه 425 جنيه
طبعا ده سعر الزيت والفلتر والمنظف .
المصنعيات مش بيحاسبو عليها هديه
نيجي لموضوع خدوش الفوانيس في الاول قالو دي من الخارج يعني ممكن تكون حاجه خبطت فيهم
كان ردي لا طبعا دي من الداخل واستحاله حاجه تخبط في الفانوسين في نفس الوقت
المهم شفوها تاني وقالو مفيش مشكله هتتغير في الضمان طبعا سالت علي سعر الفوانيس دي وكان سته الاف جنيه داخل التوكيل وخارجه .
وتم تغير الفوانيس والحمد لله وتمت اول صيانه بنجاح.
طبعا لازم اجيب اخبار جديده لاعضاء نيل موتورز المحترمين
قابلت الاستاذ/عمرو عبد العزيز مسؤل خدمه العملاء وقال
تم تخصيص رقم موحد 16616 من الساعه 8ص حتي 9م
لحجز الصيانات الدوريه ومعلومات المبيعات والشكاوي من المركز الرئيسي والمراكز المعتمده
وفي برضه خدمه اعطال الطريق بونش واحد داخل القاهره الكبري.
ولو الاتصال بعد 9م بيكون في رساله صوتيه بارقام تليفونات شركات النقل للمساعده.
قريبا هيفتحو مركز خدمه متكامل كبير لخدمه 100 سياره يوميا ويكون عباره عن مركز خدمه وبيع قطع غيار ومعرض مبيعات واطلقو عليه اسم 3s ومكانه علي الطريق الدائري قبل نزله القطاميه امام مركز خدمه مرسيدس.
حبيت انقل تجربه اول صيانه للفنتازيه بكل تفاصيلها واخبار جديده حتي تعم الفائده.
ولكم تحياتي