الموضوع: أخيرا استلمت ال fsv ............ قولولى مبروك

أخيرا وبعد رحلة عذاب أكثر من سنة مع هذه الشركة الغريبة اللى اسمها البافارية إستلمت النهاردة ال fsv الأوتوماتيك الفول أوبشن 2013 .
والله يا جماعة أنا عايز أحكيلكوا على اللى حصل معايا وعذرا لو طولت عليكوا شوية بس الكلام ده مهم جدا بالأخص للناس اللى حاجزة سواء ال fsv أو ال frv بجميع فئاتهم .

طبعا بداية الموضوع من أكتر من سنة لما حجزتها من البافارية فى معرض أوتوماك وبعد مماطلة وتأجيل وعدم وضوح وعدم مصارحة وقصة الكل عارفها رحت سحبت مقدم الحجز بعد حوالى 7 شهور ونسيت الموضوع .

وبعدين عرفت زى الكل من النت ان فى شحنة كبيرة جدا دخلت مصرفعلا فرحت رايح معرض ألماظة وسألت وقالولى فعلا وتقدر تحجز الكلام ده من شهرين تقريبا . فرحت رايح أول سبتمبر ودفعت 10000 جنيه مقدم حجز( العربية تمنها 89000 جنيه) وقلت المرة دى ملهمش حجة لأن العربيات فى مصر واخترت اللون الفضى أساسى والأسود احتياطى وحددوا لى ميعاد التسليم خلال أسبوعين .

وبعدين بدأت المماطلة تانى وعدم الرد على الموبايل نهائيا فروحتلهم تانى يوم 15 سيتمبر
فقالولى معلهش الضغط جامد جدا على العربيات وبنحاول ننظم جدول الاستلام عشان منظلمش حد وحددولى ميعاد تسليم جديد بعد عشرة أيام ( فى اليوم ده كان معروض اللون الأزرق السماوى فيها وكنت أول مرة اشوفه وعجبنى جدا ) .

بعديها بكام يوم فوجئت بمكالمة من موظف المبيعات اللى خد منى المقدم واسمه محمد عمرو وقاللى حدد اللون فضى أو أسود وحيبقى نهائى بدون رجعة علشان حنبتدى نخصص رحت محدد الفضى وقلت يا مسهل شكلها قربت ومصدقتش لدرجة انى نسيت حتى اسأله عن امكانية تغيير اللون للأزرق السماوى بس قلت مش مشكلة الخيرة فيما اختاره الله .

وبعدين بدأ تانى الاسلوب المعتاد وعدم الرد لمدة عشرة أيام كاملة ولا حس ولا خبر فروحتلهم تانى اخر سبتمبر وقابلت محمد عمرو وقاللى معلهش انا مش قادر أتنفس والضغط على جامد ونفس المبررات الخايبة وبعدين قاللى متغير للأبيض وأسلمهالك النهاردة فرفضت وقلت ممكن أغير للأزرق قاللى الأزرق صعب وبعدين قاللى متنزل للهاف أوبشن وتستلم خلال تلات أو اربع ايام برضه رفضت قاللى طيب تابعنى خلال الأسبوع اللى جاى وربنا يسهل .

محدش يسألنى ازاى صبرت ده كله لان انا نفسى مش عارف المهم رجعت ريما لعادتها القديمة وعدم الرد على التليفون تانى فرحت رايح تانى أول أكتوبر ويومها قابلت واحد اسمه عمر وهو اللى كان حاجزلى أول مرة من سنة فقاللى العربيات حتتسلم كمان شهرين قولتله انت بتهزر ده زميلك قاللى غير كده خالص وحكيت له اللى حصل فقاللى هو مسئول عن كلمته بس أنا بقولك مش قبل شهرين .

طبعا يومها رجعت وأنا فى قمة الاحباط وقعدت أسب وألعن فى الشركة دى وفى اليوم اللى فكرت أشترى فيه العربية دى .

طبعا قعدت أسبوعين كاملين بعد الزيارة دى أحاول اكلمهم دون جدوى كالعادة.

نيجى للمفاجأة الكبرى اللى تعرف منها ازاى التوكيلات دى بتتلاعب بالناس وأقسم بالله العظيم هذا ما حدث بالضبط وركزوا معايا فى التواريخ .

على اول الشارع اللى أنا ساكن فيه أجانس شيك موت فتح قبل الثورة بحوالى تلات شهور مبيعرضش غير بى ام ومرسيدس وشيروكى وبيجو وفولفو وفيرارى وبالتالى عمرى ما فكرت ادخله بس للحق مرة شفت عنده جالينا .

المدام اقترحت على أروح أسال فيه لعل وعسى فضحكت وقلتلها هو ده حيعبر البريليانس ففكرتنى بموضوع الجالينا قلتلها ماشى .

يوم الاثنين اللى فات 15أكتوبر دخلت المعرض وقابلت الموظف وكلمته فى الموضوع وحكيت له كل التفاصيل المذكورة فتعجب على كمية الصبراللى أنا صبرتها وقاللى انا مبشتغلش فيها بس ممكن اجيبهالك قلت له يا ريت وجاب الموبايل وطلب حد فى البافارية وفتح الspeaker وأقسم بالله العظيم مرة تانية هذا هو نص الحوار الذى دار بينهم :

- معاك معرض المهندس عايز أسال على fsv الأوتوماتيك الفول أوبشن 2013 لون أزرق.
- موجودة واللون موجود .
- تجيبهالى امتى ؟
- النهاردة لو عايز
- بكام ?
- الأول انت عايزها تعرضها فى المعرض ولا لحد معين
- لأ مش حاعرضها عايزها لزبون بيسأل عليها وحيدفع كاش
- 93000 جنيه
- ازاى هى مش ب 89000 جنيه
- السعر ده من الاخر عشانك انت بعد العيد ممكن يبقى فيه كلام تانى .
- طب حاول تنزل شوية .
- والله ده السعر اللى حتتباع بيه لغاية دلوقتى .
- طيب شوية وأرد عليك .

طبعا خدت الكلمتين دول وأنا مذهول وقلت للراجل حارد عليك بكرة . وروحت قعدت أفكر وقلت يكونوا بيلعبوا على بس الراجل فى الاجانس ميعرفنيش ولا اعرفه ولا يعرف ان انا جاي اطلب حاجة زى كدة واللى شجعنى مقالة قراتها فى ملحق أخبار السيارات أول الاسبوع ان التوكيلات مبتسلمش دلوقتى لان فى تغيير ممكن يحصل على الاسعار بنهاية العام فتوكلت على الله ورحت مديله الفلوس امبارح الاربعاء 17 أكتوبر الساعة 8 مساء والنهاردة الصبح الخميس 18 أكتوبر تليفون من موظف المعرض يبلغنى ان الونش جاب العربية وتعال استلم وفعلا رحت استلمت الساعة 5 .

تخيلوا أكتر من سنة منتظر والموضع يخلص فى 3 ايام ولغاية باب البيت تقريبا وشفتوا التوكيلات بتعمل ايه فى الناس عشان تغلى السعر.

وفى النهاية سواء اشتريتها بالغالى أو بالسعر الطبيعى الحمد لله على كل حال وقدر الله وما شاء فعل وربنا يكفينا شر طريقها ويا رب كل واحد يشترى بأرخص سعر ممكن . وأبدأ انا بقى رحلة استرداد ال10000 جنيه من البافارية .

خلال كام يوم ان شاء الله حاقولكوا على امكانياتها وأدائها بعد ما اكون مشيت بيها شوية واسف جدا مرة تانية على الاطالة .