السلام عليكم
بص يا باشا انا حصلت عندى المشكلة دى امبارح و رحت بالعربية للميكانيكى اللى باتعامل معاه و هاقولك بالترتيب على اللى عمله :
1 - فك السلك اللى جاى من المموبينة لوش الاسبراتير و قربه من جسم العربية و انا فتحت كونتاكت و اديت سنة مارش لقى فى شرارة كهرباء يبقى الموبينة شغالة
2 - ركب سلك الموبينة تانى و خلع سلك من بتوع البوجيهات و جاب بوجيه قديم من عنده و ركبه فى السلك المخلوع و قربه من ارضى للعربية و سنة مارش من عندى ملقاش كهرباء و عرف ان الاسبراتير مش موصل كهرباء للبوجيهات
3 - شك ان العيب يكون من السلك راح مجرب سلك تانى لقى برضه انه مافيش كهرباء
4 - طلعت المشكلة من الاسبراتير فك وش الاسبراتير لقى الشاكوش متهالك و مكسور
5 - فك مسمارين الشاكوش بمفتاح النكيه رقم 4 و بعتنا جبنا واحد استيراد فرنساوى ماركة sagem بحوالى 50 جنيه مع المصلحة المستخبية بين الميكانيكى و بتاع الاستيراد ( سألت على الجديد كان صينى ب 60 جنيه ) و فضلت انى اجيب الفرنساوى الاستيراد
6 - سنفر لوامس النحاس بتاعت الشاكوش قبل التركيب و ركبه و العربية دارت و زى الفل