الموضوع: ماذا تفعل لو كنت مكانى- ترجع مصر ولا لا

بص بقي يا باشا. انا زيك كده متغرب بردو في سويسرا بقالي كام سنه و نفسي و مني عيني ارجع مصر بس الصراحه في كام موقف كده عدو عليا خلوني اراجع نفسي تاني. منها مثلا لما كنت مره في اجازه و تعبت جالي حاجه في ودني وجع جامد و كده، المهم كنا الصبح بدري و قلت اشوف مستشفي قعدت الف علي مستشفيات خاصه في طنطا اللي انا منها ملقيتش التخصص موجود في الاخر رحت مستشفي الجامعه و عاللي شفته هناك. بص احمد ربنا عللي انت فيه و افتكر انك لما بتنزل اجازه بتصرف من الفلوس اللي انت شغال بيها بره و بتعمل حاجات لو انت عايش في مصر مش ممكن هتعملها عشان ببساطه مش هيكون معاك تمنها.
انا زيك نفسي ارجع بس فعلا الاعضاء هنا عندهم حق. كل حاجه في مصر اتغيرت تماما. الجدعنه و خفه الدم و الحاجات دي انساها.
انا ساعات في الاجازه و الله ببقي زهقان جدا و مش عارف اعمل ايه عشان اصحابي و حتي اخواتي مش فاضيين و شغالين الله يكون في عونهم.
فكر و راجع نفسك تاني و ربنا يهديك للي فيه الخير

المشاركة الأصلية كتبت بواسطة hussein_emara

لو لاحظت حتلاقي 95% من المشاركات بتقولك خليك, و اختلفوا على الاسباب لكن اتفقوا على حقيقة واحدة: خليك عندك.

انا مش حكلمك على اخلاقيات السواقة في الشارع, دي محلولة في المدن الجديدة, انا مش حكلمك على اخلاقيات التعامل, ممكن تتفاداها و خلاص, انا حكلمك على حاجة واحدة بس, لاقدر الله فرد من اسرتك مرض و محتاج توديه مستشفى طوارئ او حتى كشف عادي, انا مظنش ان فيه بلد في الدنيا عندها ذرة ادمية حترفض دخول مريض لأنه معهوش واسطة تدخله المستشفى. و الحل البديل المستشفيات الخاصة, و ديه بردك مش حتدخلك الا لما تدفع الاف مؤلفة, و ياريتك حتتعامل كويس او حتى حد حيراعي فيك ربنا, في كل الاحوال حتتسرق, حتتبهدل و ممكن لاقدر الله تصاب بامراض جديدة من عندهم.
الكلام الي بقوله لحضرتك مش كلا مرسل, انا فضلت الف بمريض -تشخيصه المبدأي كان جلطة في المخ- لمدة يومين مفيش مستشفي راضية تستقبله لاسباب مختلفة (اللي معندوش مكان و اللي معندوش التخصص و اللي معندهمش دم و هكذا, و كله جربناه, عام و خاص) لغاية ماربنا بعتلنا واحد يكلم مستشفى من اللي رفضوا عشان معندهمش مكان و يطلع عندهم اماكن بس شايلنها للحبايب.

الكلام في موضوع الطب و المستشفيات ده لو اتفتح, اكيد كل واحد في المنتدى عنده خبرات اسوأ و اسوأ, و لو عايز, انا عندي كتييييييييير.
انا مش دكتور بالمناسبة, بس ليا اصدقاء دكاترة كتير, نصحوني حاول ماتمرضش, لأنك لو مرضت في بلدنا دي احسنلك تموت.

اما عن الحقوق الضايعة في مصر فحدث و لا حرج.
إنا لله و إنا اليه راجعون
لو عندك حل للكلام ده في مصر, دلنا عليه و ارجع, غير كده, خليك عندك!

كلام مظبوط بس انا برة انا وزوجتى بس وكل عيلتى جوه مصر يعنى برضه مش هاقدر اعالجهم وانا بره

على الاقل هاكون جمبهم لو احتاجونى

المشاركة الأصلية كتبت بواسطة ahmedkoko

كل حاجه في مصر اتغيرت تماما. الجدعنه و خفه الدم و الحاجات دي انساها.

الله ينور عليك...

أكيد رأيي مع رأي الأغلبية أنك تفضل مكانك و مترجعش..
خلاص الوضع في مصر تغير تماماً بلا رجعة,, الحاجات اللي الواحد كان ممكن بسببها يحب البلد دي و يحن ليها في غربته خلاص أنتهت و مبقلهاش وجود غير في الناس الكبيرة و الأجيال القديمة اللي بتودع خلاص..
ربنا وحده عالم بمستقبل البلد دي هيبقى عامل أزاي بكل الأجيال الجديدة اللي طالعة بكل الفساد اللي فيها...
أنا النهادرة نزلت كنت بلف شوية في الشوارع بالعربية و مش قادر أستوعب بجد لحد دلوقتي كمية الشحاتين اللي شفتهم بكافة أعمارهم من أول الأطفال لحد الشيوخ..
بجانب أن الموضوع متعب نفسياً أنك تشوف المنظر ده,, لما تيجي تبص و تشوف الطبقة دي من الناس بتوسع أزاي كل يوم عن اللي قبله أكيد فكرك هيروح لبعيد و هيتخيل مستقبل مظلم للبلد دي أكتر من الوضع الضبابي اللي أحنا دلوقتي فيه بالفعل..

ياجدعان مهما كا انتم بتكلموا على بلدنا الا مالناش غيرها والوضع عمرخ ما هيتحسن

هل معنى كده اننا نموت غرب ونعيش غرب


فيه مساوى كتير للغربة ما حدش يحس بيها الا الا جربها

المشاركة الأصلية كتبت بواسطة hussein_emara

يا ريس ارجع, برده بلدك اولى بيك.

بس ابقى افتكرنا لما يجي يوم تتأكد ان قرارك مكانش صائب.

و لما حيتعمل موضوع كمان فترة عن نفس الموضوع, الندمانين حيزيدوا واحد :copy of majd(4):

لكي الله يا مصر.

على فكرة انا اعرف ناس كتير عايشين فى مصر ومبسوطين وبيقولوا مصر ليست بهذا السوق

انزل مول العرب كده او سيتى ستارز شوف كمية الفلوس فى مصر عاملة ازاى