الموضوع: عندي مشكلة عويصة

بسم الله الرحمن الرحيم

اعضاء المنتدى الكرام ...

عندي مشكلة عويصة جداً حاحكيها من الأول وبتفاصيلها علشان تقدروا تدوني الرأي الصح .
بداية انا بشتغل محامي في احد الشركات وطبيعة عملي بتتطلب سفر و تنقلات كتيرة جداً على الأقل بسافر خارج القاهرة 3 ايام في الإسبوع البحيرة واسكندرية والمنيا كل محافظات مصر تقريباً والباقي جوا القاهرة غير اني بسافر بلدي نهاية كل اسبو ع انا ومراتي وبنتي .
المشكلة بدأت من حوالي 3 شهور تقريباً خلاص زهقت من المواصلات والميكروبصات 4 سنين بسافر وجسمي خلاص مبقاش قادر يستحمل والحمد لله ربني اكرمني ببنوتة من شهرين واضافت الى حملي حمل جديد بقى صعب اتنقل بيها هيا وامها بين المواصلات علشان أروح البلد .... فقررت اني جيب عربية .

اخدت كورس سواقة مع واحد محترم وبقيت مبتديء في السواقة ، مكانش معايا ساعتها غير 12000 جنيه ، قولت اقدم على عربية من الشركة ، وطبعاً انا عايز عربية جامدة وجديدة علشان تقدر تستعحمل السفر اليومي للشغل بالإضافة الى مشاوري الشخصية ، وبكدا استبعدت تماماً العربية المستعملة لأن الفلوس اللي معايا يدوبك تجيب عربية 128 حالتها نص نص واستقريت على رينو لوجان 2013 مانيوال كاملة لقيت الشركة طلبت مني مقدم 26000 جنيه وقسط باقي المبلغ بفايدة 7.5 % ودي اقل فايدة لأنها بتتعامل مع شركة تأجير تمويلي ...

طبعاً المبلغ مكانش معايا قولت خلاص اشوف قرض من البنك وابتدت رحلتي مع البنوك والعذاب فيه بنوك رفضت تتعامل معايا اساساً لإني محامي ( شايفك ياللي بتضحك ) وعلى فكرة فيه فئات البنوك لا تتعامل معاها زي القضاة وظباط الشرطة والدبلوماسيين والصحفيين ( المحامين مش كوخة يعني ) المهم عرفت ان توكيل رينو بيقسط فقولت كويس وقدمت ورقي الا انهم طلبوا مقدم كبير حوالي 30000 جنيه بالإضافة الى ان الفايدة 9.5 % فقلت بركة جات من عندهم ، وبعدها قدمت في المشرق واترفضت ، واخيراً بنك مصر بفايدة 8% وعلى 6 سنين فقلت اقدم وبتاع المبيعات عملي البحر طحينة وثبتني معاه لمدة شهر وفوجئت برضه بإنهم طالبين 28000 جنيه مقدم .

لحد هنا وزهقت لفيت على اكتر من 10 بنوك ومفيش فايدة فقلت لنفسي لو بنك مصر رفض مش حاجيب عربية زيرو وحادور على مستعمل لأن الموضوع كان متعقد بشكل غير طبيعي .

الحمد لله ربنا رزقني بقرشين على كام باكو خدتهم سلف من والدي بقى معايا 25000 جنيه حالياً ... كل اللي حواليا بيضغطوا عليا ان اجيب مستعمل لاني لسة جديد في السواقة والعربية الجديدة حتتبهدل معايا بس برضوا المستعمل مش حيسد معايا في مشواير السفر كل يوم غير الأعطال والميكانيكي .

طيب اعمل ايه .... طلعلي واحد تاجر عربيات جنبي قالي هات الفلوس اللي معاك واختار العربية اللي تعجبك ( مستعمل طبعاً ) وحاقسطلك الباقي ... وقالي انا قدامي عربية لانوس 2002 راشة برة ماعدا السقف والشنطة وعلى حد وصفه العربية لوز العنب بيقول فيها اشعار ( انا لسة مشوفتهاش ) وبيقول تمنها 44000 جنيه و الباقي حاقسطه على سنة بفايدة 20% .. طبعاً انا لسة متكلمتش في تمن العربية ولا عاينتها وكمان نسبية الفائدة عالية أوي .

فأنا دلوقتي محتار ومش عارف اعمل ايه .. وقدامي الإختيارات الاتية :-
1- اجيب عربية زيرو من الشغل بتاعي ( انا دلوقتي معايا المقدم بتاعها ) .
2- اجيب دايو لانوس من التاجر لو حالتها حلوة واقسط الباقي ( ولكن عربية بالحالة دي تستحمل السفر يومياً ) ؟
3- اجيب عربية في حدود 25000 جنيه ( بس عربية بالسعر دا تستحمل السفر يومياً ؟ ) بالإضافة الى اني عايز فيها تكييف علشان زحمة القاهرة .
4 - كمان ثلاث شهور ربنا حيرزقني ان شاء بـ 5000 جنيه تقريباً وبكدا يبقى معايا 30000 جنيه ( بس أنا مش قادر انتظر كل الوقت دا وانا مضغوط جداً ) .

يا ريت السادة الأفاضل يشوروا عليا بالنصيحة لأني خلاص انا مش قادر اخد قرار .
معلش انا طولت عليكوا وزهقتكوا استحملوني ... ومش عارف دا القسم المخصص للموضوع بتاعي ولا لأ .

شكرا لكم

متشكر جدا جداً لكل الأعضاء المحترمين اللي ردوا عليا ، وانا استقريت يا اما حاجيب زيرو من شغلي أو حاجيب مستعمل على قد الفلوس اللي معايا ،