الموضوع: العربية سخنت وكاد أن ...

السلام عليكم
في أيام مفترجة زي ديه (ليلة العيد الصغير) جبت شماسة استيراد وجيت اركبها لاقيت الجاك بتاعها مش زي اللي عندي ، ولما روحت لكهربائي عادة (يعني بتاع عربية قديمة) قالي ابقى تعالى بعدين اغيرلك الجاك بتاع الشماسة ، فرجعت السلك مكانه فحصل ماس كهربائي ونور الصالون طفى ، فقولت للكهربائي ، قالي لا عادي محصلش حاجة
المهم ، تاني يوم عالطول مشيت بالعربية وشغلت التكييف الاقي الهواء سخن !
شوية ومؤشر الحرارة علي وانا مش واخد بالي لغاية اما لاقيت زي بخار او دخان بيطلع من العربية
بطلتها وفتحت الكبوت لاقيت العربية مولعة نار وفيه نقط مية بتنزل من خرطوم الكوعة
قطرتها لغاية البيت وبالليل جالي واحد بن حلال وقالي التسريب من هنا وقطع الخرطوم وركبه تاني بـ أفيز زي بتاع انبوبة البوتاجاز وقالي دور العربية واول اما تسخن المفروض المروحة تشتغل لمدة دقيقتين بالكتير وتفصل تاني ولما فصلتش يبقى فيه مشكلة عندك في التبريد وسابني ومشي

المهم سخنت العربية ووصلت لغاية 90 وابتدت تعدي التسعين عادي لغاية 98 والمروحة ما اشتغلتش !!!
قولت يبقى اكيد بسبب الماس اللي حصل ، فتحت المانيول ونزلت انا واخويا بالاب توب في العربية ونقرا ونجرب (بسبب ان المانيول اللي معايا بتاع الاسترا 1200 مش 1600 وفيه اختلاف في علبة الفيوز)
لغاية اما عطرنا في فيوز الصالون وغيرته بواحد اخوه في نفس العلبة ، فالنور نور
دورنا العربية ووصلت لـ 90 وأول اما جات لـ 92 المروحة اشتغلت وبالفعل اقل من دقيقة وفصلت.
عالطول روحنا لواحد بتاع كماليات واشتريتا منه الفيوز كان 7.5 امبير تقريبا وركبناه مكان العاطل والحمد لله العيد بقى عيد : )

الخلاصة
- فيوز نور الصالون بتاع الاسترا البرازيلي مسؤول عن تشغيل مروحة الريداتير ورقمه 28 في المانيوال واسمه Courtesy Lamp
- الفيوز المضروب تقدر تعرفه لما تلاقي الوصلة القصدير مقطومة او مكسورة
- العربية لما بتسخن عن الحد الطبيعي ، المية بتدور على حتة تخرج منها بالعافية (زي خرطوم الكوعة لما يكون بقاله فترة والافيز نحله وبهدله، والعلبة الفيبر بتاع الريداتير)

الحمد لله انا مش بشيل محفظة : )