الموضوع: حصريا تغطية وصول الكورولا 2013 بالصور [كماليات - اسعار - فئات]

اسمحولى اقول وجهة نظرى مع احترامى لحضراتكم

انا شايف ان اغلبكم هايتفق معايا ان سعر الكورولا مبالغ فيه جدا جدا جدا على امكانيات العربيه .. وشايف ان كل اللى عملتو شركة تويوتا انها رفعت سعر العربيه وقللت الفئات بتاعتها الى 3 فئات بس .. وازاى انا ادفع مبلغ زى ده فى عربيه يابااانى مفيهاش اوبشن وبنفس شكلها ومواصفاتها من 2008

وشايف بردو ان مايتفعش نقارن عربيه زى دى بأى عربيه أوروبى زى الاوكتافيا مثلا ومحدش يقنعنى ان الكورولا اكتر اعتماديه من الاوكتافيا .. الاوكتافيا انتا بتدفع فيها 175 الف فى أول فئه وبتاخد أساسيات مش موجوده اصلا كأوبشن فى العربيات دى .. وكلامى للأستاذ اللى بيسأل عن أوبشن الأوكتافيا .. حضرتك انا هاقولك أساسيات الأوكتافيا فى أول فئه بس :-
1.زجاج كهربا فيه ضغطه أوتوماتيك وسنتر وباور وفتيس ستيترونيك
2.فرامل ABS . EBD , ASR
3.ايرباجات للسواق والركب الأمامى
4.فوجات امامى وخلفى
5.ريموت كنترول فيه زرار بيفتح الشنطه
6.كاسيت CD .AUXوراديو مع 4 سماعات كبار و 4 تويترات
7.مرايات طى كهربا وظبط كهربا ومراية الصالون تعتيم
8.مثيت سرعه
9.طاره مالتى فانكشن
10.كمبيوتر اعطال فى ال Dash Board وبيظبط كل حاجه فى العربيه
11.بلوتوث مع وجود مايك مخفى عشان تتكلم وانتا سايق
12.تكييف تااتش امامى وخلفى .. مع وجود ستائر هوائيه .. يعنى ممكن السائق يشغل تكيف بارد والراكب الأمامى يشغل تكييف ساخن
13.تلاجه فى التابلوه
14.زرار بيقيس ضغط الكاوتش .. وحاجات تانيه انا مش فاكرها

وبتفرق عن الهاى لاين فى الجنط والسبسور بارك وفتحة السقف .. هاتلى بقى حاجه موجوده فى الهاى لاين بتاعة الكورولا ومش موجوده فى البيز لاين فى الأوكتافيا .. ده غير انك بتركب عربيه اكتر ثبات وتحمل وارتياحيه وصلابه ونعومه فى المشى وكل المميزات اللى موجوده فى العربيات اليابانى

والأستاذ اللى بيتكلم عن التكييف بتاع الاوكتافيا ده .. حضرتك لو ركبت العربيه هاتحكم عليها .. مفيش صوت عالى فى التكييف ولا حاجه ولو ركبت العربيتين هاتعرف ان تكييف الفانتازيا احسن بكتير أوى .. وصوته مش بيعلى غير لما تكون معلى المروحه على 7 درجات ومحدش بيعمل كده .. انا عن نفسى باكون مشغله على 4 فى عز الحر وبكون متلج

العربيات الأوروبى معروفه طبعا فى أعادة البيع ان تمنها بينزل وده علشان ملهاش سوق فى بلدك بس فى مقابل كده انتا بتركب عربيه ممكن تبهدل فيها 10 سنين وهتستحمل اكتر من اليابانى .. وهاتلى أوكتافيا 2009 وكورولا 2009 ماشين 100,000 كيلو وقارنهم ببعض هتلاقى ان فى فرق كبير جدا فى التحمل والأعتماديه لصالح الألمانى ..

وعيب الأوروبى انك مينفعش تلعب فى الميكانيا بتاعتو بره التوكيل وكلنا عارفين يعنى ايه توكيل والفلوس اللى بياخدها التوكيل

خلاصة كلامى ان دى عربيه ليها اللى يركبها ودى عربيه ليها اللى يركبها .. انتا لو راجل بتسافر كتير مش ممكن تدفع 170 ألف جنيه فى عربيه فقيره فى حيث انك ممكن تدفه نفس المبلغ تقريبا فى عربيه تستحملك اكتر وبتكنولوجى عاليه دى غير انهاااا ألماااانى .. وانا مش بعيب فى الكورولا بس لو كان تمنها اقل ب 30 ألف مثلا كانت هتبقى مناسبه جدا جدا

الكورولا المفروض تقارن بالانسر او المازدا او العربيات دى .. لكن بالسعر ده العربيه طلعت من فئه لفئه تانيه مينفعش تقارن بيها ومش هتعمل مبيعات زى من 2006 ل 2010

المشاركة الأصلية كتبت بواسطة s o p h o s

يا محمد باشا مفيش قاعدة عامة ابدا
يعني مش كل العربيات صعبة ولا كلها سهلة
وانا قولت مسألة نسبية قطع الغيار ليس الا
وتويوتا اكيد عندها سلبيات زي اي شركة اخري ولو تويوتا عملت ال mmt طب اوروبا لما علمت dsg
كان فتيس ايه خارق مثلا ما جه فمصر الحبيبة والي اتحرق منه والي باظ والي كل شوية فالتوكيل
والي ماشي معاه كويس -- واسمها المانيا مش شركة فاليابان كده المقارنة بتبان وبيظهر ان زي ما ده عمل مشكلة التاني نفس الوضع
ولا انا كلامي غلط فرايك .. ؟

أنا متفق معاك فى إن أى تكنولوجيا جديدة وارد يكون فيها أعطال ... بس اللى مش طبيعى إنى أرجع لتكنولوجيا قديمة لمجرد فيه عطل

أنا عايزك تشوف عربيات فيات وفتيساتها و مواتيرها وأسعارها هتلاقيها حاجة ممتازة جدا