السلام عليكم ورحمة الله وبركاته
بصوا بقي يا هندواية وقولولي المشكله دي منين
اولا انا كان عندي عداد البنزين مش شغال خالص رحت لكهربائي ابن حلال الله يكرمه قالي ده عيب من عوامة البنزين اشتري عوامة
المهم انا سمعت كلامه وطلعت اجري اشتريت عوامة وللاسف فضل العداد مش شغال قالي روح لاي حد بتاع عدادات يركبلك عداد جديد
المهم رحت لواحد كده على الكورنيش بعد البنك الاهلي والله مش فاكر اسمه غيرلي العداد واشتغل بس ظهر العيب ده بعد فترة
اسمعو بقي العيب:
اولا: لو انا مفول العربية والمؤشر بتاع البنزين فوق النص بيفضل فى مكانه حتى لو بطلت العربية مش بينزل.....
ثانيا: لو البنزين تحت النص يعني المؤشر تحت النص اول ما ابطل العربية المؤشر ينزل لتحت خالص بس اول ما اشغل الكونتاكت
يطلع تانى لمكانه بس ببطئ شوية ( تقريبا زي كده اللى بيحصل فى العريبات الحديثة )
ثالثا: نسبة البنزين اللى بحطها فى التانك غير متانسبة مع حركة العداد يعني ايه ؟؟؟؟؟ يعني مثلا لو الموشر فى النص
ورحت حطيت 10 لتر الاقي المؤشر ضرب لفووووووق عن الfull وطبعا لما بمشي شوية اخلص ال 10 لتر اللقي نزل للنص,
وطبعا برضو لو تحت خالص وحطيت 10 لتر يبقي عند النص( يعني حركة المؤشر اكتر من اللى بحطه او اللى بتستهلكه العربية )

طبعا الكلام ده لو انا كتبته فى منتدي تانى كنت هشك ان الاعضاءهتهنج بس انا عارف انا هونداوية نايل موتورز مش كده وقدها وقدود
المهم بقي انا عاوز اعرف ده عيب عداد ولا عيب ايه بالظبط ولو عداد الاقيه بكام واجيبه منين جديد واستيراد لانى طبعا مش هروح عند اللى انا عملته عنده ده تانى

سؤال اضافي بسيط :
الفانوس اللى قدام بتاع الاشارة الشمال برضو بكام واجيبه منين

واسف يا هونداوية لو طولت عليكما بس انا ماليش غيركو وكل سنة وانتم بالف خير وسلامة