تعديل البولو !!

**Qa3Qa3** · 08-07-2008 09:58 PM

السلام عليكم ..

ازيكوا يا جماعه .. بصراحه انا جديد في موضوع العربيات ده ولما دخلت المنتدي هنا لقيت ناس ماشاء الله عليهم ربنا يزيدهم يا رب ويوسع علمهم .. وبصراحه اليومين دول واقع في مشكله وعايز رأيكوا لاني معنديش خبره ..

انا عربيتي بولو 97 1000 سي سي .. فاضيه مانيوال ..

من حوالي اسبوعين جابت جوان وش سلندر رحت لميكانيكي فك .. لقي البستم سايح والشميز بتاعه مكسور من فوق .. قالي هاتلك نص موتور ..

بس انا طالما كده كده هدفع يبقي اظبطها كويس وابيعها واجيب حاجه اعلي بأه ..

انا فكرت اسقطلها موتور 1600 سي سي .. واظبط السمكره .. واركب تكييف وزجاج كهرباء وكده يعني اضيف شوية كماليات وكده ..

بس اهم حاجه .. الموتور اجيبه منين .. ويكون معاه ايه .. ومين اللي فاهم يركبه حلو ..

وهل العربيه لو اتظبطت كده ونزلها الموتور ده تجيب اد ايه تقريبا ..

يا ريت يا جماعه اللي يقدر يفيدني في الموضوع ده اكون شاكر ليه جدا جدا جدا لان الحقيقه العربيه مركونه ومش عارف اخد قرار لسه ..

شكرا مقدما ..

سلام عليكم

**casper2010** · 08-07-2008 10:43 PM

الموتور لوحدة بحاجاتة (الفتيس - المارش -القواعد ...الخ) ممكن يخش في 6-7
دا غير الباقي سمكرة و تكييف و الخ 4-5
و لما تيجي تبيع ما حدش هيرضي بعربية متعدل فيها الموتور
يعني وفر نفس و بيع دلوقتي احسن

**Qa3Qa3** · 08-07-2008 10:49 PM

شكرا لاهتمامك يا اخ كاسبر ..

بس أنا ليا رأي .. الموتور هيكون متعدل من 1000 ل 1600 .. وده علي حجم البولو هيخليها رهيبه .. ولا إيه يا جماعه ؟

ودلوقتي البولو ال 1000 بتعمل فوق الـ 40 .. يبقي دي ممكن تجيب ولا إيه ؟

شكرا مره تانيه يا كاسبر ..

**dr_3eshoo** · 08-07-2008 11:00 PM

بص يا باشا
ركب متور 1400 ممكن العربيه تجيبلك سعر كويس في البيع
ال 1600 لما تيجي تبيع مش هاتجيب اكتر من 33 الف جنيه
ال 1400 ممكن يجيب ال 40 الف او 45
و هات متور البولو ال 1400 بالفتيس هايعملو حركه 5000 جنيه
مين يركبه
محمد سمير في جسر السويس ورا حديقه بدر هايظبطهالك ظبطه المصنع بدون مبالغه
ماتبصش لل 1600 على انه اداء عالي و كده لان المتور ده كبير هايخلعلك العربيه من بعضها و خصوصا ان العربيه مش مجهزة لل 1600 هاتقولي في بولو 1600 اقلك ده بيبقى شاسيه تاني و بيبقى اتقل و اقوى
روح لمحمد سمير يقلك على المفيد

**Qa3Qa3** · 08-07-2008 11:04 PM

الف شكر يا باشا علي اهتمامك ..

الحقيقه كلامك مقنع جدا .. بس انا من كام يوم رحت عشان اشوف لو ينفع اصلح الموتور .. رحت عند اللي ورا حديقه بدر اللي بعد المزلقان علي ايدك اليمين .. بس مفتكرش هوا ده محمد سمير ..

بس اسعارهم مولعه .. يعني عشان يسقطلي الموتور ويظبطلي العربيه هيقطم وسطي فيها .. ولا انتا ايه رأيك يا باشا ؟ !

شكرا مره تانيه

**dr_3eshoo** · 08-07-2008 11:26 PM

لا فاصل معاه و قوله انك من طرف الدكتور احمد بتاع البسات الي من دمياط
الي غير عندك فتيس و اسطوانه
على فكره العربيه هاتتطلع من عنده باذن الله مش هاتحتاج مصاريف بعد كده الا بعدها ب 5 سنين ان شاء الله
هو غالي في قطع الغيار بس مصنعيه مبالغ شويه بس شاطر

**dr_3eshoo** · 08-07-2008 11:27 PM

رحله في مركز الخدمه بتاعه

**iBiZa** · 09-07-2008 09:34 AM

المشاركة الأصلية كتبت بواسطة dr_3eshoo

ماتبصش لل 1600 على انه اداء عالي و كده لان المتور ده كبير هايخلعلك العربيه من بعضها و خصوصا ان العربيه مش مجهزة لل 1600 هاتقولي في بولو 1600 اقلك ده بيبقى شاسيه تاني و بيبقى اتقل و اقوى

نفس الشاسية يا باشا و مش هيتخلع ولا حاجة, دية المانى مش كورى.

الشاسية دة يشيل لحد 2000cc من غير اى مشاكل و ميحتاجش شدادات كمان {بولو كلاسيك}.

بس هو من حيث الموتور و قطع الغيار, ال1400 اسهل و منتشر اكتر و هتلاقى كل حاجتة.

تجيب اية مع الموتور ؟؟ المفروض لو عايز تمشى صح يبقى الموتور بالفتيس و ضفيرة الحوض و الكنترول و البور كامل {قربة - خراطيم - سكاترا - } و التكييف كامل {كباس - خراطيم - كويل} و عفشة قدام و بعد كدة تجيب عفشة ورا سكاكين.

**MMamdouh** · 09-07-2008 10:09 AM

المشاركة الأصلية كتبت بواسطة iBiZa

نفس الشاسية يا باشا و مش هيتخلع ولا حاجة, دية المانى مش كورى.

قصدك تقول ايه يا حضرة الزميل؟؟؟؟؟ :D

ابعتلك لينك من youtube اوريلك فية لانوس بموتور اوميجا 2500 سى سى 6 سلندر عشان تعرف الكورى متين ولا لا؟؟؟؟

MMamdouh

-

الموضوع: تعديل البولو !!

LinkBack

أدوات الموضوع

عرض

-

-

-

-

-

المواضيع المتشابهه

تعديل تابلوه السيراتو (تعديل جديد )بالصور .موضوع 5 نجوم.

محتاج ارأكم فى تعديل سيارتى البولو الجديده

أبيع البولو واجيب اوبل استرا ولا اصرف على البولو شوية ؟؟؟

اول تعديل منى تعديل للمتسوبيشى ايفو كوبيه و اريد رائيكم فيه و شكرااا

ايه الاحسن البولو 99 والا البولو 2001

الكلمات الدلالية لهذا الموضوع

المفضلات

المفضلات

ضوابط المشاركة