عربيتى الصنى 2013 اتخبطت

**mohamedpsd** · 30-10-2012 10:37 AM

المشاركة الأصلية كتبت بواسطة ahmed.tv

قدر الله ماشاء فعل .. وان شاء الله ترجع افضل من الاول
الاكصدام سهل يتظبط عن اى حد شاطر بتاع فيبر .. وخالى السمكرى يبص على القواعد .. ولو فى حاجة يقدر يظبطا حيعملهالك .. ولو محتاجة قواعد بلاستيك حيقولك وتجبها من التوكيل
الفانوس بيتباع كامل فى التوكيل مفيش باغة .. ممكن حضرتك تسال عليه فى محل الاهرام فى التوفيقية .. او تروح لحد بتاع فوانيس بيصب فوانيس نفس الشكل بتاعك ..
ولو حضرتك مامن فى التامين .. يبقا عليك وعلى التوكيل يعملك كل حاجة

\
اولا الف شكر يا للا ستاذ احمد و الاستاذ بشوى انا حقيقى معجب جدا بمواضيع حضراتكم و مجهوداتكم فى القسم

انا مش مامن على العربية

انا نازل القاهرة ان شاء اللة يوم السبت علشان اعمل صيانة 5000 فى زهراء المعادى ياريت يا استاذ احمد تقولى اجيب الفانوس منين بالظبت و ياريت لو فى حد فى جسر السويس علشان اعرف اوصلة لانى اكيد مش هعرف اروح التوفيقية

بالنسبة للسمكرى وبتاع الفيبر لوسمحت تقدر ترشحلى حد كويس يكون فى جسر السويس

ولكم جزيل الشكر وجزاكم اللة خيرا

**MOK3336** · 30-10-2012 01:47 PM

الف سلامه عليك و علي العربية
و معلش هى لازم تتخبط عادي إنت في مصر :)
الخدوش ممكن تعملها عند اى واحد بتاع دوكو هيظبطهالك بالبولش و الكمبوند
الاكصدام هتعمله عن اى حد بتاع فبر و مش هيكلف إن شاء الله اكتر من 20 جنيه
الفانوس هاته ديبو ( بس معتقدتش انه مزل لسه و الله اعلم )

**karimmagdy50** · 30-10-2012 01:59 PM

سهلة ان شاع الله انت ممكن تروح الحرفين وتعمل كل حاجة الاكصدام يتصلح والفانوس تجبله وش
فى فى الحرفين ناس متخصصة فى الفيبر والاكصدام
روح واسال

**Ahmed.TV** · 30-10-2012 03:15 PM

حقيقى انا معرفش حد معين
بس حضرتك ممكن تعدى على الحرفين فى محلات هناك بتعمل الباغة بتاعت الفانوس .. بس مش عارف حتاخد وقت قد ايه
وفى موضوع فى مكتبة القسم لحسام زكى .. فى قسم التعديلات .. كان معدل فانوسه .. ممكن تشوفه
وممكن تسال فى الحرفين وتاخد جولة هناك وتسال هل فى حد بيبع باغات جديدة مش عمولة
بس ده حتدوخ عليه .. لان الاغلب بيبعه فوانيس ديبو كاملة .. ده لو لقتها لان العربية لسه جديدة
وعشان كدا بقولك انزل التوفيقية لان احتمال ممكن تلاقى فى محل الاهرام وفى محلات هناك ممكن تلاقى فيها

وبردوا نفس الكلام لبتوع الفيبر .. فى ناس فى الحرفين كتير .. وفاصل معاهم ..

وان شاء الله خير

**tarekiooo** · 31-10-2012 11:01 PM

احمد اللة على السلامه قبل كل شى

**Land_Cruiser** · 31-10-2012 11:10 PM

قدر الله و ما شاء فعل . حضرتك ممكن تسأل جوه التوكيل فى الاول و تعرف رأيهم ايه و إذا كان الفانوس هيتظبط و لا لازم يتغير و سعر الجديد هيبقى كام و بعد كده اسأل بره و قارن و لو كان السعر قريب اكيد اعملها فى التوكيل علشان ترجع زى ما كانت ان شاء الله. انا ما اعرفش هى نزلها قطع غيار بره التوكيل و لا لسه لان العربيه لسه جديده بس ممكن تسال عند موزعين قطع الغيار المعتمدين زى محمد جابر بس كل ده طبعا بعد ما توديها التوكيل يقولولك رأيهم و التكلفه المبدأيه و ده بالمره و حضرتك بتعمل الصيانه

**mohamedpsd** · 01-11-2012 10:01 AM

لسلام عليكم , اولا انا حقيقى معجب جدا باهتمام حضراتكم بمشكلتى بجد انا حاسس ان بقالى عائلة جديدة و اتمنى انى اتعرف عليكم فى اقرب فرصة
على كل حال انا نازل القاهرة ان شاء الله يوم السبت بجد اتمنى اقابل اى حد من عائلتى الجديدة
ولو اى حد محتاج حاجة من بورسعيد انا فى الخدمة

اولا و اخيرا و دائما بقول الحمد لله على كل شئ خاصة ان العربية اتخبطت من وانا فى الحسين تالت يوم العيد
والحمد لله رحت ورجعت بالسلامة انا والاسرة ودى اهم حاجة احمدك يا رب

بالنسبة للاكسدم انا رحت لواحد سمكرى هنا وقدر يرجعو مكانة و القواعد طلعت سليمة والحمد لله
بالنسبة للفانوس , سالت علية فى السبع تمنة 580 ج من غير الضريبة و كلمت محلات الهرام فى التوفيقية قلولى ممكن يعملو الباغة بتاعتة و هتتكلف حوالى 100 ج و هتاخد حوالى 4 ايام بس انا اول مرة اتعامل معاهم و خايف ليطلع فى الاخر شكلة وش كويس
وكلمت محمد جابر قالى تمنة 1300 جنية

**a.adam212** · 02-11-2012 12:26 AM

ولا يهمك فداك....انا حصل معايا نفس الموضوع بالظبط ....بس الحمد لله على كل حال...عموما العربيات اللي بيبقى فيها الفرامل كويسه لازمدايما تلاقيها متباسه من ورا....يعني بص بصه كدا عالتويوتا الكرولا تحديدا....عشان الفرامل فيها محترمه...وغيرها من بعض انواع السيارات ...والصني الجديده مؤخرا انضمت للقائمه...بصراحه مش عارف انبسط ولا ازعل :)