الموضوع: ارجو مساعدتة فى مشكلة المياة فى a15

المشاركة الأصلية كتبت بواسطة ahmedebian77

الكلبس معايا بس ماكانش فيه جوان
الجوان ده موجود فين؟ و اقول بتاع الجوانات ايه؟
ولو انا عايز اركبه بنفسى ممكن توصف لى طريق التركيب
شكرا

الجوان موجود ف حرف الغطا الالومونيوم ابو 3 مسامير اللى رابط على جسم الماكينة ح تنظف الوش كويس وتسلك الاخرام و تاخد الوش وتروح لبتاع الجوانات ح يعملك الجوان كلنجريت 0.5 مم وانت واقف بـ 2 جنيه وتركب الترموستات وعليه الكلبس ( السوسته ناحية الماكينة ) وتلحّس الجوان شحم على خفيف او جملكة او سليكون حرارى المتوفر كله ينفع وتعيد رباط وش الترموستات ابو 3 مسامير مكانه وتركيب الخراطيم وتملى المية من القربة وتفك الخرطوم اللى واصل للقربة من فوق وتاخد الهواء لحد ما يجيب مية.
و اتوكل على الله ودور.

المشاركة الأصلية كتبت بواسطة ahmedebian77

شكرا يا استاذ احمد بس انا لسه ماركبتش الترموستات لانى حبت اشوف المياة حتنقص تانى و للاسف لقيتها نقصت مش عارف ليه مع العلم ان المياة تنقص بس والعربية ماشية لكن وهى واقفة ودايرة مش بتنقص با ترى اعمل ايه تانى
هل اغير حساس الحرارة؟
هل افك الرداديتر و اكشف عليه؟
انا مش عارف اعمل ايه وانا عايز اسافر بالعربية و خايف

خليك معايا و ح نمشى خطوة خطوة... الاول ظبط المية بين العلامتين اللى على القربة min & max وما تملاش القربة على الاخر.
ح تمشى مشوار صغير وتقف وتفتح الكبوت وتبص بسرعة على القربة وحواليها ووصلات المية والردياتير وطبات الموتور تحت الفرن ف جسم البلوك والناحية التانية ومن تحت وش سير التقسيمة مكان طلمبة المية قبل ما المية تنشف ..ح يبان بتخر منين من الوصلات ولا من غطا القربة ولا من الطبات وقولى عملت ايه.

المشاركة الأصلية كتبت بواسطة ahmedebian77

الف شكر يا استاذ احمد على النصائح الغالية انا روحت لواحد بتاع رداديتير و كشف على العربية و لقينا ان الردادتير عليه صدا على الاحرف الجانبية بطول الرداديتير فاستنتجنا ان المشكلة فيه و قمت بتغيره لان قلى ان لحامه مضيعة للوقت وحيضرب تانى لانه مش حديد و لا نحاس زى كل العربيات الجديدة و ملقيت القربة لغاية بين العلامتين و اخذنا هوا من بوز الردايتير الى متصل بالقربة و كمان انتهزت ان المياة الى كانت موجودة نزلت و رحت مركب الترموستات و مشيت بيها مشوار صغير و ركنتها لتانى يوم الصبح و الحمد لله الميه ما نقصتش
و ان شاء الله اسافر بيها قريب و اقولك على النتيجة النهائية
شكرا

الحمدلله انك مسكت العيب وصلحته ... فاكر عيب التكييف اللى قولت عليه من فترة كده...ظهر عندى وروحت لبتاع التكييفات وكشف على دائرة التبريد ووجد السربنتينة مملحة ومخرومة ومسربة الفريون وقالى ده عيب شائع ف العربيات دى علشان السربنتينة الومونيوم وضيقة وبتملح وتتخرم لوحدها وقال لو جبت بتاعتها الاصلى مش ح تقعد اكتر من شهرين وتتخرم تانى وعرض علية عمل تعديل وتركيب سربنتينة تانية اوسع منها بـ 500 جنية مع الضمان.
و ح أخليها على الصيف ان شاء الله.
حبيت انقلك والساده الزملاء تجربتى مع التكييف لانك سألت ف الموضوع ده قبل كده.

المشاركة الأصلية كتبت بواسطة ahmedebian77

ازيك يا استاذ احمد ياريت لما تروح تعملها قولى علشان اروح معاك و اعمل التكييف بتاعى انا كمان بس لو نلاقى السربنتينة بتاعتها ياريت تبق احسن لان اكيد الجديدة الى حتركب حتبقى برد الومونيوم و حتضرب برده كمان عايز اعرف حتعملها فين لان فى ناس على النتدى اشتكو من المراكبى الى فى جسر السويس انه برده عمل تعديل فى كومبيرسور عربية اوبل و باوزه
شكرا

لأ مش المراكبى ده واحد تانى عندنا ف الاف مسكن بجوار قسم عين شمس كويس بصلح عنده دايما هو غالى شوية بس عنده ضمير ف الشغل هو بيقول السربنتينة اللى ح يركبها الومونيوم بردو بس اوسع شوية من الاصلى بتاعتها ف ده بيقلل فرصة تمليحها وثقبها.... عموما ح اجرب واقولك على اللى حصل باتفصيل والاسعار.