الموضوع: رجالة المنتدى عندى مشكلة ومش لاقى حد يحلها

انا كنت عايز اقول حاجه تانية مش عارف ليها علاقة بالموضوع ولا لا
انا اول ما حصل معايا المشكله دى رحت لميكانيكى غيرلى البوجيهات و نضفلى البوابة بعد ما عيرت البوجيهات العربية معملتش اللى بتعمله لمده كام يوم كدا و بعد كدا رجعت عملت المشكله تانى فممكن يكون مثلا البوجيهات اللى غيرتها نوعها وحش مثلا ولا ميبقاش من كدا

المشاركة الأصلية كتبت بواسطة ehab_mansour

ميكانيكي عكاك كالعاده
عربية حضرتك توقعي الشخصي مشكلتها حاجتين يا طلمبة بنزين يا بوابة الانجيكشن و بيتهيئلي البوابة هي المشكلة

ياريت تروح لحد بيفهم يكشفلك كمبيوتر ويشوف الكنترول مسجل ايه
خليه يشفلك راجع البنزين للتانك لو موجود فيه بنزين لما بتفتح كونتاكت يبقي الطلمبة بريئة ولو مافيهوش بنزين تبقي الطلمبة تعبانه وهي السبب
غير كده تشوف بوابة الحقن

طب يا بشمهندس ايهاب انا معرفش حد بيكشف كمبيوتر يا ريت لو حضرتك تعرف حد قولى

المشاركة الأصلية كتبت بواسطة ehab_mansour

كتير بس المهم قول انت تقدر تروح فين في القاهرة و الناس هنا تقلك لأني حتي الأن الحمد لله مرحتش لحد يكشفلي كمبيوتر

الحرفيين مليانه و شارع الاربعين خلف حديقة بدر مليانه ميكانيكية فولكس و ناحية الهرم و فيصل ابو السيد هيفيدك فيها

والله ابو السيد كان قايلى على واحد فى فيصل بس مش عارف بيكشف كمبيوتر ولا لا انا مستنيه يرود عليا
والله انا تعبك معايا يا م/ ايهاب و ميرسى على اهتمامك

المشاركة الأصلية كتبت بواسطة syd

معلش انا أسف علي التأخير في الرد
بس المشكلة ان عندي شغل الصبح وبليل ومشغول جدا والله

بص يا باشا عصام ماعندوش كمبيوتر
لكن مش هيا دي القضية
زي ما المهندس ايهاب قال لحضرتك - بتوع الكشف بالكمبيوتر كتير اوي
المهم تكشف وتعرف العربية مسجلة ايه اعطال
عرفت العطل هتعمله عند عصام او غيره

حضرتك ساكن فين الأول؟؟

عصام في نهاية الهرم - مشعل

انا عايز حضرتك تعمل تحليل كامل للمشكلة بمعني
انا مشكلتي كذا
المسببات كذا وكذا
انا جربت كذا
يتبقي كذا وكذا

صدقني والله دي احسن طريقة لتتبع المشكلة وحلها
انا عملت كدة في عربيتي لما كان عندي مشكلة وفضلت ابحث وراها انا والمهندس ايهاب لحد لما بفضل من الله اولا ثم حليناها بردو سوا وتدخل عصام كان لا يتعدي ال20% في الحل والباقي كله انا وايهاب - ربنا يباركله

حضرتك فكر في الأتجاه التاني
يعني المهندس ايهاب قالك (طرمبة بنزين - بوابة)
وحط في تفكيرك (موبينة + اسبراتير + سلوك البوجيهات نفسها)

ميزة عصام الوحيدة
انه ميكانيكي فولكس - فلما بيحب يجرب مش بيخليك تشتري من برة
بيجيب من ورشته ويجرب عليها
علي عكس الميكانيكية الأخريين - بيخليك تشتري علشان يجرب حاجة

يعني لو موبينة - ممكن عصام يجيبلك من ورشته او تتصل بيا اجيبلك عربيتي تجرب بحاجتي من عربيتي (وحصلت قبل كدة)
لو سلوك بوجيهات - هيجيب من عنده
طرمبة بنزين - من عنده
بوجيهات - من عنده
اسبراتير - من عنده او بتاع عربيتي
لو البوابة نفسها - بردو من عنده او بتاعة عربيتي والله مش هتفرق

انت هنا في قسم سيات - يعني كل اللي حواليك معاهم نفس عربيتك - ولو روحت لعصام فهو بتاع فولكس يعني بردو عنده كل قطع غيار عربيتك ومش بيشتغل غير فيهم
فبأذن الله التجربة مش هتبقي فيها مشكلة

تمام ؟؟

فكر بس في مشكلتك واقعد حط الحلول وجرب الحلول واخر حاجة تعملها انك تشتري قطعة غيار بعد التأكد تماما ان المشكلة منها

انا توقعي الشخصي انها من اجهزة الأدارة (موبينة - اسبراتير - سلوك بوجيهات) + توقعات المهندس ايهاب (طرمبة + بوابة)
دور في دوول وان شاء الله مشكلتك تتحل بأقل التكاليف

لأن ماتحطش في بالك ان السخونية هي السبب
انت مشكلتك بتحصل وهي سخنة وبردو انت بتقول بتحصل احيانا وهي باردة
وبتقول انها لما بتعملها وهي سخنة بتبطل وتدور ما تعملهاش

اغلب الهسس دة بيبقي من (طرمبة البنزين + الأسبراتير)

تحياتي

بجد يا استاذ سيد انا متشكر جدا على اهتمامك و على ردك
انا ساكن فى دار السلام ومعنديش مشكله انى اروح لعصام هى المشكلة فى حاجه ان الموضوع اللى بيحصل فى العربيه دا بيحصل الصبح بس و مبيحصلش تانى خلال اليوم فحتى لو روحت لعصام زى ما حضرتك بتقول و غيرلى مثلا الموبينا او الطرمبة من عنده عشان نجربها فا كدا كدا حتى لو غيرها من عندوا العيب مش هيبان اذا كانت المشكلة اتحلت ولا لا لازم العربية تبات عشان اجربها تانى يوم الصبح عشان اشوف المشكلة اتحلت ولا لا فبجد انا مش عارف اعمل ايه انا نفسى احل المشكله دى عشان انا خايف فى مرة تعمل معايا كدا و مترضاش تدور خالص ساعتها هحتاس بيها والله انا بقيت بخاف اخرج بيها لتعملها معايا
والله يا جماعه انا بتعبكوا معايا جامد بس بجد عشان انا مش بفهم فى العربيات اوى ودى اول عربية اشتريها فاستحملونى شوية