الموضوع: تجربة و تقييم المرسيدس 280

السلام عليكم:)

النهاردة و بعد اكتر من 650 كيلو بالمرسيدس 280 قيمت و جربت و عرفت حاجات كتير من تفاصيلها و جيت لاخواتي هنا بالتقييم النهائي....

1-السيارة:مرسيدس 280 Sel
2-موديل:1984
3-الموتور:2800 سي سي 177 حصان 220 نيوتن عزم 2 عمود كامات حقن الكتروني للوقود(انجكشن)
4-نظام الدفع:خلفي (كارونة و 2 كبالن ورا) العربية علي 6 مقصات
5-الفتيس:اوتوماتك يحتوي علي عدة نقلات:
-p بارك
-n ممورة
-d درايف
-3 تستخدم النقلة 3 في المطالع بالذات لانها تعطي للسيارة عزم اعلي و قوة اكبر تلاقي نفسك بترجع لورا و نص العربي الادماني بيقوم لفوق:)
-2b اخر نقلة دي تعتبر غرز لما العربية تغرز تستخدم النقلة دي عشان تطلعها

التقييم بالنسبة للاداء و العفشة و الثبات و استهلاك البنزين داخل المدينة:

الاداء:
هتبع نظام جديد في تقييم ال280 كأداء بمعني اني هعمل شعار لكل سرعة و بتحس بأيه و انت علي السرعة دي...
20-40:
من سرعة 20 ل 40كم\ساعة يعني ما بين النقلة الاولي و الثانية العربية بتبقي هادية جدا و زيك زي اي عربية ماشية و لا تحس بفرق الا ان العربية تقيلة جدا جدا
شعار السرعة:سلانسيه سلانسيه
40-60:
من سرعة 40-60كم\ساعة العربية خطر تمشي بيها كده في الشوارع العادية لانها بتبقي مستعدة للجري و بتبقي عند 60كم\ساعة بداية التجميع السريع و لازم تبقي جاهز بالفرامل و تكون مركز لانك في لحظه لو مخدتش بالك و ماشي 60 في شارع زي شارع الهرم ممكن تلاقي بني أدم علي الكبوت:)
شعار السرعة:خف تعوم:)
60-80:
من سرعة 60-80كم\ساعة عند سرعة 60 بتحس ان العربية ابتدت التجميع السريع و عند سرعة 80 لو لما تمشي عليها تحس اكنك واقف علي جنب
شعار السرعة:هموت و اجري:):)

80-100كم\ساعة:
100 كم\ساعة بداية الاحساس انك بتجري بال280 و تلاقي نفسك بتعدي عربيات و عربيات بتعديك برضه لسه مش منطلق
شعار السرعة:رغبة جامحة في الانطلاق

100-120كم\ساعة:
120 كم\ساعة لو في عربية عادية كنت قلتلك ايه يعني 120 انما في ال 280 مش سرعة عادية و لو علي طريق سريع لازم تبقي جاهز بالفرامل لان احساسك و انت علي 120 العربية بتبقي سريعة و بتجري و بتعدي عربيات كتير جدا و مستعدة لانها تتصدر المركز الاول علي الطريق
شعار السرعة:ابعد عني احسنلك:boxing_smiley:

120-150:
150 كم\ساعة بصراحة الدائري مستحملش اكتر من كده سرعة لان العربية كانت طايرة بمعني الكلمة و محدش بيعديك و لو حد فكر يهظر و يشد معاك هيكون هو الخسران خسارة فادحة لان الموتور بحس فيه قوة و اندفاع و شراسة و مقدمة العربية بتخترق الهوا و الطريق بسرعة رهيبة و لو فاتح الشباك بقك هيطبق من الهوا:)

تقييم الاداء مع التكييف:
التكييف عبارة عن تلاجة في صورة تكييف تبريد رهيب دوس علي الزرار و اديله مروحة و سيبه 3 دقائق و بعدها دوس علي زرار الاوتوماتيك الابيض في المنتصف و سيب التكييف ياخد و يدي مع الموتور بيعلي و يوطي حسب الطريق و الموتور و التبريد ببقي تحفه مع الاوتوماتك و التكييف عشان ابقي محايد في التقييم بيأثر علي الاداء تحت ال 100كم\ساعة بتحس ان العربية مخنوقة و مش سريعة زي العادي بتاعها انما بعد ال100 التأثير بيقل اوي اوي من 100-120 و تقريبا بينعدم بعد 120كم\ساعة..

الثبات:
العربية وزنها 1900 كيلو و قاعدة العجلات عريضة جدا جدا و مقاس الكاوتش انا غلطت وقلت مقاس غلط في الموضوع القديم كنت قلت 195 تقريبا لا مقاسات الفرد 205\55 جانط14 سبور اصلي
ثبات العربية مهما قلت مش هقدر اوصفه سواء الثبات في السرعات علي طريق عادي او الثبات في الغرز الاتنين ثباتهم رائع كنت متوقع قبل التجربة ان العربية مش هتبقي ماسكة نفسها كده في الغرز يعني هتعوم سنة لكن انا اتصدمت لما والدي خد بيها غرزة علي 120 و العربية ولا كأنها اتحركت من مكانها فعلا عشق المصريين لام نجمه مجاش من فراغ:)


استهلاك البنزين:
كنت متوقع اكتر من كده لكن الحمد لله الاستهلاك مطلعش بالشراهة اللي انا كنت متصورها اولا العربية فولتها خدت 77 لتر و كسور!! انا كنت فاكرها 70 لتر
-استهلاك البنزين انا بستعمل بنزين90 بتستهلك 28 لتر بنزين تقريبا في مسافة 250 كيلو داخل المدينة والبركة في الانجكشن:) و للعلم السرعة و انا بقيس استهلاك البنزين لم تتعدي 120كم\ساعة و مرات محدودة تقريبا 3 مرات لمدة 10 دقائق من المريوطية باخد الدائري انزل البحر الاعظم و بس...

الحمد لله ربنا وفقنا في الاختيار و طولت رقبتي ادام والدي لاني انا اللي مظبط العربية دي من الاول خالص و انا اقنعته بيها و الحمد لله علي الاختيار و ربنا يكرمنا فيها اتمني التقييم يعجبكم:):)