ماستر فولكس المريوطية --- تجربة و تقييم

**أبو_حمزة** · 20-08-2009 01:32 PM

قبل اى حاجة الهدف الاساسى من كل ما كتبت انى افيد اخوانى بتجربتى و ليس الدعاية الايجابية أو السلبية لأى طرف (و هو ده الهدف الاساسى من المنتدى)

خلينى احكى التجربة أولا بدون ابداء رأى وبعد كده أقول رأيى

كنت قبل كده روحت ورشة اسطى ياسر فى الحرفيين بناء على توصية المهندس اسامه والراجل كان ممتاز جدا ومحترم لكن للاسف كنت مش متأكد انه موجود وقتها عشان اروح له و رمضان داخل و مش عايز استنى لبعد رمضان.

المهم روحت على المركز ومعايا جلبتين مقصات امامى عشان يتغيروا. كمان اخدت معايا عبوة سائل تبريد و زيت فتيس عشان لو الوقت سمح اغير الميه و ازود زيت الفتيس لو محتاج.

تغيير جلبتين مقصات as simple as that تفتكروا ياخدوا وقت اد ايه و مصنعية كام ؟؟؟؟؟؟؟؟

خلى الاجابه فو وسط الحكاية

دخلت المركز. ما شاء الله مساحة ارض كبيرة تاخد حوالى 12 عربية مع الوسع الكافى للشغل فيهم معا وعربيات جولف و باسات وأودى. 6 صنايعية عفشة و ميكانيكا و واحد كهربائى معاه صبى و 2 باشمهندزين... يعنى قوة بشرية تقوم بتوكيل صغير. حاجة تفرح يعنى

الباشمهندز: خير

أنا: عايز اغير جلبتين مقصات امامى عشان بتاع الزوايا قاللى مقطوعين

الباشمهندز: حاجة تانى؟

أنا: لو وقتكم يسمح الغيار الأول تقيل و عمة الموتور عايزة مسمار أو وردة عشان مش ماسكة و بتخبط

الباشمهندز: ها نكشف على عصاية الفتيس ممكن تكون عايزة تتظبط

بدأ احد الصنايعية فى فك المقصات و اثناء الشغل قلت للمهندس ممكن حد يبص قبل ما نفك يمكن كلام بتاع الزوايا مش صح. كان الرد لأ لازم نفك المقصات تماما عشان يبان و كررت السؤال للصنايعى و رد بنفس الاجابة .. قلت على كده الاسطى ياسر عفريت انه جابها بنظرة لم تستغرق ثوانى.

فك المقص الايمن استغرق ساعة ونص..... ايوة تسعين دقيقة بدون توقف

صنايعى مستواه تحت المتوسط و مهندسين واقفين بدون متابعة اى صنايعى

مفيش عدة و الصنايعية بيخطفوا المفاتيح و العدة من بعض

مفيش حتى بلادوز عشان يشوف تحت العربية

كنت نفسى اقول لهم كفاية و ربط تانى و مش عايز منكم حاجة بس قلت اصبر عشان اخلص. طلبت من المهندس ان حد ييجى يشوف الراجل اللى شغال او يخلى صنايعى تانى ايده ماشية يكمل عشان كده كتير قوى ....................

سابنى ومشى و مردش عليا بصراحة ناس زووووق

صنايعى تانى جه ياخد عدة من اللى شغال فى عربيتى بقول له ساعد زميلك ده بقاله ساعتين بيفك المقصات قال لى منا من الضهر شغال فى كوبلن............كوبلن واحد مش 2

و انت و اقف تتفرج على الحركة فى الورشة تفهم ليه هى مليانة عربيات. محدش بيخلص حاجة. و الشغل اللى اخره ساعة ياخد يوم. وده رأى زباين تانيين كمان

بعد ساعتين جه صنايعى تانى يساعد و الحقيقة كان افضل من الاول يعنى مستوى متوسط. و باستخدام المساعدة خلصوا فى 3 ساعات وربع من الشغل المتواصل.

طبعا فى خلال الوقت ده طلبت من الباشمهندزين ان حد يراجع شغل الناس التعبانة دى عشان امشى مطمن طبعا اتحلق لى شعر ودقن

روحت للباشمهندز عشان احاسب و امشى. قال انت كنت عايز حاجة تانى تتعمل قلت له كفاية كده انا مش جاى ابيت ووضحت انى مش مبسوط لم يبدو منه اى اهتمام.

الراجل يشكر قال لى تعالى نجرب. ساق وركبت جنبه و عمل حبة أمركة فى الشارع الفاضى قدام المركز. طبعا لاحظ مشكلة عمة الموتور و رجعنا المركز و وردة حلت المشكلة فى أقل من 3 دقائق. أما عن الفتيس (الغيار الاول تقيل حاجة بسيطة) فكان رده انه عايز يفك الفتيس و يمكن يغير طقم دبرياج قلت له شكرا (مش وقت اشتغالات)

المصنعية كام... 100 جنيه

أنا: انتو كده غاليين قوى يا باشمهندس ودى كانت حاجة بسيطة

الباشمهندز: ده الواد حل العفشة كلها مش بسيطة و لا حاجة

أنا: حل العفشة عشان مش عارف يفك و يركب صح و على العموم مش ها أطول فى الكلام

أخدت بعضى و مشيت و طبعا من غير ما ادى تيبس لأى صنايعى. على ايه العطلة و اللا انى ماشى مش مطمئن ان العفشة اتلمت صح.

الخلاصة:

مركز مكانه قريب لسكان الهرم. مستوى الصنايعية متواضع. مهندسين و جودهم لا يشكل فارق كبير فى جودة الشغل مع كمية تناكة تخنق. و مصنعية غالية.

**ahit** · 20-08-2009 01:42 PM

أخى أبو حمزة
ربنا يعوض عليك فى الفلوس اللى خدوها بس لازم تراجع على الشغل اللى إتعمل عند حد بيفهم عشان تكون ماشى بأمان لأن دى عفشة مش كماليات.
و ربنا يبارك فيك إنك بتنصح إخوانك فى المنتدى
و كل سنة و إنت طيب و رمضان كريم

**M.Mostafa80** · 20-08-2009 02:59 PM

الظاهر ان المبلغ ده ثابت عندهم روحت كشفت على فرن الشكمان وغيرولى سير الدينمو وبليه الشداد بواحده مستعمله من عندهم وحطو العربيه على الجهاز خدو منى ال100 جنيه بردو انا الجلب دى بغيرها عند واحد ميكانيكى عادى الخراط بياخد 10 ج على الجلبه عشان يكبسها
وهو بياخد من 20 الى 30 جنيه يعنى التوتال 50 جنيه وما بيفوكش غير صواميل بيضه المقص بس من الشمعدان
عمتا محدش بيتعلم ببلاش يامحمد

**أبو_حمزة** · 20-08-2009 03:27 PM

قصدك minimum charge
لو الصنايعية شاطرين كنت قلت الغالى تمنه فيه.... الحمد لله على كل حال
انا كنت واقف و غصب عنى عمال بقارن بياسر اللى كان بيتحرك زى النحلة ما شاء الله عليه والورشة الطويلة العريضة اللى مقيش فيها عدة.

**ahmed_gman** · 20-08-2009 08:32 PM

المشاركة الأصلية كتبت بواسطة sabbagh

قصدك minimum charge
لو الصنايعية شاطرين كنت قلت الغالى تمنه فيه.... الحمد لله على كل حال
انا كنت واقف و غصب عنى عمال بقارن بياسر اللى كان بيتحرك زى النحلة ما شاء الله عليه والورشة الطويلة العريضة اللى مقيش فيها عدة.

السلام عليكم ورحمة الله وبركاته
يا باشا كل عام و انتم بخير
وربنا يعوض عليك وهو بردو فى حاجة تانية حضرتك نسيتها انو الغالى ثمنه فيه !!!!!!!!!!!!!!!

وهو التعليم بردو عشان التميز بعد كده ما بين الصالح و الطالح

والى بيعرف والى مبيعرفش

الحمد لله على كل شىء

كل عام وانتم جميعآ بخير

**أبو_حمزة** · 21-08-2009 12:55 PM

الحمد لله على كل حال و توبة من دى النوبة
كل عام و انتم جميعا بخير

اللهم بلغنا رمضان واجعلنا من عتقاءك فى هذا الشهر

**أبو_حمزة** · 24-08-2009 11:20 AM

السلام عليكم و رحمة الله و بركاته
كل عام وانتم جميعا بخير
للأمانة فيه للقصة بقية عشان ابقى مخلص ضميرى
بالامس روحت Fit & Fix (فى كالتكس عباس العقاد) وضبطت زوايا و خليت متخصص الزوايا يكشف على العفشة بمزيد اهتمام
و كانت النتيجة ان العفشة كويسة و الشغل اللى اتعمل مفيش فيه مشاكل و الحمد لله
العربية ماشى بيها بقالى كام يوم و مفيش مشاكل و الحمد لله نهائيا
ارجو اكون وصلت الصورة كاملة بأمانة و بدون ظلم لأى حد

الموضوع: ماستر فولكس المريوطية --- تجربة و تقييم

LinkBack

أدوات الموضوع

عرض

ماستر فولكس المريوطية --- تجربة و تقييم - انشر الموضوع فى :

-

-

-

-

-

-

المواضيع المتشابهه

الحمدلله لسه بايعه عربيتى فولكس بوينتر بعد تجربة مريرة

ممكن تقييم لليون الdsg عن تجربة؟

تجربة فولكس فاغن غولف 1.4 توربو dsg

مطلوب تقييم فولكس بولو موديل 2003

تجربة و تقييم المرسيدس 280

الكلمات الدلالية لهذا الموضوع

المفضلات

المفضلات

ضوابط المشاركة