السلام عليكم ورحمة الله
طبعاً كلنا عارفين ان الريو عربية زي مانقول تحب الراحة شويه وواطية على الارض فهتلاقي في مناطق انت هتستخسر تدخل بالريو بتاعتك فيها خوفاً عليها طبعاً لانها هتكون عربيتك الجديده وهي الاولي عندك يعني
قررت اروح لمعرض الرينو اتفرج الاول واشوف لو ممكن نعمل تست درايف للعربية رغم ان ده مستحيل في مصر يحصل
المهم روحت هناك وشوفت اللوجات اوتوماتيك وكله تمام وتكيف وباور ومفيش طبعاً فرامل abs ولا ebd ولا اي حاجة يعني الفرامل العادية بستر ربك كده
قلت عارف ومتوقع وانا مش جاي اشتري عربية ترفيهيه انا عندي الريو ومش عايز اهلكلها فهشتري الرينو لوجان لقيت الراجل بص لي كأني بشتمه قال لي عادي يا فندم اتفضل
دخلت العربية وياريتني مادخلت لقيت العدادات شبه عدادات السخان عندي في البيت وفوق ده كله تابلوه تقفيل بلاستيك سئ للغاية جودته وتصميم قديم جداً من جوه
طلعت برا وقلت لاحول ولاقوه الا بالله طيب ممكن اجربها قال لي اسف يافندم دي للعرض بس
قلت طيب هي تفرق حاجة عن موديل 2011 انا صاحبي معاه واحده 2011 هتفرق مميزات
قال لي لأ هي هي الفرق بس في تاريخ التصنيع
قلت له طيب تمام اتصلت بصاحبي وجبته بالعربية وركبتها
اولا حسيت ان الريو عندي اودي في البيت بعد ماركبت جوه اللوجان
ده يسيب عندك انطباع سئ وانت جوه العربية يعني بيقفلك منها اي حاجة مش هتعجبك
منظر العدادات زي ماقلت لكم سئ
التكيف يعني معرفناش نجربه كويس لان كانت الدنيا برد ومطره اساساً امبارح وكان في شويه برق ورعد كده خفاف فمعرفناش نجرب التكيف كويس لان الجو كان برد خلقة ربنا
الباور بتاعها سئ بالنسبة للي متعود عليه في الريو في لفه دايما باخدها بالريو من اول مره رغم ان الريو اطول ولكن باللوجان رجعت مرتين علشان اعدي
فيها كاسيت مش نظام صوت وكاسيت صوته عادي جداً كأنها سماعات كمبيوتر
طلعت زي مادخلت من جوه مفيش حاجة خليتني اغير رأيي لكن انا كنت متوقع ده ان هي فيات 128 او بيجو 504 ولكن متطوره شويه
سحب الموتور سئ على 1600 بجد زهقت منها وانا على الطريق الكل طالع علينا حتى العربيات التويوتا الربع نقل طلعت علينا وانا دايس على البنزين
الله المستعان وانا في حيره من الشراء لاني مش مقتنع بيها تماماً ولكن في نفس الوقت مش عايز اهلك الريو معايا عايز عربية جديدة وقت ما احتاجها الاقي منظرها جديد ومبهج زي ماهو دلوقتي
هقول لكم كل جديد وان اشتريت الرينو لوجان اديكم عرفتوا انطباعي عنها من دلوقتي هههههههههه
المفضلات