الموضوع: يطلي لوحات سيارته بالاسود في تحد اخر للقانون - بالصور

مشاركة من : Abdelrahman Mahallawy
عايز اشارك معاكم تجربة عملتها كذا مرة عشان اتأكد إنى مش ظالم :
حمايا لواء كبير قوات مسلحة ، عمرى فى حياتى ما فكرت استخدم إسمه فى أى حاجة ، و كل مرة بجرب فيها اعمل كل حاجة زيى زى اى حد بتسحل لحد ما اوصل للى عايزه .
مرة كنت ماشى بالعربية و اللوحة واقعة وانا طبعا مش واخد بالى ، وقفنى ظابط إسمه النقيب عبدالرحمن فى كمين عند الاتحادية وقاللى فين اللوحة ، نزلت فعلا ملقيتهاش ، قلتله طب انا معرفش إنها اصلا واقعة و عايز اعمل محضر عشان لو حد سرقها يعمل بيها مصيبة ، قاللى بس انا لازم اسحب الرخصة ! قلتله ليه و هو انا لو عايز اشيل النمرة اكيد هشيل إللى ورا مش إللى قدام ده انا كدا بسلم نفسى وش grin emoticon
المهم سحب الرخصة ، مراتى و انا مش واخد بالى كلمت باباها و انا والله العظيم ما كنت عايز الموضوع يوصل بالطريقة دى ، و باباها كلم الظابط ده و طبعا مش عايز اقولكوا منظر الظابط و هوا بيكلمه كان عامل إزاى ، بس كان الوصل خلاص اتعمل و قاللى خلاص مفيش حاجة هبعتهالك على المرور إللى انت فيه بكرة يا فندم ! " بقيت فندم دلوقتى " grin emoticon
الموقف التانى إن الرخصة اتاخرت و فضلت ماشى بوصل ، وقف قدامى عربية عند كمين فى شارع البطل ، كيا شوما متفيمة اسود غامق كلها و عليها ستيكر Air Defense Forces " قوات الدفاع الجوى " من غير نمر قدام ولا ورا و شايف الواد سايق سواقة معفنة طول الطريق ، قلت الحمدلله هياخد إللى فيه النصيب لما يقف فى اللجنة ، الباشا طلع الكارنية للظابط ، و إللى جابلى الضغط فى ساعتها ، الظابط و هوا ماشى إداله التحية !!!!!!!
مشى هوا و الظابط وقفنى انا ! فين اللوحة ، قلتله حصل كذا كذا كذا ، قاللى الوصل منتهى ، قلتله النهاردة الجمعة و الوصل منتهى امبارح اجدده إزاى ؟! قاللى مليش دعوة و مش عارف إيه روح للظابط ده ، فضلت واقف مستنى الظابط ييجى تلت ساعة كدة بيكلم واحدة فى التليفون ، دمى اتحرق اكتر ، قلت والله لاعاملكم بطريقتكم إللى بتفهموها ، قبل ما يشوف فيه إيه ، قلتله عربية اللواء أركان حرب فلان ، مسئلنيش ولا رد بأى كلمة غير " فى رعاية الله يا باشا !!!!! "
انا عندى ييجى عشر مواقف زى كدة حصلوا معايا حاولت اتعامل فيهم عادى و اشوف الشرطة هتعاملنى إزاى ، بس انا رغيت كتير مش عايز الناس تزهق منى .