المشاركة الأصلية كتبت بواسطة ahmed _abo samra
انطباعى عن البى ام دبليو 116i .......
العربيه مش بطيئه نهائى زى ما كتير قالوا .......العربيه بسم الله ما شاء الله بتشد كويس قوى بس بشرط تقلبها مانيوال او تستخدم السبورت مود فى التسارع مش d العادى وتسارعها زى ما قولت قبل كدا تقريبا زى السيفيك وبتجيب من صفر الى 100 فى حوالى 10.5 ثانيه او ممكن 11 بالكتير وعلى فكره انا بقول على ارقام من الواقع مش كلام كتالوجات لان فى ناس بتحب تقول ارقام التسارع والسرعه القصوى من الكتالوجات العربيه دى اولا ما تعدى 200 الشاشه اللى فى العدادات بتكتب كلمة limit وهى تقدر توصل210 كم كسرعه قصوى
بالنسبه للعزل: ممتاز جدا جدا بس عيبها ان الموتور فى الشد (لازم تسمع النغمه المميزه فى شد عربيات bmw ) علشان كدا هتحس ان صوت الموتور عالى شويه مقارنه بعربيات يابانى او فرنسى اخرى لكن من غير شد مش هتسمع صوت الموتور نهائى
العفشه: بصراحه خشنه على المطبات وعلى الطريق .......من حيث مستوى النشوفيه ممكن نقول وسط بين اللانسر السبورت البومه والسيفيك الجديده (يعنى مش ناشفه زى اللانسر وفى نفس الوقت السيفيك انعم شويه) بس ثبات العربيه ينسيك كل حاجه العربيه على الملفات ممتازه جدا -حسيت بثباتها على الطريق اعلى من الاسترا gtc اللى كنت بعتبرها اعلى عربيه فى الفئه دى فى الثبات (ما جربتش جولف 5 قبل كدا بس جربت الليون وسمعت ان الليون نفس شاسيه الجولف والله اعلم ) بجد الثبات اكتر حاجه شدتنى فى العربيه دى
الاطارات : مش عارف ليه بيبقى صوتها واضح قوى بعد 130 كم
ممكن تكون كل الاطارات ال performance بتبقى كدا
العربيه مفيهاش كماليات تشدك ليها يعنى ولا تكييف تاتش ولا مريات ضم ولا كراسى كهرباء بس فيها مفتاح بصمه ومثبت سرعه وفتحة سقف ودى الاوبشن اللى تقريبا موجوده وده على فكره اعلى فئه فيها
الصالون ضيق قوى ويكفى شخصان فقط لو اكتر من كدا مش هينفع غير يبقوا اطفال
اخيرا راىء شخصى العربيه غاليه قوى 250 الف فى عربيه مفهياش اوبشنز كتير وغير عمليه علشان بس عليها اسم bmw حرام
اللى تستاهل سعرها من وجة نظرى bmw 320
الى عشاق البى ام ده مجرد راىء شخصى فقط على العربيه دى وانا اساسا عاشق للبى ام وامنية حياتى فى المستقبل ان شاء الله bmw 5 series
وتقبلوا تحياتى
م :احمد