الموضوع: نصائح عند شراء رينو ميجان

تلف الدريكسيون شمال ويمين وانت واقف ووتشوف لو كنت بتسمع خبطة سواء وإنت بتلف يمين أو شمال ولا مفيش
باور ميجان كهربائى وخفيف ممكن تلفه بصباعك وانت واقف
بعد ما تدور العربية بدقيقة كدا المفروض إن مفيش لمبات بتبقى منورة فى التابلوه غير لمبة فرامل اليد لو مشدودة فقط
ولمبة حزام الأمان لو خالعه
ولمبة الإيرباج لو طافيها من الزرار بتاعها الخاصة بالراكب الأمامى فقط عندى فى الشكل المعدل 2007 بيبقى لمبة حزام الأمان ولمبة الأيرباج موجودين تحت بعض فى شاشة الراديو من على الشمال فى الشكل القديم أعتقد إنهم موجودين فى التابلوه نفسه بس خلى بالك إن فيه لمبيتن للإيرباج واحدة منهم بتنور لوحدها والتانية عبارة عن شخص قاعد وقدامه الإيرباج ودى بتنور مع لمبة السيرفيس غالبا لو فيه عطل فى الإيرباج سيستم

غير كدا مفيش لمبات تانى بتنور بعد تشغيل العربية على ما أتذكر
وخلى بالك لو إن فيه لمبتين فى التابلوه service و stop لازم يكونوا مطفيين فى الحالة الطبيعية للعربية
ممكن لو عايز تتأكد من سلامة المساعدين بالنظر كدا مبدئينا بص عليهم وحاول تعرى الكاوتشة بتاعتهم لو فيه زيت مسرب من المساعد

امشى فى حتة مكسرة شوية على مهلك وشوف لو الدريكسيون بيهبد جامد وبيترج ولا لأ

ولو امكن تبص تحت العربية و تشوف الحالة العامة من تحت لو فيه تسريب زيوت أو ما شابه ذلك

قدام من تحت الموتور بيبقى فيه مصفحة حتة صاج قوية مغطية الموتور من تحت بص عليها

وعادى لو لقيتها مخبوطة متقلقش هو دا دورها إنها تحمى المحرك من تحت وخاصة كارتيرة الزيت من المطبات العالية فطبيعى إنها ممكن تكون محكوكة أو مخبوطة

لو العربية فيها فتحة سقف اختبرها كويس وشوفها بتفتح وتقفل كويس ولا لأ مع الريموت

بالنسبة للسمكرة

الرفارف الأمامية فبر

الرفارف الخلفية صاج تفك الفوانيس الخلفية وبعدين تبص جوا فى ضهر الصاج هتلاقى بادج اسود كدا ملزوق فى الصاج من جوا مش كبير قوى هو بس لو حصل اى سمكرة فى الصاج لازم يشيله وهو عامل زى الاسفنج وفى نفس الوقت ناشف يطلع حتت حتت

لو ملقتهوش هتلاقى بقعة مكان اللزق بتاعه غالبا

بالنسبة للأبواب محتاج تفك فرش الأبواب هتلاقى نفس البادج من فوق فى الباب

ابالنسبة للعتب تبص من تحت تشوف أى لحامات

هات ترموستات التكييف على السخن ومتشغلش التكييف وشوف إذا كان فيه تسريب للهواء السخن ولا لأ

لو العربية فيها مثبت سرعة جربه وغالبا لو مش شغال هيبقى شريط الإيرباج مقطوع

العربية معاها كارتين أصليين

العربية لو جنوطها اسبور جاى معاها اسبتن جنط حديد عادى وكوريك وحديدة قطر ومفتاح جنط ومفتاح عجل وقطعة بلاستيك للف المسامير بعد الفك بمفتاح العجل عشان متوسخش إيديك

بالنسبة للإيرباج العربية فيها 6 طبعا بتشوف قوايم السيارة هتلاقى 2 ورا وجمب الكرسى 2 و 2 قدام

تأكد من عمل أحزمة الأمان كلها كويس جدا

بالنسبة للفرامل تأكد من عمل فرامل اليد جيدا

أكشف على الأربع ديسكات اللى فى العربية ورا وقدام مشى إيدك عليهم شوف لو فيه عالى وواطى ممكن تقيس سمك الطنابير والتيل عشان تعرف صلاحيتهم

غالبا بيبقى م كتوب على الطنبورة أقل مقاس يعنى الخلفية مثلا أقل مقاس بيبقى 7 مللى

ممكن تتابع سير خراطيم الزيت بالنظر كدا وشوف إذا كان فيه أى تسريب للزيت

بالنسبة لتانك البنزين تعالا عند العجلة الخلفية يمين وبص جوا كدا فى الكارتيرة شوف إذا كان فيه تسريب بنزين الطبيعى إنك ماتشمش ريحة بنزين هتلاقى الخراطيم ممكن تشوفها إذا كانت مسربة ولا لأ

نرجع للتكييف تانى بص من فوق كدا تحت الدينامو هتلاقى الكمبرسور هتلاقى خراطيم طالعة منه أمشى ورارها لفوق هتلاقى حتت جلد لاحظ لو كانت منفوخة ودا معناها إنها عايزة تتغير

أتأكد من عمل الراديو ومن وجود الآريال الخلفى للراديو

العربية فيها 6 سماعات 2 تويتر فى التابلوه تحت الزجاج الأمامى و فى الأبواب الأمامية واضحين جدا ونفس الكلام 2 فى الأبواب الخلفية

شغل سى دى نضيف فيه أغنية فيها طبل جامد ومزيكا ونقاء صوته عالى واسمع جميع السماعات وشوفها شغالة كلها ولا لأ

طبعا ممكن تضغط على الزرارين 1 و 6 مع بعض وبعدين تضغط على الزرار اللى مكتوب جمبه حرف i هيعملك اختبار للسماعات ركز فيه

تمام كدا السماعات شغالة كويس لأ لسة إنت مش متأكد على الصوت جامد وشوف السماعات بتزرجن وتشوشر وتعمل زى ما يكون حاجة بتتهز غير طبيعية ولا لأ لو كدا ركز مع السماعة دى لأنها تعبانة

الكرسى فيه يد من على الجمب بتعلى وتوطى منه شوفه شغال كويس ولا لأ

الكرسى فيه من قدام مقبضين اليمين عشان ترجع ضهرية الكرسى لورا والتانى الشمال عشان ترجع بالكرسى كله لورا وتطلع بيه تانى لقدام لما تدوس عليه
وكمان فيه بكرة من على الجمب اليمين مكانها غلس شويتين دى عشان القطنية بتاع ضهرك بتنفخ الكرسى من الحتة عشان تقعد مستريح لما تلفها
الكلام دا بالنسبة لكرسى السائق والكرسى الأمامى للراكب الأمامى نفس الكلام بس متقدرش تتحكم فى علوه وانخفاضه لأنك مش سايق لكن تتحكم فى إنك ترجع الضهرية وإنك تنقل الكرسى لورا ولقدام بالكامل عند شد احدى المقبضين لأداء الوظيفة المطلوبة تأكد من عملهم

جرب تشغيل الزجاج الخلفى للسخان وهو من وظائف التكييف وشوف هل بيسخن الزجاج الخلفى ولا لأ وجرب تدوير بكرة التكييف اللى بتتحكم فى منافذ الهواء اللى بتطلعه سواء على القدمين أو فى المنتصف أو من عند الزجاج وشوفها شغالة كلها ولا لأ

للعلم فيه منفذ للتكييف تحت الكرسى بس مش ملحوظ قوى

بالنسبة للفتيس أثناء التجريب لو فتيس العربية أوتو هاته على نظام النقل المانيوال عن طريق إنك تزق عصا الفتيس شمال وإنت على ال d بيكتبلك الغيار اللى إنت عليه على الشاشة جرب تستخدمه بتدوس بنزين عادى وتنقل من غير ما ترفع رجل من على البنزين ولو هتهدى مترجعش غيارات العربية هترجع لوحدها